ഇന്ത്യ പാകിസ്ഥാനെ ആക്രമിക്കുമെന്ന് ജ്യോതിഷ പ്രവചനം! തീയതി ഇതാ

പശ്ചിമേഷ്യയിലെ യുദ്ധസാഹചര്യങ്ങളിൽ ലോകം ഭീതിയിലായിരിക്കെ, ഇന്ത്യയും പാകിസ്ഥാനും തമ്മിലുള്ള സൈനിക നീക്കങ്ങളെക്കുറിച്ച് ഒരു ജ്യോത്സ്യൻ നടത്തിയ പ്രവചനം ഇപ്പോൾ സോഷ്യൽ മീഡിയയിൽ വലിയ ചർച്ചകൾക്ക് വഴിതുറന്നിരിക്കുകയാണ്. വരാനിരിക്കുന്ന ഒരു പ്രത്യേക തീയതിയിൽ ഇന്ത്യ പാകിസ്ഥാനെതിരെ ശക്തമായ സൈനിക ആക്രമണം നടത്തുമെന്നാണ് വേദ ജ്യോതിഷിയും വാസ്തു വിദഗ്ദ്ധയുമെന്ന് സ്വയം പരിചയപ്പെടുത്തിയ ആചാര്യ റീന ശർമ്മ എന്ന സ്ത്രീ പ്രവചിക്കുന്നത്. ഗ്രിഗോറിയൻ കലണ്ടറിലെ ഗ്രഹനിലകളും ഇന്ത്യയുടെ ജാതകവും വിശകലനം ചെയ്താണ് ഈ കൃത്യമായ തീയതി പ്രഖ്യാപിച്ചിരിക്കുന്നത്.

പ്രവചനത്തിന് പിന്നിലെ ജ്യോതിഷം

ഗ്രഹനിലകളും മതപരമായ കലണ്ടറുകളും ആസ്പദമാക്കിയാണ് താൻ ഈ തീയതി പ്രവചിച്ചതെന്ന് ഇവർ വീഡിയോയിൽ പറയുന്നു. മാർച്ച് 19-ന് നവരാത്രി ആരംഭിക്കുമെന്നും അതിന് പിന്നാലെ വരുന്ന മാർച്ച് 21 'രിക്ത തിഥി'യിലാണെന്നും ഇവർ ചൂണ്ടിക്കാട്ടുന്നു. ജ്യോതിഷ പ്രകാരം രിക്ത തിഥികൾ പലപ്പോഴും ശുഭകരമായി കണക്കാക്കാറില്ല. അതിനാൽ 2026 മാർച്ച് 21-ന് ഇന്ത്യ പാകിസ്ഥാനെ ആക്രമിക്കുമെന്നാണ് സ്വയം പ്രഖ്യാപിത വേദ ജ്യോതിഷിയായ റീന ശർമ്മ അവകാശപ്പെടുന്നത്.

കൂടാതെ, ഗ്രഹനിലയിലെ സങ്കീർണ്ണമായ മാറ്റങ്ങളും യുദ്ധത്തിന് കാരണമാകുമെന്ന് ഇവർ വാദിക്കുന്നു. ജാതകത്തിലെ നാലാം ഭാവത്തിൽ ബുധൻ, രാഹു, ചൊവ്വ എന്നിവയുടെ സംയോജനത്തിലൂടെ രൂപപ്പെടുന്ന 'അംഗാരക യോഗം' വലിയ തോതിലുള്ള അക്രമങ്ങൾക്കും തടസ്സങ്ങൾക്കും വഴിതെളിക്കുമെന്നാണ് ഇവരുടെ പക്ഷം. അഞ്ചാം ഭാവത്തിൽ സൂര്യൻ, ശനി, നെപ്ട്യൂൺ, ശുക്രൻ എന്നിവ ഒരേസമയം വരുന്നത് രാഷ്ട്രീയവും സൈനികവുമായ വലിയ നീക്കങ്ങൾക്ക് കാരണമാകും എന്നും ഈ പ്രവചനത്തിന് ആധാരമായി ഇവർ വീഡിയോയിൽ പറയുന്നു.

മുൻകരുതലുകൾ എടുക്കാൻ നിർദ്ദേശം

സാധ്യമായ യുദ്ധ സാഹചര്യം കണക്കിലെടുത്ത് ജനങ്ങൾ മുൻകരുതലുകൾ എടുക്കണമെന്ന് റീന ശർമ്മ വീഡിയോയിലൂടെ ആവശ്യപ്പെടുന്നുണ്ട്. വരാനിരിക്കുന്ന ബുദ്ധിമുട്ടുകൾ നേരിടാൻ കൈയ്യിൽ പണം, അത്യാവശ്യ മരുന്നുകൾ, ഒന്നോ രണ്ടോ മാസത്തേക്കുള്ള ഭക്ഷണ സാധനങ്ങൾ, സോളാർ ഫോൺ ചാർജറുകൾ എന്നിവ കരുതിവെക്കാൻ ഇവർ ഉപദേശിക്കുന്നു. ഇത്തരമൊരു മുന്നറിയിപ്പ് സോഷ്യൽ മീഡിയയിൽ വലിയ ചർച്ചകൾക്കാണ് വഴിതെളിച്ചിരിക്കുന്നത്.

ജ്യോതിഷിയുടെ ഈ പ്രവചനം വലിയ രീതിയിലുള്ള വിമർശനങ്ങളും ഏറ്റുവാങ്ങുന്നുണ്ട്. നിലവിൽ ലോകം ഒരു യുദ്ധ ഭീതിയിൽ നിൽക്കുമ്പോൾ, അടിസ്ഥാനരഹിതമായ കാര്യങ്ങൾ പറഞ്ഞ് ജനങ്ങളിൽ ഭീതി പടർത്തുകയാണ് ഇത്തരം പ്രവചനങ്ങൾ എന്ന് പലരും സോഷ്യൽ മീഡിയയിൽ കുറിച്ചു. ശ്രദ്ധ പിടിച്ചുപറ്റാനുള്ള തന്ത്രമാണിതെന്നും ഇതിനെതിരെ ജാഗ്രത പാലിക്കണമെന്നും ഭൂരിഭാഗം ആളുകളും അഭിപ്രായപ്പെടുന്നു. എന്നിരുന്നാലും, വീഡിയോ ഇതിനോടകം തന്നെ പതിനായിരക്കണക്കിന് ആളുകൾ കണ്ടുകഴിഞ്ഞു.