ഉത്തര്പ്രദേശിനെ നടുക്കി വന് വാഹനാപകടം; ആറ് കുട്ടികളടക്കം 14 മരണം, കാര് പൂര്ണമായും തകര്ന്നു
ലക്നൗ: ഉത്തര്പ്രദേശില് നടന്ന വാഹനാപകടത്തില് ആറ് കുട്ടികളടക്കം 14 മരണം. വ്യാഴാഴ്ച വൈകീട്ടോടെ പ്രതാപ്ഗാര്ഹില് കാറും ലോറിയും കൂട്ടിയിടിച്ചാണ് അപകടം സംഭവിച്ചത്. അപകടത്തില് കാറിലുണ്ടായിരുന്ന മുഴുവന് പേരും മരിച്ചു. നിരവധി പേര്ക്ക് പരിക്കേല്ക്കുകയും ചെയ്തിട്ടുണ്ട്. ദേശരാജ് ഇനാറ ഗ്രാമത്തിന് സമീപമുള്ള പ്രയാഗ്രാജ്-ലഖ്നൗ ഹൈവേയിലാണ് വ്യാഴാഴ്ച രാത്രി 11.45 ഓടെ അപകടമുണ്ടായത്.
അപകടത്തില്പ്പെട്ട മഹീന്ദ്ര ബൊലേറോ പൂര്ണമായും തകര്ന്നിട്ടുണ്ട്. ലോറിയുടെ പുറകുവശത്ത് ഇടിച്ച വാഹനത്തെ വെട്ടിപ്പൊളിച്ചാണ് ആളുകളെ പുറത്തെടുത്തത്. അമിത വേഗത്തിലെത്തിയ ബോലേറൊ ലോറിയുടെ പിറകില് ഇടിക്കുകയായിരുന്നു. വാഹനത്തിന്റെ പകുതിയില് അധികം ഭാഗവും ലോറിയുടെ അടി ഭാഗത്താണ് ഉണ്ടായിരുന്നതെന്ന് പൊലീസ് പറയുന്നു.
Recommended Video
കാറിലുള്ളവര് ഒരു കല്യാണ പാര്ട്ടിയില് പങ്കെടുത്ത് തിരിച്ച് വരുന്നതിനിടെയാണ് അപകടം സംഭവിച്ചത്. കുണ്ട് ജില്ലയിലെ ഒരു ഗ്രാമത്തിലുള്ളവരാണ് മരണപ്പെട്ട മുഴുവന് പേരും. മരണപ്പെട്ടവരുടെ കുടുംബങ്ങള്ക്ക് എല്ലാവിധ സഹായങ്ങളും ലഭ്യമാക്കുമെന്ന് സര്ക്കാര് അറിയിച്ചിട്ടുണ്ട്. ഏഴ് മുതല് 15 വരെ പ്രായമുള്ള ആറ് കുട്ടികളാണ് മരണപ്പെട്ടത്. ബാക്കി എട്ട് പേരും 20 മുതല് 60 വയസ് വരെ പ്രായമുള്ളവരാണ്. പോസ്റ്റ് മോര്ട്ടത്തിന് ശേഷം മൃതദേഹം വെള്ളിയാഴ്ചയോടെ കുടുംബങ്ങള്ക്ക് കൈമാറും.