യൂറോപ്യൻ സ്പേസ് ഏജൻസിയുമായി കരാറിൽ ഒപ്പുവെച്ച് ഐഎസ്ആർഒ; ബഹിരാകാശ രം​ഗത്ത് നിർണായകം

ബെം​ഗളൂരു: പുത്തൻ ചുവടുവെപ്പുമായി ഐ എസ് ആർ ഒ. യൂറോപ്യൻ സ്പേസ് ഏജൻസി( ഇ എസ് എ )യുമായി നിർണായക കരാറിൽ ഒപ്പുവെച്ചു. ബഹിരാകാശ രം​ഗത്ത് കൂടുതൽ യോജിച്ചുള്ള പ്രവർത്തനങ്ങൾ ലക്ഷ്യമാക്കിയാണ് കരാർ. ബഹിരാകാശ യാത്രികരുടെ പരിശീലനം, ദൗത്യം നടപ്പാക്കൽ, ​ഗവേഷണ പരീക്ഷണങ്ങൾ എന്നിവയുമായി ബന്ധപ്പെട്ട പ്രവർത്തനങ്ങളിൽ സഹകരണത്തിനാണ് ഇരു ഏജൻസികളും കരാറിൽ ഏർപ്പെട്ടത്.

ഐ എസ് ആർ ഒ ചെയർമാൻ ഡോ എസ് സോമനാഥനും ഇ എസ് എ ഡയറക്ടർ ജനറൽ ഡോ. ജോസഫ് അഷ്ബാച്ചറുമാണ് കരാറിൽ ഒപ്പുവെച്ചത്. മനുഷ്യ ബഹിരാകാശ പര്യവേഷണത്തിലും ​ഗവേഷണത്തിലും സഹകരണ പ്രവർത്തനങ്ങൾക്ക് ഒരു ചട്ടക്കൂട് ഈ കരാർ നൽകുന്നു.

അന്താരാഷ്ട്ര ബഹിരാകാശ നിലയത്തിലെ, യൂറോപ്യൻ സ്പേസ് ഏജൻസിയുടെ സൗകര്യങ്ങൾ ഉപയോ​ഗിച്ച് ബയോ മെഡിക്കൽ ​ഗവേഷണ പരീക്ഷണം, ബഹിരാകാശത്തെ മനുഷ്യന്റെ ആരോ​ഗ്യത്തെക്കുറിച്ചുള്ള പരീക്ഷണം, വിദ്യാഭ്യാസ പരിപാടികൾ എന്നിവയാണ് കരാറിലൂടെ ലക്ഷ്യം

വെയ്ക്കുന്നതെന്ന് ഐ എസ് ആർ ഒ പറഞ്ഞു.

അതേ സമയം വരാനിരിക്കുന്ന ആക്സിയം - 4 ദൗത്യത്തിനായുള്ള സംയുക്ത പ്രവർത്തനങ്ങളുടെ പുരോ​ഗതിയിൽ ഇരു ഏജൻസികളുടെയും നേതൃത്വം സംതൃപ്തി പ്രകടിപ്പിക്കുകയും ഭാവിയിൽ മനുഷ്യ ബഹിരാകാശ മേഖലയിൽ തുടരേണ്ടതിന്റെ ആവശ്യകത വ്യക്തമാക്കുകയും ചെയ്യുന്നു. ഐ എസ് ആർ ഒയുടെ ഭാവി പദ്ധതിയായ തദ്ദേശീയ ബഹിരാകാശ നിലയമായ ഭാരതീയ അന്തരീക്ഷ സ്റ്റേഷന്റെ ( ബി എ എസ് ) വിഭാവനത്തിൽ ഈ പുതിയ സഹകരണം നിർണായകമാകുമെന്നാണ് വിലയിരുത്തുന്നത്.