ഇന്ത്യയെ ആക്രമിക്കാന്‍ ഭീകരര്‍ തയ്യാറെടുക്കുന്നു,തിരിച്ചടിച്ചാല്‍ അന്തിമയുദ്ധമെന്ന് റിപ്പോര്‍ട്ട്

By Sruthi K M

Updated: Wednesday, July 29, 2015, 19:04 [IST]

വാഷിങ്ടണ്‍: ഏത് നിമിഷവും ഇന്ത്യ ആക്രമിക്കപ്പെടാം എന്ന റിപ്പോര്‍ട്ടുകളാണ് പുറത്തുവരുന്നത്. ഇന്ത്യയെ ആക്രമിക്കാന്‍ ഇസ്‌ലാമിക് സ്റ്റേറ്റ് ഭീകരര്‍ തയാറെടുക്കുന്നതായാണ് റിപ്പോര്‍ട്ട്. പാക്കിസ്ഥാനിലേയും അഫ്ഗാനിസ്ഥാനിലേയും താലിബാന്‍ തീവ്രവാദികളുമായി ചേര്‍ന്ന് ഇന്ത്യയ്‌ക്കെതിരെ ആക്രമണം നടത്താനാണ് പദ്ധതിയെന്നാണ് സൂചന.

ഐഎസുമായി ബന്ധപ്പെട്ട് പ്രവര്‍ത്തിക്കുന്ന ഒരു സംഘടനയുടെ ആഭ്യന്തര പ്രവര്‍ത്തന റിപ്പോര്‍ട്ടിലാണ് ഇതുമായി ബന്ധപ്പെട്ട സൂചനയുള്ളത്. പാക്കിസ്ഥാനിലെ താലിബാനുമായി ബന്ധമുള്ള ഒരാളില്‍ നിന്ന് ലഭിച്ച 32 പേജുള്ള ഉറുദ്ദു ഭാഷയില്‍ അച്ചടിച്ച രേഖകളില്‍ നിന്നാണ് ഈ വിവരങ്ങള്‍ ലഭിച്ചത്.

ഇന്ത്യയെ ആക്രമിക്കാനുള്ള പദ്ധതിയുടെ പ്രവര്‍ത്തനങ്ങള്‍ നടന്നു വരികയാണെന്നും ഏത് നിമിഷവും ആക്രമണം ഉണ്ടാകുമെന്നും റിപ്പോര്‍ട്ടിലുണ്ട്. ഇത്തരമൊരു ആക്രമണം യുഎസിനെ പ്രകോപിപ്പിക്കുന്നതിന് സഹായിക്കുമെന്നും റിപ്പോര്‍ട്ടിലുണ്ട്.

അമേരിക്ക തിരിച്ചടിക്കുകയാണെങ്കില്‍ ലോകം മുഴുവനുമുള്ള മുസ്ലീങ്ങള്‍ ഒന്നിക്കുകയും അന്തിമ യുദ്ധം നടത്തുമെന്നും റിപ്പോട്ടില്‍ വ്യക്തമാക്കിയിട്ടുണ്ട്. ഹാര്‍വാര്‍ഡില്‍ നിന്നുള്ള ഒരു പണ്ഡിതനാണ് ഇംഗ്ലീഷിലേക്ക് ഈ റിപ്പോര്‍ട്ട് മൊഴിമാറ്റം ചെയ്തത്. ഇന്ത്യയെ ആക്രമിക്കുന്നതിലൂടെ തങ്ങളുടെ ശക്തി ലോകത്തിന് മുന്നില്‍ തെളിയിക്കാമെന്നാണ് ഐഎസിന്റെ ചിന്തയെന്നും വിദഗ്ധര്‍ പറയുന്നു.