ഒബാമക്ക് കഴിക്കാന്‍ കല്ലുമ്മക്കായ... അതും കേരളത്തില്‍ നിന്ന്

ദില്ലി: കല്ലുമ്മക്കായ എന്ന് കേള്‍ക്കുമ്പോള്‍ തനി കോഴിക്കോടന്‍ രുചിയാണ് ഓര്‍മ വരിക. അങ്ങ് ന്യൂയോര്‍ക്കില്‍ നിന്ന് ഇങ്ങ് ദില്ലിയിലെത്തിയ അമേരിക്കന്‍ പ്രസിഡന്റ് ബരാക് ഒബാമക്കും ഭാര്യ മിഷേലിനും ഇത്തിരി കല്ലുമ്മക്കായ കൊടുത്താലോ...?

സംഗതി സത്യമാണ്. ഒബാമക്കും മിഷേലിനും ഒരുക്കുന്ന സത്കാരത്തില്‍ പ്രധാന വിഭവങ്ങളില്‍ ഒന്ന് കല്ലുമ്മക്കായ ആണ്. കേരളത്തില്‍ നിന്ന് തന്നെയാണ് ഈ കല്ലുമ്മക്കായ എത്തുന്നത്.

ഓയിസ്‌റ്റേഴ്‌സ് എന്നാണ് കല്ലുമ്മക്കായ വിഭാഗത്തില്‍പെട്ടവക്ക് ഇംഗ്ലീഷില്‍ പറയുക. കല്ലുമ്മക്കായക്ക് കോമണ്‍ മുസ്സെല്‍ എന്ന് പറയും.ആഗോള തലത്തില്‍ തന്നെ രുചിയേറിയ വിഭവമായിട്ടാണ് ഓയിസ്‌റ്റേഴ്‌സിനെ കണക്കാക്കുന്നത്. സ്റ്റാര്‍ ഹോട്ടലുകളിലൊക്കെ കഴുത്തറപ്പന്‍ വിലവാങ്ങിയാണ് ഈ വിഭവം വിളമ്പാറുള്ളത്.

ദില്ലിയിലെ താജ് പാലസ് ഹോട്ടലില്‍ ഒരുങ്ങുന്ന സത്കാരത്തിലാണ് കല്ലുമ്മക്കായ ഒരു വിഭവമാകുന്നത്. കേരളത്തില്‍ നിന്ന് മാത്രമാണ് ഇത്തരത്തില്‍ പ്രേത്യക വിഭവം എത്തിക്കുന്നത് എന്ന് കരുതരുത്. രാജ്യത്തെ എല്ലാ സംസ്ഥാനങ്ങളില്‍ നിന്നും ഇത്തരം വിഭവങ്ങള്‍ എത്തുന്നുണ്ട്.

ഒബാമ താമസിക്കുന്നത് താജ് പാലസില്‍ അല്ല. പക്ഷേ ഒബാമ പങ്കെടുക്കുന്ന രണ്ട് സുപ്രധാന സമ്മേളനങ്ങള്‍ക്ക് ആതിഥ്യം അരുളുന്നത് താജ് പാലസ് ആണ്. അതിന്റെ ഭാഗമായി ഒരുക്കുന്ന ഭക്ഷണത്തിലാണ് കല്ലുമ്മക്കായയും ഇടം നേടിയത്.

English summary

Kallummakkaya from Kerala for Obama