ജയനഗറില് ഇന്ന് വിധിയെഴുത്ത്: സീറ്റ് നിലനിര്ത്താന് ബിജെപി, സഹതാപ തരംഗം പാര്ട്ടിയെ തുണയ്ക്കും!!
ബെംഗളൂരു: കര്ണാടകത്തിലെ മന്ത്രിസഭ രൂപീകരണത്തിന്റെ പേരില് കോണ്ഗ്രസിലും ജെഡിഎസിലും അസ്വസ്ഥതകള് തുടരുന്നതിനിടെ ജയനഗറില് ഉപതെരഞ്ഞെടുപ്പ്. സിറ്റിങ് എംഎല്എ ആയിരുന്ന ബിജെപി സ്ഥാനാര്ത്ഥി ബിഎന് വിജയകുമാറിന്റെ നിര്യാണത്തെ തുടര്ന്നായിരുന്നു മെയ് 12ന് നടക്കാനിരുന്ന നിയമസഭാ തിരഞ്ഞെടുപ്പ് മാറ്റിവെച്ചത്. ഇതോടെയാണ് ഈ മണ്ഡലത്തില് ഉപതിരഞ്ഞെടുപ്പ് പ്രഖ്യാപിച്ചത്.
മരിച്ച ബിജെപി സ്ഥാനാര്ത്ഥി വിജയകുമാറിന്റെ സഹോദരന് ബിഎന് പ്രഹ്ലാദാണ് ബിജെപി സ്ഥാനര്ത്ഥി. കോണ്ഗ്രസിന് വേണ്ടി സൗമ്യ റെഡ്ഡിയാണ് ഈ മണ്ഡലത്തില് നിന്ന് മത്സരിക്കുന്നത്. കോണ്ഗ്രസിന് പിന്തുണ നല്കി ജനതാദള് സ്ഥാനാര്ത്ഥി കാലെഗൗഡ പത്രിക പിന്വലിച്ചിരുന്നു. ആകെ 19 സ്ഥാനാര്ഥികളാണ് മണ്ഡലത്തില് മല്സര രംഗത്തുള്ളത്. രണ്ടുലക്ഷത്തിലധികം വോട്ടര്മാരുള്ള മണ്ഡലത്തിലെ ഫലം ഇരുപാര്ട്ടികള്ക്കും നിര്ണായകമാണ്.