മോദി 'ചെകുത്താന്‍' ആണെന്ന് ലാലു പ്രസാദ് യാദവ്

പാറ്റ്‌ന: വീണ്ടും വിവാദ പ്രസ്താവനയുമായി ആര്‍ജെഡി നേതാവ് ലാലു പ്രസാദ് യാദവ് രംഗത്ത്. ഇത്തവണ പ്രധാനമന്ത്രി നരേന്ദ്ര മോദിക്ക് ചുട്ട മറുപടിയാണ് ലാലു നല്‍കിയത്. ഞാന്‍ പിശാചാണെങ്കില്‍ മോദി വലിയ ചെകുത്താനാണെന്നാണ് അദ്ദേഹം പറഞ്ഞത്.

മോദി ലാലു പ്രസാദ് യാദവിനെ 'ശെയ്ത്താന്‍' എന്നു വിശേഷിപ്പിച്ചിരുന്നു. ഇതിനെതിരെയാണ് ലാലു പ്രതികരിച്ചത്. തന്നെ ശെയ്ത്താന്‍ എന്നു വിളിച്ച മോദിക്കെതിരെ തിരഞ്ഞെടുപ്പ് കമ്മീഷന് പരാതി നല്‍കുമെന്നും ലാലു പ്രസാദ് പറഞ്ഞു. പിന്നോക്ക വിഭാഗക്കാര്‍ക്ക് ഏര്‍പ്പെടുത്തുന്ന സംവരണം ഇല്ലാതാക്കാന്‍ ആര്‍എസ്എസും ബിജെപിയും ഗൂഢാലോചന നടത്തുന്നുവെന്ന് ലാലു ആരോപിച്ചിരുന്നു.

ഇതിനെ തുടര്‍ന്നാണ് മോദി ലാലുവിനെതിരെ പ്രതികരിച്ചത്. എന്നാല്‍, താന്‍ തെറ്റ് കണ്ടാല്‍ ഇനിയും ശബ്ദം ഉയര്‍ത്തുമെന്നാണ് ലാലു പറഞ്ഞിരിക്കുന്നത്. വാ മൂടി കെട്ടാന്‍ ആരും ശ്രമിക്കണ്ടെന്നും ലാലു പാറ്റ്‌നയില്‍ വ്യക്തമാക്കി.

ലാലു പ്രസാദ് യാദവിനെ തിരഞ്ഞെടുപ്പ് കമ്മീഷന്‍ എന്തിന് അയോഗ്യനാക്കി എന്ന കാര്യം വോട്ടര്‍മാര്‍ തന്നെ ചോദിക്കണമെന്ന് മോദി പ്രതികരിച്ചിരുന്നു. നിതീഷ് കുമാറും ലാലുവും ചേര്‍ന്ന് ബീഹാറില്‍ ജംഗിള്‍രാജിനാണ് ശ്രമിക്കുന്നതെന്നും മോദി ആരോപിച്ചിരുന്നു.

English summary

A day after Prime Minister Narendra Modi called RJD chief Lalu Prasad a 'shaitan' (devil), the former Bihar chief minister hit back on Friday saying Modi was a 'super demon'.