ചൈനയെയും പാകിസ്താനെയും തളയ്ക്കണം; ഇന്ത്യ ആണവായുധങ്ങൾ കൂട്ടുന്നു; പുതിയ കണക്കുകൾ പുറത്ത്

ആഗോളതലത്തിൽ ആണവായുധ കിടമത്സരം പുതിയൊരു തലത്തിലേക്ക് കടക്കുന്നതായി പ്രമുഖ അന്താരാഷ്ട്ര ഗവേഷണ സ്ഥാപനമായ സ്റ്റോക്ക്ഹോം ഇന്റർനാഷണൽ പീസ് റിസർച്ച് ഇൻസ്റ്റിറ്റ്യൂട്ടിന്റെ (SIPRI) ഏറ്റവും പുതിയ റിപ്പോർട്ട് വ്യക്തമാക്കുന്നു. തങ്ങളുടെ തന്ത്രപ്രധാനമായ പ്രതിരോധ സംവിധാനങ്ങൾ ആധുനികവൽക്കരിക്കുന്നതിന്റെ ഭാഗമായി ഇന്ത്യ ആണവായുധങ്ങളുടെ എണ്ണം വർദ്ധിപ്പിച്ചതായാണ് 'സിപ്രി ഇയർബുക്ക് 2026' വ്യക്തമാക്കുന്നത്. കഴിഞ്ഞ വർഷത്തെ കണക്കുകളിൽ നിന്ന് വ്യത്യസ്തമായി ഇന്ത്യയുടെ ആണവായുധങ്ങളുടെ എണ്ണം 180-ൽ നിന്ന് 190 ആയി ഉയർന്നു.

പശ്ചിമേഷ്യയിലും ഏഷ്യയിലാകെയും വർദ്ധിച്ചുവരുന്ന സുരക്ഷാ വെല്ലുവിളികളും ചൈന, പാകിസ്താൻ എന്നീ അയൽരാജ്യങ്ങളുമായുള്ള തന്ത്രപരമായ മത്സരവുമാണ് പ്രതിരോധ രംഗത്ത് കൂടുതൽ കരുത്താർജ്ജിക്കാൻ ഇന്ത്യയെ പ്രേരിപ്പിക്കുന്നത്.

ലോകം പുതിയ ആണവ യുഗത്തിലേക്ക്; ആശങ്ക

ലോകത്ത് നിലവിൽ ആണവായുധങ്ങളുള്ള ഒൻപത് രാജ്യങ്ങളാണ് ഉള്ളത്. അമേരിക്ക, റഷ്യ, ബ്രിട്ടൻ, ഫ്രാൻസ്, ചൈന, ഇന്ത്യ, പാകിസ്താൻ, ഉത്തരകൊറിയ, ഇസ്രായേൽ എന്നിവരാണവർ. ശീതയുദ്ധ കാലത്തിന് ശേഷം ആഗോളതലത്തിൽ ആണവായുധങ്ങളുടെ എണ്ണം കുറയുന്ന പ്രതിഭാസത്തിന് ഇപ്പോൾ മങ്ങലേറ്റിരിക്കുകയാണ്. രാജ്യങ്ങൾ തങ്ങളുടെ ആയുധങ്ങൾ നവീകരിക്കുന്നതിലേക്ക് തിരിഞ്ഞതോടെ ലോകത്ത് വീണ്ടുമൊരു ആണവ മത്സരം ആരംഭിച്ചതായി സിപ്രി ഡയറക്ടർ കരിം ഹഗ്ഗാഗ് മുന്നറിയിപ്പ് നൽകുന്നു.

2026 ജനുവരിയിലെ കണക്കനുസരിച്ച് ലോകത്താകെ 12,187 ആണവായുധങ്ങളുണ്ട്. ഇതിൽ 9,745 എണ്ണം ഏതുസമയത്തും ഉപയോഗിക്കാവുന്ന രീതിയിൽ സൈനിക സംഭരണശാലകളിൽ സൂക്ഷിച്ചിരിക്കുകയാണ്. ഏകദേശം 4,012 ആണവായുധങ്ങൾ മിസൈലുകളിലും വിമാനങ്ങളിലും ഇതിനകം ഘടിപ്പിച്ചു കഴിഞ്ഞു. ഇതിൽ തന്നെ 2,100 നും 2,200 നും ഇടയിൽ ആണവായുധങ്ങൾ അതിവേഗ ആക്രമണത്തിന് സജ്ജമായി ഉയർന്ന നിരീക്ഷണത്തിലാണ്.

