നാവികസേനയ്ക്ക് 26 റഫാല് യുദ്ധ വിമാനങ്ങള്; ഫ്രാന്സുമായി 63000 കോടി രൂപയുടെ കരാറിന് ഇന്ത്യ
ന്യൂഡല്ഹി: ഫ്രാന്സില് നിന്ന് റഫാല് യുദ്ധ വിമാനങ്ങള് വാങ്ങാനുള്ള കരാറിന് അനുമതി നല്കി കേന്ദ്ര സര്ക്കാര്. 63000 കോടി രൂപയുടെ കരാറില് നാവികസേനയ്ക്കായി 26 റഫാല് എം യുദ്ധവിമാനങ്ങള് വാങ്ങാനാണ് പദ്ധതി. രാജ്യത്തെ നാവിക സേനയ്ക്കുള്ള ആദ്യത്തെ പ്രധാന യുദ്ധവിമാന നവീകരണമാണിത്. 2023 ജൂലൈയില് പ്രതിരോധ മന്ത്രാലയം ഫ്രഞ്ച് പ്രതിരോധ മന്ത്രാലയവുമായി ബന്ധപ്പെട്ട് നടത്തിയ നീക്കമാണ് ഫലം കാണുന്നത്.
ഫ്ലീറ്റ് അറ്റകുറ്റപ്പണി, ലോജിസ്റ്റിക്കല് സപ്പോര്ട്ട്, പേഴ്സണല് പരിശീലനം, ഓഫ്സെറ്റ് ബാധ്യതകള്ക്ക് കീഴിലുള്ള ഘടകങ്ങളുടെ തദ്ദേശീയ നിര്മ്മാണം എന്നിവയ്ക്കുള്ള സമഗ്ര പാക്കേജും കരാറില് ഉള്പ്പെടും. ഈ മാസം അവസാനം ഫ്രഞ്ച് പ്രതിരോധ മന്ത്രി സെബാസ്റ്റ്യന് ലെകോര്നു ഇന്ത്യ സന്ദര്ശിക്കുമ്പോള് കരാറുകളില് ഒപ്പുവെക്കും. കരാര് സ്ഥിരീകരിച്ച് അഞ്ച് വര്ഷത്തിന് ശേഷം ഡെലിവറികള് പ്രതീക്ഷിക്കുന്നതായി വൃത്തങ്ങള് അറിയിച്ചു.
ലോകത്തിലെ ഏറ്റവും നൂതനമായ നാവിക യുദ്ധവിമാനങ്ങളില് ഒന്നായാണ് റഫാല് എം കണക്കാക്കപ്പെടുന്നത്. കാരിയര്-അനുയോജ്യമായ വിമാനങ്ങള്ക്ക് ഏറ്റവും മികച്ചതായി കണക്കാക്കപ്പെടുന്ന സഫ്രാന് ഗ്രൂപ്പിന്റെ ലാന്ഡിംഗ് ഗിയറുകള് ആണ് ഇതില് സജ്ജീകരിച്ചിരിക്കുന്നത്. കൂടാതെ മടക്കാവുന്ന ചിറകുകള്, കഠിനമായ സാഹചര്യങ്ങള്, ഡെക്ക് ലാന്ഡിംഗ്, ടെയില്ഹുക്കുകള് എന്നിവയെ നേരിടാന് ശക്തിപ്പെടുത്തിയ അണ്ടര്കാരേജുകളും ഇതില് ഉണ്ട്.
ഇന്ത്യന് മഹാസമുദ്ര മേഖലയിലെ ചൈനീസ് പ്രവര്ത്തനങ്ങള് നിരീക്ഷിക്കേണ്ടതിന്റെ ആവശ്യകത കണക്കിലെടുത്ത് സമുദ്ര ആക്രമണ ശേഷി ശക്തിപ്പെടുത്താന് ഇന്ത്യ ശ്രമിക്കുകയാണ്. അതിനാല് റഫാലിന്റെ 22 സിംഗിള് സീറ്റര്, നാല് ട്വിന് സീറ്റര് വകഭേദങ്ങള് എന്നിങ്ങനെയുള്ള ജെറ്റുകള് പ്രധാനമായും തദ്ദേശീയമായി നിര്മ്മിച്ച വിമാനവാഹിനിക്കപ്പലായ ഐഎന്എസ് വിക്രാന്തില് വിന്യസിക്കും.
നാവികസേനയുടെ പുതിയ റഫാല് വിമാനങ്ങള് വ്യോമസേനയുടെ കഴിവുകള് വര്ധിപ്പിക്കാനും സഹായിക്കുംയ ഇതില് 'ബഡ്ഡി-ബഡ്ഡി' ഏരിയല് റീഫ്യുവലിംഗ് സിസ്റ്റം നവീകരിക്കുന്ന സംവിധാനവും ഉള്പ്പെടുന്നത്. അതുവഴി ഇന്ധനം നിറയ്ക്കുന്ന പോഡ് ഘടിപ്പിച്ച ഒരു ജെറ്റിന് മറ്റൊരു ജെറ്റിന്റെ ഇന്ധന ടാങ്കറായി പ്രവര്ത്തിക്കാനും സാധിക്കും. ഇത് സൈനികര്ക്ക് കൂടുതല് നേരം വായുവില് തുടരാന് അനുവദിക്കും.
നേരത്തെ വ്യോമസേനയ്ക്ക് വേണ്ടി 36 റാഫേല് ജെറ്റുകള് ഫ്രാന്സില് നിന്ന് ഇന്ത്യ വാങ്ങിയിരുന്നു. അംബാലയിലെയും ഹാഷിമാരയിലെയും വ്യോമതാവളങ്ങളിലാണ് ഇവ ഇപ്പോഴുള്ളത്. ഇതിന് ശേഷം ഫ്രാന്സുമായി ഇന്ത്യ നടത്തുന്ന രണ്ടാമത്തെ വലിയ കരാറാണിത്.
Click it and Unblock the Notifications
Sign in with Google