സ്വർണ്ണവിലയിൽ തകർച്ച ജൂണിലും തുടരുമോ? സ്വർണം ഇപ്പോൾ വാങ്ങുന്നത് മണ്ടത്തരമാണോ? ഇന്ത്യൻ വിപണിയിൽ ആശങ്ക

ന്യൂഡൽഹി: ആഗോള വിപണിയിലെ ചലനങ്ങൾക്ക് പിന്നാലെ ഇന്ത്യൻ വിപണിയിലും സ്വർണ്ണവിലയിൽ വൻ ഇടിവ് രേഖപ്പെടുത്തുകയാണ്. ഇന്ന് പവന് 760 രൂപയാണ് സംസ്ഥാനത്ത് കുറഞ്ഞിരിക്കുന്നത്. ഇതോടെ ഒരു പവൻ സ്വർണത്തിന് വില 111240 രൂപയായി. ആഗോളതലത്തിൽ സ്വർണ്ണവിലയിലുണ്ടായ തകർച്ച ജൂൺ മാസത്തിലും തുടരാൻ സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ.

കഴിഞ്ഞ മൂന്ന് മാസമായി തുടർച്ചയായി അന്താരാഷ്ട്ര വിപണിയിൽ സ്വർണ്ണവില കുറയുകയാണ്. അമേരിക്കയും ഇറാനും തമ്മിലുള്ള സമാധാന ചർച്ചകൾ പരാജയപ്പെട്ടതും ക്രൂഡ് ഓയിൽ വില വർദ്ധനവിനെത്തുടർന്ന് പണപ്പെരുപ്പ ഭീഷണി ഉയർന്നതുമാണ് വിപണിയിൽ പ്രതിഫലിക്കുന്നത്. ഇതോടെ യുഎസ് ഡോളർ കൂടുതൽ കരുത്താർജ്ജിക്കുകയും സുരക്ഷിത നിക്ഷേപമെന്ന നിലയിൽ സ്വർണ്ണത്തിനുള്ള ഡിമാൻഡ് കുറയുകയും ചെയ്തു.

അന്താരാഷ്ട്ര വിപണിയിൽ സ്വർണ്ണവില ഔൺസിന് 4365 ഡോളർ നിരക്കിലാണ് നിലവിൽ വ്യാപാരം നടക്കുന്നത്. ഒരു ആഴ്ചയ്ക്കുള്ളിൽ മാത്രം കോമെക്സ് സ്വർണ്ണ ഫ്യൂച്ചേഴ്സിൽ 227.7 ഡോളറിന്റെ ഇടിവാണ് രേഖപ്പെടുത്തിയത്. സ്വർണ്ണത്തിന് പുറമെ വെള്ളി വിലയിലും വൻ തകർച്ചയുണ്ടായി. വെള്ളി വില ഔൺസിന് 9 ശതമാനത്തോളം ഇടിഞ്ഞ് 69.10 ഡോളറിലെത്തി.

ആഗോള വിപണിയിലെ ഈ തകർച്ച ഇന്ത്യൻ സ്വർണ്ണ വിപണിയിലും വലിയ പ്രതിഫലനമാണ് ഉണ്ടാക്കുന്നത്. മൾട്ടി കമ്മോഡിറ്റി എക്സ്ചേഞ്ചിൽ വെള്ളിയുടെ വില കിലോഗ്രാമിന് 18461 രൂപ ഇടിഞ്ഞ് 2.48 ലക്ഷം രൂപയായി കുറഞ്ഞു.

കേരളം ഉൾപ്പെടെയുള്ള ഇന്ത്യൻ വിപണികളിലും സ്വർണ്ണവിലയിൽ ഈ ഇടിവ് പ്രകടമാണ്. കഴിഞ്ഞ ഏതാനും ആഴ്ചകളായി റെക്കോർഡ് ഉയരത്തിൽ നിന്നിരുന്ന സ്വർണ്ണവിലയിൽ പവന് ആയിരക്കണക്കിന് രൂപയുടെ കുറവാണ് നിലവിലുള്ളത്. വരും ദിവസങ്ങളിൽ അന്താരാഷ്ട്ര വിപണിയിൽ സ്വർണ്ണവില ഔൺസിന് 4400 - 4500 ഡോളറിന് താഴെ തുടരുകയാണെങ്കിൽ ഇന്ത്യൻ വിപണിയിലും വില വീണ്ടും താഴേക്ക് പോകുമെന്നാണ് എൽകെപി സെക്യൂരിറ്റീസ് വ്യക്തമാക്കുന്നത്.

ആഗോളതലത്തിൽ വില ഇടിഞ്ഞിട്ടും ചൈനീസ് സെൻട്രൽ ബാങ്ക് തുടർച്ചയായ 19-ാം മാസവും തങ്ങളുടെ സ്വർണ്ണ ശേഖരം വർദ്ധിപ്പിച്ചിട്ടുണ്ട്. മേയ് മാസത്തെ കണക്കനുസരിച്ച് ചൈനയുടെ സ്വർണ്ണ ശേഖരം 74.96 മില്യൺ ഔൺസായി ഉയർന്നു.

പടിഞ്ഞാറൻ ഏഷ്യയിലെ രാഷ്ട്രീയ സാഹചര്യങ്ങൾ, ക്രൂഡ് ഓയിൽ വിലയിലുണ്ടാകുന്ന മാറ്റങ്ങൾ, വരാനിരിക്കുന്ന യുഎസ് പണപ്പെരുപ്പ കണക്കുകൾ എന്നിവയെ ആശ്രയിച്ചായിരിക്കും ഈ ജൂൺ മാസത്തിൽ സ്വർണ്ണത്തിന്റെ മുന്നോട്ടുള്ള പ്രയാണം. വരും ദിവസങ്ങളിൽ വില ഇനിയും കുറയാൻ സാധ്യതയുള്ളതിനാൽ സാധാരണക്കാരായ ഉപഭോക്താക്കൾക്കും വിവാഹ ആവശ്യങ്ങൾക്കായി സ്വർണ്ണം വാങ്ങാനിരിക്കുന്നവർക്കും ഈ വിലക്കുറവ് വലിയ ആശ്വാസമാണ് നൽകുന്നത്. എന്നാൽ നിക്ഷേപകർ വളരെ ജാഗ്രതയോടെയാണ് വിപണിയെ നിരീക്ഷിക്കുന്നത്.