ഇന്ത്യയുടെ പ്രധാന ലക്ഷ്യം ചൈനയോ?

ഇന്ത്യയുടെ ആണവ ആധുനികവൽക്കരണ പദ്ധതികൾ ഇപ്പോൾ പ്രധാനമായും ചൈനയെ പ്രതിരോധിക്കുന്നതിലേക്ക് കേന്ദ്രീകരിച്ചിരിക്കുകയാണെന്ന് റിപ്പോർട്ട് വിലയിരുത്തുന്നു. ബെയ്ജിങ്ങിന്റെ വർദ്ധിച്ചുവരുന്ന സൈനിക ശേഷിയും അതിവേഗം വളരുന്ന ആണവ ശേഖരവുമാണ് ഇതിന് കാരണം. നിലവിൽ ഒൻപത് ആണവ രാജ്യങ്ങളിൽ ഏറ്റവും വേഗത്തിൽ ആയുധങ്ങൾ വർദ്ധിപ്പിക്കുന്നത് ചൈനയാണ്. ചൈനയുടെ കൈവശം ഇപ്പോൾ 620 ആണവായുധങ്ങൾ ഉണ്ടെന്നാണ് കണക്കാക്കുന്നത്.

ഈ സാഹചര്യത്തിലാണ് ഇന്ത്യ തങ്ങളുടെ 'ന്യൂക്ലിയർ ട്രയാഡ്' (കര, വ്യോമ, കടൽ മാർഗ്ഗങ്ങളിലൂടെയുള്ള ആണവാക്രമണ ശേഷി) ശക്തമാക്കുന്നത്. ഇന്ത്യ ഇപ്പോഴും 'ആദ്യം ആക്രമിക്കില്ല' (No First Use) എന്ന നയത്തിൽ ഉറച്ചുനിൽക്കുന്നുണ്ടെങ്കിലും, ശത്രുരാജ്യങ്ങളുടെ ഭാഗത്തുനിന്ന് ആക്രമണമുണ്ടായാൽ തിരിച്ചുപിടിക്കാൻ ശേഷിയുള്ള 'സെക്കൻഡ് സ്ട്രൈക്ക്' ഉറപ്പാക്കാനാണ് മുൻഗണന നൽകുന്നത്.

എംആർഐവി(MIRV) സാങ്കേതികവിദ്യയും അത്യാധുനിക മിസൈലുകളും

ഇന്ത്യൻ പ്രതിരോധ രംഗത്തെ ഏറ്റവും വലിയ കുതിച്ചുചാട്ടം എംആർഐവി (Multiple Independently Targetable Re-entry Vehicles) സാങ്കേതികവിദ്യയുടെ വികസനമാണ്. ഒരു മിസൈലിൽ തന്നെ ഒന്നിലധികം ആണവായുധങ്ങൾ ഘടിപ്പിച്ച്, അവയെ വ്യത്യസ്ത ലക്ഷ്യസ്ഥാനങ്ങളിലേക്ക് ഒരേസമയം തൊടുത്തുവിടാൻ ഈ സാങ്കേതികവിദ്യയിലൂടെ സാധിക്കും. ശത്രുവിന്റെ മിസൈൽ പ്രതിരോധ സംവിധാനങ്ങളെ തകർക്കാൻ ഇത് ഇന്ത്യയെ സഹായിക്കും.

ഇതോടൊപ്പം തന്നെ കാനിസ്റ്ററുകളിൽ സൂക്ഷിക്കാവുന്ന മിസൈലുകളും ഇന്ത്യ വികസിപ്പിച്ചിട്ടുണ്ട്. പ്രിഥ്വി-2, അഗ്നി-1, മീഡിയം റേഞ്ച് മിസൈലുകളായ അഗ്നി-2, അഗ്നി-3, ദീർഘദൂര മിസൈലുകളായ അഗ്നി-4, അഗ്നി-5 എന്നിവയാണ് ഇന്ത്യയുടെ കരുത്ത്. ഇതിൽ പുതിയ 'അഗ്നി-പി' മിസൈൽ കൂടുതൽ കൃത്യതയാർന്ന ആക്രമണത്തിന് സഹായിക്കുന്നതാണ്.

