കശ്മീരില്‍ ഏറ്റുമുട്ടല്‍; മൂന്ന് ഭീകരരെ വധിച്ച് സൈന്യം, ഒരു പൊലീസുകാരന് പരിക്ക്

ശ്രീനഗര്‍: ജമ്മു കശ്മീരില്‍ ഭീകരരുമായി സൈന്യം നടത്തിയ ഏറ്റുമുട്ടലില്‍ മൂന്ന് ഭീകരരെ വധിച്ചു. ഒരു പൊലീസുകാരന് പരിക്കേറ്റു. കശ്മീരിലെ കുല്‍ഗാം ആനന്ത്‌നാഗ് എന്നീ ജില്ലകളിലാണ് അക്രമം ഉണ്ടായത്. തെക്കന്‍ കശ്മീരിലെ ജില്ലകളില്‍ ഇന്നലെ വൈകുന്നേരം മുതലാണ് രണ്ട് വ്യത്യസ്ത രീതിയിലുള്ള തീവ്രവാദ വിരുദ്ധ പ്രവര്‍ത്തനങ്ങല്‍ ആരംഭിച്ചുവെന്ന് അധികൃതര്‍ അറിയിച്ചത്. ഒരു പൊലീസുകാരന് പരിക്കേറ്റിട്ടുണ്ടെന്നും അദ്ദേഹത്തെ എത്രയും വേഗത്തില്‍ തന്നെ അടുത്തുള്ള ആശുപത്രിയില്‍ പ്രവേശിപ്പിച്ചിട്ടുണ്ടെന്നും ആനന്ത്‌നാഗിലെ നൗഗാം പൊലീസ് പറഞ്ഞു.

അനന്ത്‌നാഗ് ഏറ്റുമുട്ടലിന് തൊട്ടുപിന്നാലെ, കുല്‍ഗാം ജില്ലയിലെ മിര്‍ഹാമ ഗ്രാമത്തില്‍ ഭീകരരുണ്ടെന്ന കൃത്യമായ വിവരങ്ങള്‍ ലഭിച്ചതിനെത്തുടര്‍ന്ന് കുല്‍ഗാമിലും ഓപ്പറേഷന്‍ ആരംഭിച്ചതെന്ന് ഉദ്യോഗസ്ഥര്‍ പറഞ്ഞു. തിരച്ചില്‍ നടത്തുന്നതിനിടെയാണ് ഭീകരര്‍ വെടിയുതിര്‍ത്തതെന്നും ഉദ്യോഗസ്ഥര്‍ കൂട്ടിചേര്‍ത്തു.
തുടക്കത്തില്‍, ഒരു ഭീകരനെ വധിച്ചതായി കശ്മീര്‍ സോണ്‍ പോലീസ് ട്വീറ്റ് ചെയ്തു, പിന്നീട് വൈകുന്നേരത്തെ ഓപ്പറേഷനില്‍ രണ്ട് ഭീകരരെ കൂടി വധിച്ചതായി സ്ഥിരീകരിക്കുകയായിരുന്നു. ഭീകര സംഘടനയായ ജെയ്ഷെ മുഹമ്മദുമായി (ജെഎം) ബന്ധമുള്ളവരാണ് ഭീകരരെന്ന് കശ്മീര്‍ പോലീസ് ഇന്‍സ്‌പെക്ടര്‍ ജനറല്‍ വിജയ് കുമാര്‍ പറഞ്ഞു.

English summary

jammu kashmir attack 3 terrorists killed and injured one police man