എച്ച്ഐവി പോസിറ്റീവ് ആയ യുവതി മകളുമായി ആത്മഹത്യ ചെയ്തു
ദമോഹ്: എച്ച്ഐവി പോസിറ്റീവ് ആണെന്ന് കണ്ടെത്തിയതിനെ തുടര്ന്ന് യുവതി മകളുമായി ആത്മഹത്യ ചെയ്തതായി കണ്ടെത്തി. മധ്യപ്രദേശിലെ ദമോഹ് ജില്ലയിലാണ് സംഭവം. ആറുവയസ് പ്രായമായ മകളുമായി കിണറ്റില് ചാടിയാണ് യുവതി ആത്മഹത്യ ചെയ്തത്. അടുത്തിടെ സ്ത്രീ ഒരു സര്ക്കാര് ആശുപത്രിയില്വെച്ച് എച്ച്ഐവി ടെസ്റ്റ് നടത്തിയിരുന്നതായി പോലീസ് അറിയിച്ചു.
സിങ്കറൗലി ജില്ലക്കാരനായിരുന്ന സ്ത്രീയുടെ ഭര്ത്താവ് മൂന്നു വര്ഷങ്ങള്ക്ക് മുന്പ് എച്ച്ഐവി ബാധിച്ച് മരിച്ചിരുന്നു. ഇതിനുശേഷം രണ്ടു പെണ്കുട്ടികളുമായി മാതാപിതാക്കള്ക്കൊപ്പമായിരുന്നു സ്ത്രീയുടെ താമസം. അടുത്തിടെ യുവതിക്കും മൂത്ത മകള്ക്കും ടിബി ലക്ഷണങ്ങളെ തുടര്ന്ന് ആശുപത്രിയില് ചികിത്സ തേടിയിരുന്നു.
ചികിത്സയ്ക്കിടെ ഡോക്ടര്മാര് എച്ച്ഐവി പരിശോധന നടത്തി. ജൂലൈ 21ന് പുറത്തുവന്ന റിസല്ട്ട് പ്രകാരം സ്ത്രീ എച്ച്ഐവി ബാധിതയാണെന്ന് കണ്ടെത്തിയിരുന്നു. ഇതിനുശേഷം മാതാപിതാക്കളില് നിന്നും അകന്ന സ്ത്രീ വീട്ടിലെ ഒരു മുറിയില് ഒറ്റപ്പെട്ടാണ് കഴിഞ്ഞിരുന്നത്. ഭക്ഷണം കഴിക്കാനോ മറ്റാവശ്യങ്ങള്ക്കോ കുടുംബാംഗങ്ങളുമായി ചേര്ന്നില്ല.
ഇതിനിടെ കഴിഞ്ഞദിവസം ഇവരെ കാണാതാവുകയായിരുന്നു. തിരച്ചിലില് അടുത്തുള്ള കിണറ്റില് ഒരു മകളുടെയും അമ്മയുടെ മൃതദേഹം കണ്ടെത്തുകയും ചെയ്തു. ആത്മഹത്യയാണെന്നാണ് പ്രാഥമിക നിഗമനമെന്ന് പോലീസ് പറഞ്ഞു. അതേസമയം, വിഷയത്തില് വിശദമായ അന്വേഷണം നടത്തുമെന്നും പോലീസ് ഉദ്യോഗസ്ഥന് വ്യക്തമാക്കി.