കടലിലെ കരുത്തായി മാറിയ ഐഎൻഎസ് അരിഹന്ത്
ആണവാക്രമണമുണ്ടായാൽ ഏറ്റവും സുരക്ഷിതമായി തിരിച്ചടിക്കാൻ സാധിക്കുന്നത് കടലിനടിയിലുള്ള അന്തർവാഹിനികൾക്കാണ്. ഇന്ത്യയുടെ ആണവോർജ്ജത്തിൽ പ്രവർത്തിക്കുന്ന സബ്‌മറൈനായ ഐഎൻഎസ് അരിഹന്ത് ആണ് ഈ സുരക്ഷ ഉറപ്പാക്കുന്നത്. സമാധാനകാലത്ത് പോലും ഇത്തരം അന്തർവാഹിനികളിൽ ഇന്ത്യ ആണവായുധങ്ങൾ സജ്ജമാക്കി നിർത്താറുണ്ടെന്ന് സിപ്രി നിരീക്ഷിക്കുന്നു. കെ-15, കെ-4 തുടങ്ങിയ സബ്‌മറൈൻ ലോഞ്ച്ഡ് ബാലിസ്റ്റിക് മിസൈലുകൾ കടലിൽ നിന്നുള്ള ഇന്ത്യയുടെ ആക്രമണ ശേഷി ഇരട്ടിയാക്കുന്നു.

പാകിസ്താന്റെ ഭീഷണി

ചൈനയെ ലക്ഷ്യമിടുമ്പോഴും പാകിസ്താൻ ഇന്ത്യയുടെ തന്ത്രപ്രധാനമായ ആസൂത്രണങ്ങളിൽ പ്രധാന പങ്കുവഹിക്കുന്നുണ്ട്. പാകിസ്താന്റെ കൈവശം നിലവിൽ 170 ആണവായുധങ്ങൾ ഉണ്ടെന്നാണ് കണക്കാക്കുന്നത്. ഇന്ത്യയുടെ കരസേനാ മേധാവിത്വത്തെ പ്രതിരോധിക്കാൻ ചെറിയ തരം തന്ത്രപരമായ ആണവായുധങ്ങളിലാണ് പാകിസ്താൻ കൂടുതൽ ശ്രദ്ധ കേന്ദ്രീകരിക്കുന്നത്.

2025 മെയ് മാസത്തിൽ ഇന്ത്യയും പാകിസ്താനും തമ്മിലുണ്ടായ ചുരുങ്ങിയ ദിവസത്തെ സായുധ സംഘർഷത്തെക്കുറിച്ചും സിപ്രി റിപ്പോർട്ടിൽ പരാമർശമുണ്ട്. പാകിസ്താന്റെ ആണവ നിലയങ്ങളെന്ന് സംശയിക്കുന്ന ചില കേന്ദ്രങ്ങൾക്ക് നേരെ ഇന്ത്യ ആക്രമണം നടത്തിയിരുന്നുവെങ്കിലും, ഇരുരാജ്യങ്ങളും സ്ഥിതിഗതികൾ കൂടുതൽ വഷളാകാതെ നിയന്ത്രിക്കാൻ ശ്രദ്ധിച്ചുവെന്ന് റിപ്പോർട്ട് വ്യക്തമാക്കുന്നു.

ആഗോളതലത്തിൽ ആണവ നിയന്ത്രണ കരാറുകൾ പരാജയപ്പെടുന്നതും സുതാര്യത കുറയുന്നതും വരും വർഷങ്ങളിൽ വലിയൊരു ആയുധ മത്സരത്തിന് വഴിതുറക്കുമെന്ന ആശങ്കയോടെയാണ് സിപ്രി റിപ്പോർട്ട് അവസാനിക്കുന്നത്. എന്നാൽ മാറുന്ന ആഗോള രാഷ്ട്രീയ സാഹചര്യത്തിൽ സ്വന്തം രാജ്യത്തിന്റെ സുരക്ഷ ഉറപ്പാക്കാൻ ഇന്ത്യ ഇനിയും പ്രതിരോധ രംഗത്ത് കൂടുതൽ മുന്നേറ്റങ്ങൾ നടത്തുമെന്നുറപ്പാണ്.