ക്യാപ്റ്റന്‍ ധോണിക്ക് പെണ്‍കുഞ്ഞ് പിറന്നു

ദില്ലി: ഇന്ത്യന്‍ ക്രിക്കറ്റ് ടീം ക്യാപ്റ്റന്‍ ധോണിയുടെ ഭാര്യ സാക്ഷി ധോണി പ്രസവിച്ചു. ഗുഡ്ഗാവിലെ ഒരു സ്വകാര്യ ആശുപത്രിയില്‍ വെച്ചായിരുന്നു പ്രസവം. പ്രതീക്ഷിച്ച പോലെ ജൂനിയര്‍ മഹി അല്ല, ജൂനിയര്‍ സാക്ഷി ആണ്. പെണ്‍കുഞ്ഞ്. 3.7 കിലോ തൂക്കമുണ്ടെന്ന് ഡോക്ടര്‍മാര്‍ പറഞ്ഞു. അമ്മയും കുഞ്ഞും സുഖമായിരിക്കുന്നു.

എം എസ് ധോണി - സാക്ഷി ധോണി ദമ്പതികളുടെ ആദ്യത്തെ കുഞ്ഞാണ് ഇത്. ഫോര്‍തിസ് ആശുപത്രിയില്‍ വെച്ചാണ് സാക്ഷി പെണ്‍കുഞ്ഞിന് ജന്മം നല്‍കിയത്. 33കാരനായ ധോണി ഇപ്പോള്‍ ലോകകപ്പ് ക്രിക്കറ്റിനുള്ള പരിശീലനത്തില്‍ ഓസ്‌ട്രേലിയയിലാണ്. 15ന് പാകിസ്താനെതിരെയാണ് ഇന്ത്യയുടെ ആദ്യ കളി.

സാക്ഷിയെയും കുഞ്ഞിനെയും കാണാന്‍ ധോണി നാട്ടിലേക്ക് തിരിക്കുന്നുണ്ടോ എന്ന കാര്യത്തില്‍ തീരുമാനമായിട്ടില്ല. പത്ര റിപ്പോര്‍ട്ടുകള്‍ പ്രകാരം സാക്ഷി കഴിഞ്ഞ വര്‍ഷം പ്രസവിക്കേണ്ടതായിരുന്നു. ജൂലൈയില്‍ ജൂനിയര്‍ മഹി ജനിക്കും എന്നായിരുന്നു റിപ്പോര്‍ട്ടുകള്‍. എന്നാല്‍ അതാരോ ഏപ്രില്‍ ഫൂളാക്കിയതാണ് എന്നും താന്‍ ഗര്‍ഭിണിയല്ല എന്നും സാക്ഷി ട്വിറ്ററിലൂടെ പറഞ്ഞിരുന്നു.

ക്യാപ്റ്റന് കൂള് ധോണി ഇനി ഡാഡി കൂള്?

ധോണി ഓസ്‌ട്രേലിയയില്‍ ലോകകപ്പ് കളിക്കാന്‍ പോകുമ്പോഴേക്കും സാക്ഷി പ്രസവിക്കും എന്നായിരുന്നു ഏറ്റവും ഒടുവിലെ റിപ്പോര്‍ട്ട്. സാധാരണ ധോണിക്കൊപ്പം യാത്ര ചെയ്യാറുള്ള സാക്ഷിയെ ഏതാനും മാസങ്ങളായി ഒപ്പം കാണാറില്ലായിരുന്നു. ലോകകപ്പിന് ഓസ്‌ട്രേലിയയിലേക്കും സാക്ഷി പോയില്ല. ഇത്തവണ റിപ്പോര്‍ട്ടുകള്‍ സത്യമാണ് എന്ന് അപ്പോള്‍ത്തന്നെ ഏകദേശം ഉറപ്പായിരുന്നു.

English summary

Just a week ahead of the cricket World Cup, India skipper Mahendra Singh Dhoni today became a father after his wife Sakshi gave birth to a baby girl at a private hospital here.