കാശ്മീര്‍; തീവ്രവാദികളുമായുള്ള ഏറ്റമുട്ടലില്‍ കേണല്‍ കൊല്ലപ്പെട്ടു

ശ്രീനഗര്‍: തീവ്രവാദികളുമായുള്ള ഏറ്റുമുട്ടലിനിടെ കാശ്മീരില്‍ കേണല്‍ റാങ്കിലുള്ള സൈനിക ഉദ്യോഗസ്ഥന്‍ കൊല്ലപ്പെട്ടു. കാശ്മീരിലെ കുപ്‌വാരയിലെ നിയന്ത്രണരേഖയ്ക്ക് സമീപം ചൊവ്വാഴ്ചയായിരുന്നു സംഭവം. സംഭവത്തില്‍ ഒരു പോലീസ് ഉദ്യോഗസ്ഥന് പരിക്കേറ്റു. 41 രാഷ്ട്രീയ റൈഫിള്‍സിലെ കേണല്‍ സന്തോഷ് ആണ് കൊല്ലപ്പെട്ടത്.

തീവ്രവാദികള്‍ ഒളിച്ചിരിക്കുന്നതായി വിവരം ലഭിച്ചതിനെ തുടര്‍ന്ന് സന്തോഷിന്റെ നേതൃത്വത്തില്‍ സൈന്യം തിരച്ചില്‍ നടത്തുന്നതിനെടെയായിരുന്നു ആക്രമണമുണ്ടായത്. ഹാജി നാകയിലെ ഫോറസ്റ്റ് ഏരിയയില്‍ ഒളിച്ചിരിക്കുകയായിരുന്ന തീവ്രവാദികള്‍ വെടിവെക്കുകയായിരുന്നെന്ന് സൈനിക വൃത്തങ്ങള്‍ അറിയിച്ചു.

ഗുരുതരമായി പരിക്കേറ്റ സന്തോഷിനെ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പരിക്കേറ്റ പോലീസ് ഉദ്യോഗസ്ഥന്‍ ഇപ്പോഴും ചികിത്സയിലാണ്. ഒടുവില്‍ റിപ്പോര്‍ട്ട് ലഭിക്കുമ്പോഴും സൈന്യം തീവ്രവാദികളുമായി ഏറ്റുമുട്ടുകയാണെന്നാണ് വിവരം. കൂടുതല്‍ പേരെ സ്ഥലത്തേക്കയച്ചിട്ടുണ്ടെന്ന് സൈനിക ഉദ്യോഗസ്ഥര്‍ വ്യക്തമാക്കി.

നവംബര്‍ 13ന് ആരംഭിച്ച പ്രത്യേക ഓപ്പറേഷന്റെ ഭാഗമായാണ് തീവ്രവാദികള്‍ക്കായി സൈന്യവും പോലീസും സംയുക്തമായി തിരച്ചില്‍ ആരംഭിച്ചത്. ആദ്യദിവസം ഒരു ആര്‍മി ജവാന് പരിക്കേറ്റിരുന്നു. സൈന്യത്തിന്റെ തിരച്ചില്‍ തുടങ്ങിയതോടെ തീവ്രവാദികള്‍ കാട്ടിലേക്ക് രക്ഷപ്പെടുകയായിരുന്നു. ഇവരെ പിന്തുടര്‍ന്നാണ് സന്തോഷിന്റെ നേതൃത്വത്തിലുള്ള സംഘം തിരച്ചിലിനെത്തിയത്.

English summary

Jammu and Kashmir; Militants kill army colonel in Kupwara encounter