ഹിമാചല്‍ പ്രദേശ് ഫലം: ജയ്‌റം താക്കൂറിന്റെ മണ്ഡലത്തില്‍ രണ്ടാം സ്ഥാനത്ത് സിപിഎം

ഷിംല: ഹിമാചല്‍ പ്രദേശ് തെരഞ്ഞെടുപ്പില്‍ അപ്രതീക്ഷിത മുന്നേറ്റവുമായി സി പി ഐ എം. നിലവിലെ സിറ്റിംഗ് സീറ്റായ തിയോഗില്‍ ലീഡ് ചെയ്യുന്നതിന് പുറമെ മുഖ്യമന്ത്രി ജയറാം താക്കൂറിന്റെ സെറാജ് മണ്ഡലത്തില്‍ സി പി ഐ എം രണ്ടാം സ്ഥാനത്തേക്ക് എത്തിയിരിക്കുകയാണ്.

ബി ജെ പി ഇവിടെ ലീഡ് ചെയ്യുമ്പോള്‍ രണ്ടാം സ്ഥാനത്തിനായി സി പി ഐ എമ്മും കോണ്‍ഗ്രസും തമ്മിലാണ് പോരാട്ടമെന്ന് ടൈംസ് നൗ വോട്ടെണ്ണല്‍ വിശകലനത്തില്‍ റിപ്പോര്‍ട്ട് ചെയ്യുന്നു. ആദ്യഫല സൂചനകളില്‍ കോണ്‍ഗ്രസ് രണ്ടാമത് എത്തിയിരുന്നെങ്കിലും ഒരു മണിക്കൂറിന് ശേഷം സി പി ഐ എം നേരിയ ലീഡ് സ്വന്തമാക്കുകയായിരുന്നു.

സി പി ഐ എമ്മിനായി മഹേന്ദര്‍ റാണ ആണ് സെറാജില്‍ മത്സരിക്കുന്നത്. ഗീതാ നന്ദ് ( എ എ പി ), ഇന്ദ്ര ദേവി ( ബി എസ് പി ), ചേത് റാം ( കോണ്‍ഗ്രസ് ) എന്നിവരാണ് മറ്റ് സ്ഥാനാര്‍ത്ഥികള്‍ ഒരു സ്വതന്ത്രനും ഇവിടെ മത്സരിക്കുന്നുണ്ട്. 57 കാരനായ ജയറാം താക്കൂര്‍ 1998 മുതല്‍ സെറാജില്‍ നിന്ന് അഞ്ച് തവണയായി വിജയിച്ച് വരുന്നു.

നേരത്തെ ചാച്ചിയോട്ട് എന്നാണ് മണ്ഡലം അറിയപ്പെട്ടിരുന്നത്. മണ്ഡലത്തിലെ ജനസംഖ്യയില്‍ 27.36% പേര്‍ പട്ടികജാതിയിലും 1.3% പേര്‍ പട്ടികവര്‍ഗത്തിലും ഉള്‍പ്പെടുന്നവരാണ്. മണ്ഡലത്തില്‍ ആകെ 84315 വോട്ടര്‍മാരാണ് ഉള്ളത്. അതില്‍ 43216 പുരുഷന്മാരും 40741 സ്ത്രീകളും ഉണ്ട്.

2017 ലെ തിരഞ്ഞെടുപ്പില്‍ ജയ് റാം താക്കൂര്‍ കോണ്‍ഗ്രസിന്റെ ചേത് റാമിനെ തോല്‍പ്പിച്ച് 11,254 വോട്ടുകള്‍ക്കാണ് വിജയിച്ചത്. 2017 ല്‍ ബി ജെ പിക്ക് 55.59 ശതമാനം വോട്ട് വിഹിതം ഈ മണ്ഡലത്തില്‍ നിന്ന് ലഭിച്ചിരുന്നു. 2012 ല്‍ ജയ് റാം താക്കൂര്‍ കോണ്‍ഗ്രസിന്റെ താരാ ഠാക്കൂറിനെ 5,752 വോട്ടുകളുടെ ഭൂരിപക്ഷത്തില്‍ ആണ് പരാജയപ്പെടുത്തിയത്.

മാണ്ഡി ലോക്‌സഭാ മണ്ഡലത്തില്‍ ഉള്‍പ്പെടുന്ന സെറാജില്‍ നിന്നാണ് 2019 ലോക്സഭാ തെരഞ്ഞെടുപ്പില്‍, ബി ജെ പിക്ക് ഏറ്റവും കൂടുതല്‍ വോട്ടുകള്‍ ലഭിച്ചത്. 2014 ല്‍ ഇവിടെ കോണ്‍ഗ്രസ് ആയിരുന്നു വിജയിച്ചിരുന്നത്.

English summary

Himachal Pradesh Elections Result 2022: cpm trailing in Seraj constituency behind bjp