കലാമിന്റെ ചിത്രത്തില് മാലയിട്ട ബിജെപി മന്ത്രിയുടെ പുതിയ മണ്ടത്തരം ഇതാ...
റാഞ്ചി: ജീവിച്ചിരിക്കേ മുന് രാഷ്ട്രപതി എ പി ജെ അബ്ദുള് കലാമിന്റെ ചിത്രത്തില് മാലയിട്ട ഝാര്ഖണ്ട് വനിതാ മന്ത്രിയുടെ നടപടി ഏറെ വിവാദമായിരുന്നു. ഏതാനും ദിവസങ്ങള്ക്ക് ശേഷം ഡോ. അബ്ദുള് കലാം മരിച്ചപ്പോള് മന്ത്രിയുടെ പ്രവൃത്തി അറം പറ്റി എന്ന് വരെ ആളുകള് പറഞ്ഞു. ഝാര്ഖണ്ഡിലെ ഹസാരിബാഗ് ജില്ലയില് ഒരു പരിപാടിയില് പങ്കെടുക്കാന് പോയപ്പോഴാണ് നീര യാദവ് അബ്ദുള് കലാമിന്റെ ചിത്രത്തില് മാല ചാര്ത്തിയത്.
അയല് സംസ്ഥാനമായ ബിഹാറിനെ അയല്രാജ്യം എന്ന് വിളിച്ചാണ് നീര യാദവ് വീണ്ടും വാര്ത്തകളിലെത്തിയത്. ബിഹാറില് അടുത്തുവരുന്ന നിയമസഭ തിരഞ്ഞെടുപ്പിനെക്കുറിച്ച് ചോദ്യത്തിന് മറുപടി പറയുകയായിരുന്നു നീര യാദവ്. ഝാര്ഖണ്ഡിലെ നേതാക്കള് ബിഹാറില് പ്രചാരണത്തിന് പോകുമോ എന്നായിരുന്നു ചോദ്യം. മന്ത്രി പറഞ്ഞ മറുപടി ഇങ്ങനെ.
ബിഹാര് ഞങ്ങളുടെ അയല്രാജ്യമാണ്. ബി ജെ പി എന്തായാലും അവിടെ പ്രചാരണത്തിന് പോകും. ബിഹാര് വിഭജിച്ചാണ് തങ്ങള് ഭരിക്കുന്ന ഝാര്ഖണ്ഡ് രൂപീകരിച്ചത് എന്നത് പോലും മറന്ന മട്ടിലായിരുന്നു മന്ത്രിയുടെ വാക്കുകള്. ഢാര്ഖണ്ഡിലെ വിദ്യാഭ്യാസ മന്ത്രിയാണ് നീര യാദവ്. ഝാര്ഖണ്ഡിലെ മന്ത്രിയാണെങ്കിലും ഉത്തര് പ്രദേശിലെ ബുലന്ത്ശര് സ്വദേശിനിയാണ് നീര യാദവ്.