1.86 ലക്ഷം പേർക്കുകൂടി കോവിഡ്; 44 ദിവസത്തിനിടയിലെ ഏറ്റവും താഴ്ന്ന പ്രതിദിന നിരക്ക്

ഇതുവരെ 2,75,55,457 പേർക്കാണ് രാജ്യത്ത് കോവിഡ് സ്ഥിരീകരിച്ചത്

ന്യൂഡൽഹി: രാജ്യത്ത് കോവിഡ് ബാധിതരുടെ എണ്ണം താഴേക്കെന്ന് കേന്ദ്ര ആരോഗ്യ മന്ത്രാലയത്തിന്റെ ഏറ്റവും പുതിയ റിപ്പോർട്ട്. കഴിഞ്ഞ 24 മണിക്കൂറിൽ 1,86,364 കോവിഡ് സ്ഥിരീകരിച്ചത്. കഴിഞ്ഞ 44 ദിവസത്തിനിടയിലെ ഏറ്റവും താഴ്ന്ന പ്രതിദിന നിരക്കാണിത്. അതേസമയം 2,59,459 പേർ രോഗമുക്തി നേടുകയും ചെയ്തു. കോവിഡ് മൂലം 3660 മരണംകൂടി സ്ഥിരീകരിച്ചു.

ഇതുവരെ 2,75,55,457 പേർക്കാണ് രാജ്യത്ത് കോവിഡ് സ്ഥിരീകരിച്ചത്. ഇതിൽ 2,48,93,410 പേർ രോഗമുക്തി നേടിയപ്പോൾ 3,18,895 പേർക്ക് കോവിഡ് മൂലം ജീവൻ നഷ്ടമായി. നിലവിൽ രാജ്യത്തിന്റെ വിവിധ ഭാഗങ്ങളിലായി 23,43,152 പേരാണ് ചികിത്സയിൽ കഴിയുന്നത്. 20,57,20,660 പേർക്കാണ് ഇതുവരെ കോവിഡ് വാക്സിൻ വിതരണം ചെയ്തത്.

കോവിഡ് നിരക്ക് താഴേക്ക് വരുന്നതായാണ് കഴിഞ്ഞ കുറച്ച് ദിവസങ്ങളിലെ കണക്കുകൾ വ്യക്തമാക്കുന്നത്. ഇന്ന് ടെസ്റ്റ് പോസിറ്റിവിറ്റി നിരക്ക് 9 ശതമാനമാണ്. കഴിഞ്ഞ നാല് ദിവസവും പത്തിൽ താഴെയായിരുന്നു ടെസ്റ്റ് പോസിറ്റിവിറ്റി നിരക്ക്. ആഴ്ചയിലെ കണക്ക് പരിശോധിച്ചാൽ 10.42 ശതമാനമാണ്.

ലോകത്ത് കോവിഡ് ബാധിതരുടെ എണ്ണം കുതിച്ചുയരുന്നു. കഴിഞ്ഞ 24 മണിക്കൂറിനിടെ അഞ്ചര ലക്ഷത്തിലധികം കേസുകളാണ് റിപ്പോർട്ട് ചെയ്‌തത്. ഇതോടെ ആകെ രോഗബാധിതരുടെ എണ്ണം പതിനാറ് കോടി തൊണ്ണൂറ്റിയാറ് ലക്ഷം പിന്നിട്ടു. മരണസംഖ്യ 35.24 ലക്ഷമായി ഉയർന്നു. രോഗമുക്തി നേടിയവരുടെ എണ്ണം പതിനഞ്ച് കോടി എഴുപത് ലക്ഷം കടന്നു.

English summary

India covid numbers 1,86,364 new cases reported on May 28 TPR also falls down