ജമ്മു കാശ്മീര് മുന് എംഎല്എയുടെ ബന്ധു സുരക്ഷാ ജീവനക്കാരന്റെ തോക്കുമായി രക്ഷപ്പെട്ടു
ശ്രീനഗര്: ജമ്മു കാശ്മീരിലെ മുന് സിപിഐ എംഎല്സിയുടെ സെക്യൂരിറ്റി ജീവനക്കാരന്റെ തോക്ക് കാണാതായി. മുന് എംഎല്സി അബ്ദുള് റഹ്മാന് തുക്രൂവിന്റെ ബന്ധുവാണ് തോക്ക് കവര്ന്നെടുത്തതെന്നാണ് റിപ്പോര്ട്ട്. സൗത്ത് കാശ്മീരിലെ ശോപിയാന് ജില്ലയിലെ തുക്രൂ ഗ്രാമത്തിലാണ് സംഭവം റിപ്പോര്ട്ട് ചെയ്യപ്പെട്ടത്.
വാസിം അഹമ്മദ് ഖാണ്ഡെ എന്നയാളാണ് എകെ 47 തോക്കും 30 തിരകളുടെ മാഗസിനും മോഷ്ടിച്ചതെന്ന് പറയപ്പെടുന്നു. ഇയാള്ക്കുവേണ്ടിയുള്ള തിരച്ചില് ആരംഭിച്ചിട്ടുണ്ട്. റഹ്മാന് തുക്രുവിന്റെ സെക്യൂരിറ്റി ജീവനക്കാരന് അനുവദിച്ച തോക്ക് ആയിരുന്നു ഇത്. തോക്ക് മോഷണം പോകുമ്പോള് സുരക്ഷാ ജീവനക്കാരന് എവിടെയായിരുന്നെന്ന കാര്യം വ്യക്തമല്ല.
സംഭവത്തില് ഡിപ്പാര്ട്ട്മെന്റ്തല അന്വേഷണം ആരംഭിച്ചിട്ടുണ്ട്. സുരക്ഷാ ജീവനക്കാരന്റെ പിടിപ്പുകേടാണ് തോക്ക് നഷ്ടപ്പെടാന് ഇടയാക്കിയതെന്നാണ് സൂചന. സംഭവത്തില് റഹ്മാന് തുക്രൂ ഇതുവരെ പ്രതികരിച്ചിട്ടില്ല. കാശ്മീരില് സംഘര്ഷം നിലനില്ക്കെ തോക്കുമായി ഒരാള് കടന്നുകളഞ്ഞത് സുരക്ഷാ ജീവനക്കാരില് ആശങ്ക സൃഷ്ടിച്ചിട്ടുണ്ട്.
ഇതാദ്യമായല്ല കാശ്മീരില് തോക്കു കവര്ച്ച റിപ്പോര്ട്ട് ചെയ്യപ്പെടുന്നത്. സൗത്ത് കാശ്മീരില് ഇത്തരം സംഭവങ്ങള് നേരത്തെയും റിപ്പോര്ട്ട് ചെയ്തിരുന്നു. ജൂലൈയില് കുല്ഗാം ജില്ലയിലെ ഒരു പോലീസ് സ്റ്റേഷിനില് നിന്നും 39 തോക്കുകളാണ് കവര്ച്ച ചെയ്യപ്പെട്ടത്.