250 രൂപയ്ക്ക് പെണ്‍കുട്ടിയെ വാങ്ങി, വീട്ടുജോലി കഴിഞ്ഞാല്‍ ഭിക്ഷാടനത്തിനായി പറഞ്ഞുവിടും

By Sruthi K M

Published: Tuesday, February 9, 2016, 15:07 [IST]

ഹൈദരാബാദ്: ഭിക്ഷാടത്തിനു വിടാനായി ദമ്പതികള്‍ പെണ്‍കുട്ടിയെ വാങ്ങി. പതിമൂന്ന് വയസ്സുള്ള പെണ്‍കുട്ടിയെയാണ് ദമ്പതികള്‍ ഭിക്ഷാടനത്തിന് അയച്ചത്. പെണ്‍കുട്ടിയെ മൃഗീയമായ രീതിയില്‍ ഭിക്ഷയെടുപ്പിച്ച ദമ്പതികളെ പോലീസ് ഇതിനോടകം അറസ്റ്റ് ചെയ്തു. മൂന്നു മാസത്തോളമായി ഭിക്ഷ യാചിച്ചെത്തുന്ന കൂട്ടത്തില്‍ പൂജ എന്ന പെണ്‍കുട്ടിയുമുണ്ട്.

തെലുങ്കാനയിലെ രംഗറെഡ്ഡി ജില്ലയിലെ ബഷീറാബാദിലാണ് സംഭവം നടന്നത്. താന്‍ഡൂര്‍ ബസ് സ്റ്റാന്‍ഡില്‍ ഭിക്ഷയെടുത്തു നടക്കുന്ന പെണ്‍കുട്ടി പോലീസിന്റെ ശ്രദ്ധയില്‍പ്പെടുകയായിരുന്നു. തുടര്‍ന്ന് നടന്ന അന്വേഷണത്തിലാണ് ദമ്പതികളെക്കുറിച്ചറിയുന്നത്. 250 രൂപ കൊടുത്താണ് പെണ്‍കുട്ടിയെ ദമ്പതികള്‍ വാങ്ങിച്ചത്.

മുംബൈയില്‍ താമസിച്ചിരുന്ന സമയത്താണ് ദമ്പതികള്‍ പെണ്‍കുട്ടിയെ ഒരാളുടെ കൈയ്യില്‍ നിന്നും വാങ്ങുന്നത്. എന്നാല്‍, കുട്ടിയെ വളര്‍ത്താനായിരുന്നില്ല ഇവരുടെ ലക്ഷ്യം. കുട്ടിയെ കൊണ്ട് പണം സമ്പാദിക്കുകയായിരുന്നു പരിപാടി. ആദ്യം വീട്ടു ജോലിയാണ് കുട്ടിയെ കൊണ്ട് എടുപ്പിച്ചത്. പിന്നീട് കുട്ടിയെ ഭിക്ഷാടനത്തിനായി അയക്കുകയായിരുന്നു.

രാവിലെ വീട്ടിലെ ജോലികള്‍ ചെയ്തശേഷം പെണ്‍കുട്ടി ഭിക്ഷാടനത്തിനായി പോകും. പെണ്‍കുട്ടിയെ നിര്‍ബന്ധിച്ച് പറഞ്ഞുവിടുകയാണ് ചെയ്യുന്നത്. സംഭവത്തില്‍ വി ബാസമ്മ, വി രാമലു എന്നിവരെ പോലീസ് അറസ്റ്റ് ചെയ്തിട്ടുണ്ട്.

Published On February 9, 2016