സ്വർണാഭരണങ്ങൾ വിൽക്കുമ്പോൾ വമ്പൻ നഷ്ടം, പ്രതീക്ഷിച്ച പണം തിരികെ കിട്ടില്ല, ചെയ്യേണ്ടത് ഇക്കാര്യങ്ങൾ

സ്വർണ്ണാഭരണങ്ങളെ നമ്മൾ വെറുമൊരു അലങ്കാരമായിട്ടല്ല കാണുന്നത്. കഷ്ടപ്പാടുള്ള സമയത്ത് എടുത്തുപയോഗിക്കാൻ പറ്റിയ ഏറ്റവും മികച്ചൊരു സമ്പാദ്യമായിട്ട് കൂടിയാണ് നമ്മൾ സ്വർണ്ണത്തെ കരുതുന്നത്.

സ്വർണ്ണാഭരണങ്ങളിൽ നിക്ഷേപിക്കുന്നത് അടിയന്തിര ഘട്ടങ്ങളിൽ തുണയാകുമെന്നാണ് പൊതുവെയുളള ഒരു ധാരണ. എന്നാൽ ചാർട്ടേഡ് അക്കൗണ്ടന്റായ നിതിൻ കൗശിക്കിന്റെ അഭിപ്രായത്തിൽ പെട്ടെന്ന് പണത്തിന് ആവശ്യമുള്ളപ്പോൾ സ്വർണം വിൽക്കുന്നത് സാമ്പത്തിക നഷ്ടമുണ്ടാക്കാൻ കാരണമാകും.

വിദ്യാഭ്യാസം, മികച്ച ചികിത്സ, അല്ലെങ്കിൽ മറ്റ് പ്രധാനപ്പെട്ട ആവശ്യങ്ങൾക്കായി പണം അടിയന്തിരമായി വേണ്ടി വരുമ്പോൾ, സ്വർണ്ണാഭരണങ്ങൾ വിൽക്കുന്നത് ലാഭകരമായ ഒരു മാർഗ്ഗമല്ലെന്ന് നിതിൻ ചൂണ്ടിക്കാണിക്കുന്നു. ആഭരണങ്ങൾ പെട്ടെന്ന് പണമാക്കി മാറ്റാൻ ശ്രമിക്കുമ്പോൾ പ്രതീക്ഷിച്ച അത്ര തുക ലഭിക്കില്ല.

ഒരു ഉദാഹരണത്തിലൂടെ നിതിൻ കൗശിക് ഇത് വ്യക്തമാക്കുന്നു. ഒരു കുടുംബം തങ്ങളുടെ കുട്ടിയുടെ ഉപരിപഠനത്തിനായി 45 ലക്ഷം രൂപ വിലമതിക്കുന്ന സ്വർണ്ണാഭരണങ്ങൾ വിൽക്കാൻ തീരുമാനിക്കുന്നു എന്ന് കരുതുക. പേപ്പറിൽ ഈ തുക വളരെ വലുതാണെന്ന് തോന്നുമെങ്കിലും, ആഭരണങ്ങൾ വിറ്റു കഴിയുമ്പോൾ കൈയിൽ കിട്ടുന്ന യഥാർത്ഥ തുക ഇതിലും വളരെ കുറവായിരിക്കും.

സ്വർണ്ണ വിപണിയിലെ ചില പ്രത്യേക കുറവുകളാണ് ഇതിന് കാരണം.നമ്മൾ ആഭരണങ്ങൾ വാങ്ങുമ്പോൾ അതിന്റെ ഡിസൈനിനും നിർമ്മാണത്തിനുമായി വലിയൊരു തുക പണിക്കൂലിയായി നൽകാറുണ്ട്. എന്നാൽ ഈ ആഭരണങ്ങൾ തിരികെ വിൽക്കുമ്പോൾ ഈ പണിക്കൂലി തിരികെ ലഭിക്കില്ല.

പഴയ ആഭരണങ്ങൾ തിരികെ വാങ്ങുമ്പോൾ ജ്വല്ലറിക്കാർ അതിന്റെ യഥാർത്ഥ സ്വർണ്ണത്തിന്റെ അളവ് തിട്ടപ്പെടുത്താൻ അവ ഉരുക്കി നോക്കാറുണ്ട്. ഈ പ്രക്രിയയിൽ കുറച്ചു സ്വർണ്ണം നഷ്ടപ്പെടുകയും അതിന്റെ വില നമ്മുടെ തുകയിൽ നിന്ന് കുറയ്ക്കുകയും ചെയ്യും. വിൽക്കുന്ന സമയത്ത് നടത്തുന്ന പരിശോധനയിൽ സ്വർണ്ണത്തിന്റെ ശുദ്ധി കുറവാണെന്ന് കണ്ടാൽ അതിനനുസരിച്ചുള്ള തുകയും കുറയും.

ഈ ഘടകങ്ങളെല്ലാം ചേരുമ്പോൾ സ്വർണ്ണത്തിന്റെ ആകെ മൂല്യത്തിന്റെ ഏകദേശം 18 ശതമാനത്തോളം രൂപ കുറയാൻ സാധ്യതയുണ്ട്. 45 ലക്ഷം രൂപയുടെ ആഭരണങ്ങൾ വിൽക്കുമ്പോൾ ഏകദേശം 8 ലക്ഷത്തിലധികം രൂപയുടെ നഷ്ടം സംഭവിച്ചേക്കാം എന്നാണ് കൗശിക് വ്യക്തമാക്കുന്നത്. ഏറ്റവും കൂടുതൽ പണം ആവശ്യമുള്ള അടിയന്തിര ഘട്ടത്തിൽ ഇത്തരം ഒരു വലിയ നഷ്ടം വരുന്നത് കനത്ത പ്രഹരമായിരിക്കും.

അടിയന്തിര ഘട്ടങ്ങളിൽ ഉപയോഗിക്കാനുള്ള ഒരു സാമ്പത്തിക സുരക്ഷയ്ക്കായി സ്വർണ്ണത്തെ കാണുന്നുണ്ടെങ്കിൽ, അത് ആഭരണങ്ങളുടെ രൂപത്തിൽ സൂക്ഷിക്കുന്നതിന് പകരം മറ്റ് ചില മികച്ച വഴികൾ തിരഞ്ഞെടുക്കാമെന്ന് കൗശിക് നിർദ്ദേശിക്കുന്നു:

സർക്കാർ പുറത്തിറക്കുന്ന സോവറിൻ ഗോൾഡ് ബോണ്ടുകളിൽ നിക്ഷേപിക്കുന്നത് വഴി പണിക്കൂലിയോ മറ്റ് നഷ്ടങ്ങളോ ഇല്ലാതെ സ്വർണ്ണത്തിന്റെ തനത് മൂല്യം പൂർണ്ണമായും തിരികെ ലഭിക്കും. കൂടാതെ ഇതിന് കൃത്യമായ പലിശയും ലഭിക്കാറുണ്ട്.
നാണയങ്ങളായോ ചെറിയ ബിസ്ക്കറ്റുകളായോ ശുദ്ധമായ സ്വർണ്ണം വാങ്ങി സൂക്ഷിക്കുന്നത് വഴി വിൽക്കുമ്പോൾ പണിക്കൂലി ഇനത്തിലുള്ള വലിയ നഷ്ടം ഒഴിവാക്കാം.