വീട്ടുജോലിക്കാരിയെ പീഡിപ്പിച്ചു: ആര്‍മി മേജറിനെതിരെ കേസ്, ഭര്‍ത്താവിന്റെ മരണം ആത്മഹത്യയല്ലെന്ന്

ദില്ലി: വീട്ടുജോലിക്കാരിയെ പീഡിച്ച സൈനികനെതിരെ കേസ്. കോടതി ഉത്തരവിനെ തുടര്‍ന്നാണ് ദില്ലിയിലെ ആര്‍മി മേജറിനെതിരെ ദില്ലി പോലീസ് കേസെടുത്തിട്ടുള്ളത്. തന്നെ പീഡിപ്പിച്ചെന്ന് കാണിച്ച് മേജറിനെതിരെ പരാതി നല്‍കിയ വീട്ടുജോലിക്കാരി ഭര്‍ത്താവിന്റെ ദുരൂഹ മരണത്തിലും ഇദ്ദേഹത്തിന് പങ്കുണ്ടെന്ന് ചൂണ്ടിക്കാണിക്കുകയായിരുന്നു. കുറച്ച് ദിവസം മുമ്പ് മരിച്ച തന്റെ ഭര്‍ത്താവ് ഒരിക്കലും ആത്മഹത്യ ചെയ്യില്ലെന്നും അവര്‍ പരാതിയില്‍ ചൂണ്ടിക്കാണിച്ചിരുന്നു.

സെപ്തംബര്‍ 25നാണ് ആര്‍മി മേജറിനെതിരെ വീട്ടുജോലിക്കാരി പരാതി നല്‍കിയത്. തന്നെ പീഡിപ്പിച്ചതോടെ താന്‍ ഭര്‍തൃവീട്ടിലേത്ത് താമസം മാറ്റിയെങ്കിലും ഭര്‍ത്താവ് മേജറിന്റെ വീട്ടില്‍ തന്നെ താമസിക്കുകയായിരുന്നു. ജൂലൈയില്‍ ഭര്‍ത്താവ് തന്നെ വിളിച്ചെന്നും പിന്നീട് തൂങ്ങിമരിച്ച നിലയിലാണ് കണ്ടെത്തിയത്. തുടര്‍ന്ന് ദില്ലി പോലീസിനെയും കോടതിയെയും സമീപിക്കുകയായിരുന്നു.

ദില്ലി കന്റോണ്‍നമെന്റ് ഏരിയയിലെ വീട്ടില്‍ വെച്ചാണ് മേജര്‍ തന്നെ ലൈംഗിക പീഡനത്തിന് ഇരയാക്കിയതെന്നാണ് പരാതിക്കാരി ചൂണ്ടിക്കാണിക്കുന്നത്. പരാതിക്കാരിയും ഭര്‍ത്താവും മേജറിന്റെ വീട്ടില്‍ വീട്ടുജോലിക്കാരായി ജോലി നോക്കിവരികയായിരുന്നുവെന്നാണ് ചില വൃത്തങ്ങളെ ഉദ്ധരിച്ച് സീ ന്യൂസ് റിപ്പോര്‍ട്ട് ചെയ്യുന്നത്. ജൂലൈ 12ന് ഭര്‍ത്താവിനെ വീട്ടില്‍ നിന്ന് പുറത്തയച്ച ശേഷമാണ് പീ‍ഡ‍ിപ്പിച്ചതെന്നും പരാതിക്കാരി പറയുന്നു. പിന്നീടും മേജറില്‍ നിന്ന് പീഡനം നേരിട്ടെന്നും പരാതിയില്‍ പറയുന്നു. തന്നെയും ഭര്‍ത്താവിനെയും സ്ഥിരമായി മേജര്‍ മര്‍ദിക്കാറുണ്ടെന്നും പരാതിക്കാരി ആരോപിക്കുന്നു.

English summary

Indian Army officer charged with molesting domestic help, abetting husband’s suicide