ജനതാപാര്ട്ടികളുടെ ഒന്നാകല്; പ്രതീക്ഷയോടെ എല്ഡിഎഫും യുഡിഎഫും
ദില്ലി: ആറു ജനതാപാര്ട്ടികള് ലയിച്ച് ഒന്നാകാന് തീരുമാനിച്ചതോടെ കേരളത്തിലെ ഇരുമുന്നണികളിലായി നില്ക്കുന്ന ജെ.ഡി.യു, ജനതാദള് എസ് പാര്ട്ടികള് തൃശങ്കുവിലായി. ഒറ്റ പാര്ട്ടിയായികഴിഞ്ഞ സ്ഥിതിക്ക് ഇരുമുന്നണികളിലായി തുടരാനാകില്ലെന്നതാണ് നേതാക്കളെ വലയ്ക്കുന്നത്. ഇതുസംബന്ധിച്ച് തീരുമാനമെടുക്കാന് മുതിര്ന്ന നേതാക്കള് ചര്ച്ചകള് തുടങ്ങിക്കഴിഞ്ഞതായാണ് വിവരം.
നിലവില് ജെ.ഡി.യു യു.ഡി.എഫിലും ജനതാദള് എസ് എല്.ഡി.എഫിനൊപ്പവുമാണ്. ലോക്സഭാ തെരഞ്ഞെടുപ്പിലെ സീറ്റു തര്ക്കവുമായി ബന്ധപ്പെട്ടാണ് ജെഡിയും എല്ഡിഎഫില് നിന്നും യുഡിഎഫിലേക്ക് മാറിയത്. അടുത്തിടെ പാര്ട്ടി ഇടതുപക്ഷത്തേക്കു തിരിച്ചുവരികയാണെന്ന അഭ്യൂഹങ്ങള് ശക്തമായിരുന്നു. അതിനിടയിലാണ് ദേശീയ തലത്തില് പാര്ട്ടികള് ഒന്നായത്.
യുഡിഎഫിലേക്ക് പോകുന്ന പ്രശ്നമുദിക്കുന്നില്ലെന്ന് ജെഡിയു നേതാവ് മാത്യു ടി തോമസ് കഴിഞ്ഞദിവസം വ്യക്തമാക്കിയിരുന്നു. അതേസമയം, ജനതാദള് എസ് ഇക്കാര്യത്തില് തീരുമാനം അറിയിച്ചിട്ടില്ല. കേരളത്തിലെ സ്ഥിതിയില് തീരുമാനമുണ്ടാക്കുന്നതിനായി അഞ്ചംഗ സമിതിയെ നിര്ദ്ദേശിച്ചതായി മുലായംസിങ് യാദവ് അറിയിച്ചിട്ടുണ്ട്. പഞ്ചായത്ത് നിയമസഭാ തെരഞ്ഞെടുപ്പ് അടുത്തിരിക്കെ ജനതാ പാര്ട്ടികളുടെ തീരുമാനം ഇരു മുന്നണികള്ക്കും നിര്ണായകമാണ്.
കഴിഞ്ഞദിവസം മുലായം സിങ് യാദവിന്റെ വസതിയില് ചേര്ന്ന യോഗമാണ് ജനതാപാര്ട്ടിയില് നിന്നും വിഘടിച്ചുപോയ സമാജ്വാദി പാര്ട്ടി, ജെ.ഡി.യു, ജനതാദള് എസ്, ആര്.ജെ.ഡി, സമാജ്വാദി ജനത, ലോക്ദള് എന്നീ പാര്ട്ടികള് ഒറ്റ പാര്ട്ടിയായി ലയിക്കാന് തീരുമാനിച്ചത്. പാര്ട്ടിയുടെ പേരും ചിഹ്നവും അടുത്ത ദിവസം തന്നെ പ്രഖ്യാപിക്കാനും തീരുമാനമായി.