സൈറയെ മാതൃകയാക്കണം, ഹിന്ദു നടിമാർ അഭിനയം നിർത്തണമെന്ന് ഹിന്ദു മഹാസഭ പ്രസിഡണ്ട് സ്വാമി ചക്രപാണി!
ദില്ലി: ഹിന്ദു നടിമാര് അഭിനയം നിര്ത്തണമെന്ന് ഹിന്ദു മഹാസഭ പ്രസിഡണ്ട് സ്വാമി ചക്രപാണി. സിനിമാ അഭിനയം മതവിശ്വാസത്തെ ബാധിക്കുന്നു എന്ന് വ്യക്തമാക്കി സിനിമാ ജീവിതം അവസാനിപ്പിച്ച നടി സൈറ വസീമിന്റെ പാത ഹിന്ദുക്കളായ നടിമാരും പിന്തുടരണം എന്നാണ് ചക്രപാണിയുടെ ആഹ്വാനം. സൈറയെ താന് പിന്തുണയ്ക്കുന്നു എന്ന് വ്യക്തമാക്കിയ ചക്രപാണി സൈറയില് നിന്ന് ഹിന്ദു നടിമാര് പ്രചോദനം ഉള്ക്കൊള്ളണം എന്നും പറഞ്ഞു.
ചക്രപാണിയുടെ പ്രസ്താവനയ്ക്ക് എതിരെ സോഷ്യല് മീഡിയ വിമര്ശനം ഉന്നയിക്കുന്നുണ്ട്. അമീര് ഖാന് നായകനായ ദംഗല് എന്ന സൂപ്പര് ഹിറ്റ് ചിത്രത്തിലൂടെ ശ്രദ്ധേയയായ സൈറ മികച്ച സഹനടിക്കുളള ദേശീയ പുരസ്ക്കാരം നേടിയിട്ടുളള അഭിനേതാവാണ്. ഫര്ഫാന് അക്തറും പ്രിയങ്ക ചോപ്രയും അഭിനയിക്കുന്ന ദ സ്കൈ ഈസ് ദ ലിമിറ്റ് എന്ന പുതിയ ചിത്രം പുറത്തിറങ്ങാനിരിക്കെയാണ് സൈറ അഭിനയം അവസാനിപ്പിക്കുന്നതായി പ്രഖ്യാപിച്ചത്.
ബോളിവുഡില് എത്തിയതോടെ താന് ഈമാനില് നിന്നും അകന്നുമെന്നും മതവുമായുളള ബന്ധത്തിന് സിനിമാ ജീവിതം തടസ്സമായെന്നും സൈറ ഫേസ്ബുക്ക് പോസ്റ്റില് പറയുന്നു. ജീവിതത്തില് നിന്ന് എല്ലാ ബറക്കത്തുകളും തനിക്ക് നഷ്ടപ്പെട്ടു. അതുകൊണ്ട് അഭിനയം അവസാനിപ്പിക്കുകയാണ് എന്നാണ് സൈറ വസീ വ്യക്തമാക്കിയത്. സൈറയുടെ തീരുമാനത്തെ വിമര്ശിച്ച് നടിമാര് അടക്കം രംഗത്ത് വന്നിരുന്നു.
പിന്നാലെ സൈറയുടെ ഫേസ്ബുക്ക് അക്കൗണ്ട് ഹാക്ക് ചെയ്യപ്പെട്ടതാണ് എന്നും പോസ്റ്റ് സൈറ ഇട്ടതല്ലെന്നും പ്രചാരണം നടന്നു. എന്നാല് ഈ പ്രചാരണം സൈറയുടെ മാനേജര് നിഷേധിച്ചു. പിന്നാലെ സൈറ തന്നെ ഫേസ്ബുക്കില് വിശദീകരണ കുറിപ്പിട്ടു. തന്റെ അക്കൗണ്ട് ഹാക്ക് ചെയ്യപ്പെട്ടിട്ടില്ല എന്നും താന് തന്നെയാണ് പോസ്റ്റിട്ടത് എന്നുമാണ് സൈറ വിശദീകരിച്ചത്.