ബിഹാർ മാതൃകയിൽ ജാതി സർവെ നടത്താൻ ജാർഖണ്ഡും; നിർദ്ദേശം നൽകി മുഖ്യമന്ത്രി ചമ്പായ് സോറൻ

ഡൽഹി: ബിഹാറിൻ്റെ മാതൃകയിൽ സംസ്ഥാനത്ത് ജാതി അടിസ്ഥാനമാക്കിയുള്ള സർവേയ്ക്ക് അനുമതി നൽകി ജാർഖണ്ഡ് മുഖ്യമന്ത്രി ചമ്പായ് സോറൻ. കരട് തയ്യാറാക്കി മന്ത്രിസഭയുടെ അംഗീകാരത്തിനായി സമർപ്പിക്കാൻ പേഴ്സണൽ ഡിപ്പാർട്ട്മെൻ്റിനോട് മുഖ്യമന്ത്രി നിർദ്ദേശിച്ചതായി മുതിർന്ന ഉദ്യോഗസ്ഥൻ അറിയിച്ചു. ലോക്സഭ തിരഞ്ഞെടുപ്പിന് ശേഷം നടപടികൾ ആരംഭിക്കുമെന്നും ഉദ്യോഗസ്ഥൻ വ്യക്തമാക്കി.

ജാർഖണ്ഡിൽ സർവേ നടത്തുന്നതിന് പേഴ്സണൽ ഡിപ്പാർട്ട്മെൻ്റ് മാർഗരേഖ തയ്യാറാക്കുമെന്നും മന്ത്രിസഭയുടെ അംഗീകാരത്തിനായി സമർപ്പിക്കുമെന്നും മുഖ്യമന്ത്രിയുടെ പ്രിൻസിപ്പൽ സെക്രട്ടറി വിനയ് കുമാർ ചൗബെ പിടിഐയോട് വ്യക്തമാക്കി. അയൽ സംസ്ഥാനമായ ബിഹാറിൻ്റെ മാതൃകയിലായിരിക്കും ജാതി സർവേ നടക്കുക.

അടുത്തിടെ തെലങ്കാന സർക്കാരും ജാതി സെൻസസ് നടപ്പാക്കാനുള്ള നടപടികൾ ആരംഭിച്ചിരുന്നു. രാജസ്ഥാനിൽ മുൻ അശോക് ഗെഹ്ലോട്ട് സർക്കാരും ജാതി സെൻസസ് പ്രഖ്യാപിച്ചിരുന്നു.ഒഡീഷ കഴിഞ്ഞ ജുലൈയിൽ സർവ്വേ നടത്തിയിരുന്നു.കഴിഞ്ഞ കോൺഗ്രസ്- ജെ ഡി എസ് സർക്കാരിൻ്റെ കാലത്ത് തന്നെ കർണാടക സർക്കാർ ജാതി സർവേ പൂർത്തിയാക്കിയിരുന്നു. എന്നാൽ പിന്നാക്ക കമ്മിഷൻ്റെ റിപ്പോർട്ട് അന്നത്തെ മുഖ്യമന്ത്രി എച്ച്‌ഡി കുമാരസ്വാമി അംഗീകരിച്ചിരുന്നില്ല.

അതേസമയം ജാതി സെൻസസ് നടത്താനുളള പ്രതിപക്ഷത്തിന്റെ നീക്കം ബി ജെ പിയെ വെട്ടിലാക്കിയിട്ടുണ്ട്. ജാതിയുടെ പേരിൽ ഭിന്നിപ്പിന് ശ്രമിക്കുകയാണെന്നാണ് പ്രതിപക്ഷം കുറ്റപ്പെടുത്തുന്നത് .ജാതി സർവേയോട് ബിജെപി പുറം തിരിഞ്ഞാണ് നിൽക്കുന്നതെങ്കിലും എൻഡിഎ ഘടകകക്ഷികൾ സെൻസസിനായി ശക്തമായ വാദം ഉയർത്തുന്നുണ്ട്.

English summary

Jharkhand to conduct caste survey on Bihar model; Chief Minister Champai Soren gave the instructions