കരീന കപൂര്‍ കോണ്‍ഗ്രസിന്റെ സ്ഥാനാര്‍ത്ഥിയാവില്ല, രാഷ്ട്രീയത്തിലേക്കില്ല, ശ്രദ്ധ സിനിമയില്‍ മാത്രം!

ഭോപ്പാല്‍: ലോക്‌സഭാ തിരഞ്ഞെടുപ്പില്‍ മത്സരിക്കുമെന്ന വാദങ്ങളെ തള്ളി ബോളിവുഡ് സൂപ്പര്‍ താരം കരീന കപൂര്‍. തനിക്ക് രാഷ്ട്രീയത്തിലിറങ്ങാന്‍ ഒരു പദ്ധതിയും ഇല്ലെന്ന് അവര്‍ വ്യക്തമാക്കി. നേരത്തെ കരീനാ കപൂര്‍ ഭോപ്പാലില്‍ മത്സരിക്കുമെന്ന് അഭ്യൂഹങ്ങളുണ്ടായിരുന്നു. മുമ്പ് ടൈഗര്‍ പട്ടൗഡി മത്സരിച്ച മണ്ഡലത്തിലായിരുന്നു കോണ്‍ഗ്രസ് കരീനയെ മത്സരിപ്പിക്കാന്‍ തീരുമാനിച്ചത്. ഇവിടെ വിജയസാധ്യത ഉണ്ടെന്നായിരുന്നു വിലയിരുത്തല്‍. ബിജെപി മാധുരി ദീക്ഷിതിനെ മത്സരിപ്പിക്കുന്ന സാഹചര്യത്തില്‍ അതിനെ നേരിടാനാണ് കരീനയെ മത്സരിപ്പിക്കുന്നതെന്നായിരുന്നു റിപ്പോര്‍ട്ട്. രാഹുല്‍ ഗാന്ധിയുടെ പിന്തുണയും ഇതിനുണ്ടായിരുന്നു. അതേസമയം തന്റെ ശ്രദ്ധ അഭിനയത്തിലാണെന്നും കരീന വ്യക്തമാക്കി.

മധ്യപ്രദേശിലെ കോണ്‍ഗ്രസ് നേതാക്കളാണ് കരീനയെ മത്സരിപ്പിക്കണമെന്ന് സംസ്ഥാന സമിതിയോട് ആവശ്യപ്പെട്ടത്. എന്നാല്‍ ഈ വാര്‍ത്തകള്‍ വാസ്തവിരുദ്ധമാണെന്ന് കരീന പറഞ്ഞു. തനിക്ക് രാഷ്ട്രീയത്തില്‍ ഒരു താല്‍പര്യവുമില്ല. ആരും തന്നെ ഇക്കാര്യവും പറഞ്ഞ് ബന്ധപ്പെട്ടിട്ടില്ല. സിനിമ മാത്രമാണ് താന്‍ ശ്രദ്ധിക്കുന്നതെന്നും അവര്‍ പറഞ്ഞു. ഭോപ്പാലില്‍ ബിസിനസുകാരനായ കോണ്‍ഗ്രസ് നേതാവ് യോഗേന്ദ്ര സിംഗ് ചൗഹാന്‍ ഇക്കാര്യം പറഞ്ഞ് രാഹുല്‍ ഗാന്ധിക്ക് കത്തയച്ചിരുന്നു. അതേസമയം കോണ്‍ഗ്രസിനെ പരിഹസിച്ച് ബിജെപി രംഗത്തെത്തിയിരുന്നു. കരീനയെ മത്സരിപ്പിക്കാനുള്ള കോണ്‍ഗ്രസിന്റെ നീക്കം നല്ലൊരു എന്റര്‍ടെയിനറാണെന്ന് ബിജെപി വക്താവ് രജനീഷ് അഗര്‍വാള്‍ പറഞ്ഞു.

English summary

kareena denies entering politics