വന്ദേഭാരതിന് ചെങ്ങന്നൂരിൽ സ്റ്റോപ്പ് അനുവദിച്ചു, റെയിൽവേ മന്ത്രിക്ക് നന്ദി പറഞ്ഞ് വി. മുരളീധരൻ

ന്യൂഡൽഹി : കാസർകോട്- തിരുവനന്തപുരം റൂട്ടിൽ സർവ്വീസ് നടത്തുന്ന വന്ദേഭാരത് എക്സ്പ്രസിന് (20633/20634) ചെങ്ങന്നൂരിൽ സ്റ്റോപ്പ് അനുവദിച്ചു. ചെങ്ങന്നൂരിൽ സ്റ്റോപ്പ് അനുവദിച്ചു കൊണ്ടുള്ള റെയിൽവേ മന്ത്രാലയത്തിന്റെ ഉത്തരവും പുറത്തിറക്കിയിട്ടുണ്ട്.

കേന്ദ്രമന്ത്രി വി. മുരളീധരന്റെ ഇടപെടലിനെത്തുടർന്നാണ് ചെങ്ങന്നൂരിൽ പുതിയ സ്റ്റോപ്പ് അനുവദിച്ചത്. ചെങ്ങന്നൂരിൽ വന്ദേഭആരതിന് സ്റ്റോപ്പ് അനുവദിക്കണമെന്ന ആവശ്യം ചൂണ്ടിക്കാട്ടി റെയിൽവേ മന്ത്രി അശ്വിനി വൈഷ്ണവിന് , കേന്ദ്രമന്ത്രി വി. മുരളീധരൻ നേരത്തെ കത്ത് അയച്ചിരുന്നു.

തന്റെ സോഷ്യൽ മീഡിയ അക്കൗണ്ടുകളിലൂടെയാണ് വി. മുരളീധരൻ ഇക്കാര്യം പങ്കുവച്ചത്. ഫേസ്ബുക്കിൽ അശ്വിനി വൈഷ്ണവ് ജിയ്ക്ക് നന്ദി എന്ന് കുറിച്ചാണ് മന്ത്രി വിവരം പങ്കു വച്ചത്. വന്ദേഭാരത് എക്സ്പ്രസിന് ചെങ്ങന്നൂർ സ്റ്റോപ് ആയി അനുവദിച്ച റെയിൽവേ മന്ത്രാലയത്തിന്റെ ഉത്തരവിന്റെ പകർപ്പ് എക്സിൽ ട്വീറ്റ് ചെയ്തിട്ടുണ്ട്. ഫേസ്ബുക്ക് കുറിപ്പിന്റെ പൂർണ രൂപം

'ശുഭയാത്ര.
വന്ദേ ഭാരത് ഇനി ചെങ്ങന്നൂരിലും നിർത്തും. കാസർഗോഡ് - തിരുവനന്തപുരം
വന്ദേഭാരത് എക്സ്പ്രസിന് ചെങ്ങന്നൂരിൽ സ്റ്റോപ്പ് അനുവദിച്ച റയിൽവേ മന്ത്രാലയത്തിന് നന്ദി. ആലപ്പുഴ ബിജെപി ജില്ലാ ഘടകം മുന്നോട്ട് വെച്ച നിർദേശം കേന്ദ്രറെയിൽവേ മന്ത്രിയുടെ ശ്രദ്ധയിൽപ്പെടുത്തിയിരുന്നു. തൊട്ടുപിന്നാലെ തന്നെ ഇടപെടൽ നടത്തിയ അശ്വനി വൈഷ്ണവ്ജിയെ സ്നേഹാദരത്തോടെ സ്മരിക്കുന്നു. ശബരിമല തീർത്ഥാടനകാലം കൂടി കണക്കിലെടുത്ത് ഉണ്ടായ അതിവേഗ ഇടപെടലിന് പ്രധാനമന്ത്രി നരേന്ദ്രമോദിജിയോടും നന്ദി അറിയിക്കുന്നു.'

Good News for Devotees of Lord Ayyappa

Thank Hon'ble @RailMinIndia Shri @AshwiniVaishnawJi for considering the request and facilitating Kasaragod - TVPM #VandeBharat stoppage at Chengannur, known as the Gateway of Sabarimala. pic.twitter.com/BRlEJL2Aa0

— V Muraleedharan / വി മുരളീധരൻ (@VMBJP) October 20, 2023

മണ്ഡല കാലമടുക്കുന്നതോടെ ശബരിമല തീർത്ഥാടകർക്കും വന്ദേഭആരതിന്റെ ഈ സൗകര്യം പ്രയോജനപ്പെടുത്താനാകും. വടക്കൻ കേരളത്തിലെ തീർത്ഥാടകർക്കും വടക്കൻ സംസ്ഥാനത്തിൽ നിന്ന് വരുന്ന തീർത്ഥാടകർക്കും ഇതി വഴി മണിക്കൂറുകളുടെ യാത്രാ ബുദ്ധിമുട്ട് കുറയ്ക്കാനാകും. ശബരിമല തീർത്ഥാടകർ ഇറങ്ങേണ്ടുന്നതും ചെങ്ങന്നൂർ റെയിൽവേ സ്റ്റേഷനിലാണ്. 2009 ൽ ആണ് ഇന്ത്യൻ റെയിൽവേ ചെങ്ങന്നൂര്‍ റെയില്‍വെ സ്റ്റേഷനെ ശബരിമലയിലേക്കുള്ള ഗേറ്റ്‌വേ ആയി പ്രഖ്യാപിച്ചത്.

English summary

Indian Railway Added Chengannur as a Stop for VandeBharat ,V Muralidharan Thanked Railway Minister