കർണാടകത്തിൽ പുതിയ കസേര കളി, മക്കൾക്ക് ഉപമുഖ്യമന്ത്രി കസേര ഉറപ്പിക്കാൻ സിദ്ധരാമയ്യയും ഖാർഗെയും

ബെംഗളൂരു: കർണാടകത്തിൽ മുഖ്യമന്ത്രിത്തർക്കം അവസാനിച്ചതോടെ ഡികെ ശിവകുമാർ നാളെ സത്യപ്രതിജ്ഞ ചെയ്ത് അധികാരമേൽക്കാനിരിക്കുകയാണ്. എന്നാൽ സംസ്ഥാന കോൺഗ്രസിലെ അധികാരത്തർക്കങ്ങളും രാഷ്ട്രീയ നാടകങ്ങളും പുതിയൊരു ഘട്ടത്തിലേക്ക് കൂടി കടന്നിരിക്കുകയാണ്.

സിദ്ധരാമയ്യയും ഡി.കെ. ശിവകുമാറും തമ്മിലുള്ള അധികാര പങ്കുവെക്കൽ ചർച്ചകൾ കൂടാതെ അടുത്ത തലമുറയിലെ യുവനേതാക്കൾ തമ്മിലുള്ള പുതിയൊരു മത്സരത്തിനും സംസ്ഥാന രാഷ്ട്രീയം വേദിയാകുകയാണ്. എ.ഐ.സി.സി അധ്യക്ഷൻ മല്ലികാർജുൻ ഖാർഗെയുടെയും മുഖ്യമന്ത്രി സിദ്ധരാമയ്യയുടെയും മക്കൾ ഉപമുഖ്യമന്ത്രി പദവിക്കായി രംഗത്തെത്തിയതോടെ കർണാടകയിൽ മറ്റൊരു കസേര കളിക്ക് കളമൊരുങ്ങിയിരിക്കുന്നു.

സംസ്ഥാനത്ത് ഒന്നിലധികം ഉപമുഖ്യമന്ത്രിമാരെ നിയമിക്കണമെന്ന ആവശ്യം പാർട്ടിയിലെ ഒരു വിഭാഗം ശക്തമാക്കിയ പശ്ചാത്തലത്തിലാണ് ഈ പുതിയ നീക്കങ്ങൾ. മല്ലികാർജുൻ ഖാർഗെയുടെ മകനും നിലവിലെ ഐ.ടി-ബി.ടി മന്ത്രിയുമായ പ്രിയങ്ക് ഖാർഗെ, സിദ്ധരാമയ്യയുടെ മകനും മുൻ എം.എൽ.എയുമായ യതീന്ദ്ര സിദ്ധരാമയ്യ എന്നിവരുടെ പേരുകളാണ് ഉപമുഖ്യമന്ത്രി സ്ഥാനത്തേക്ക് പ്രധാനമായും ഉയർന്നു കേൾക്കുന്നത്.

മുഖ്യമന്ത്രി സ്ഥാനം ഡികെ ശിവകുമാറിന് കൈമാറുമ്പോൾ ഉപമുഖ്യമന്ത്രി സ്ഥാനത്ത് തന്റെ ക്യാമ്പിൽ നിന്നുളള നേതാവ് വേണം എന്ന ആവശ്യം സിദ്ധരാമയ്യയ്ക്കുണ്ട്. സമുദായ സമവാക്യങ്ങൾ കൂടി കണക്കിലെടുത്ത് നാലോളം മുഖ്യമന്ത്രിമാർ എന്ന ഫോർമുലയും ചർച്ചയിലുണ്ട് എന്നാണ് റിപ്പോർട്ടുകൾ. യതീന്ദ്ര സിദ്ധരാമയ്യയുടെ ഇളയ മകനാണ്. പതോളജിസ്റ്റായി ജോലി നോക്കിയിരുന്ന അദ്ദേഹം 2018-ലാണ് സജീവ രാഷ്ട്രീയത്തിലേക്ക് പ്രവേശിക്കുന്നത്. മുൻപ് പിതാവ് മത്സരിച്ചിരുന്ന വരുണ നിയമസഭാ മണ്ഡലത്തിൽ നിന്ന് മത്സരിച്ച് വിജയിച്ചാണ് അദ്ദേഹം നിയമസഭയിൽ എത്തിയത്. 2018 മുതൽ 2023 വരെ എം.എൽ.എ ആയിരുന്ന അദ്ദേഹം, 2024-ൽ കർണാടക ലെജിസ്ലേറ്റീവ് കൗൺസിൽ അംഗമായി തിരഞ്ഞെടുക്കപ്പെട്ടു.

സിദ്ധരാമയ്യ ക്യാമ്പിലെ ഏറ്റവും സ്വാധീനമുള്ള വ്യക്തികളിൽ ഒരാളായാണ് യതീന്ദ്ര സിദ്ധരാമയ്യയെ കണക്കാക്കുന്നത്. അടുത്ത കാലത്തായി രാഷ്ട്രീയത്തിൽ അണിയറയ്ക്ക് പിന്നിലാണ് പ്രധാനമായും പ്രവർത്തിക്കുന്നതെങ്കിലും, സിദ്ധരാമയ്യ പക്ഷത്ത് അദ്ദേഹത്തിന്റെ സ്വാധീനം ക്രമേണ വർദ്ധിച്ചുവരികയാണ്.

പുതിയ സർക്കാരിന്റെ രൂപീകരണവുമായി ബന്ധപ്പെട്ട് കോൺഗ്രസ് ഹൈക്കമാൻഡുമായുള്ള ചർച്ചകൾക്കായി സിദ്ധരാമയ്യ തന്റെ മകനൊപ്പം ദൽഹിയിലേക്ക് യാത്ര ചെയ്തതോടെയാണ് യതീന്ദ്രയുടെ രാഷ്ട്രീയ ഭാവിയെക്കുറിച്ചുള്ള ചർച്ചകൾ ശക്തമായത്. സിദ്ധരാമയ്യ, ശിവകുമാർ പക്ഷങ്ങൾ തമ്മിലുള്ള അധികാര പങ്കുവെക്കൽ ചർച്ചകളുടെ ഭാഗമായി യതീന്ദ്രയ്ക്ക് മന്ത്രിസഭയിലോ അല്ലെങ്കിൽ മറ്റേതെങ്കിലും പ്രമുഖ പദവിയിലോ സ്ഥാനം നൽകിയേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

ഇതുമായി ബന്ധപ്പെട്ട അഭ്യൂഹങ്ങൾ ശക്തമായതോടെ യതീന്ദ്രയ്ക്ക് തന്നെ പരസ്യമായി പ്രതികരണവുമായി രംഗത്തുവരേണ്ടി വന്നു. മകന് വേണ്ടി സിദ്ധരാമയ്യ ഉപമുഖ്യമന്ത്രി സ്ഥാനം ആവശ്യപ്പെട്ടു എന്ന വാർത്തകൾ അദ്ദേഹം തള്ളി. ഇക്കാര്യത്തിൽ അന്തിമ തീരുമാനം എടുക്കേണ്ടത് പാർട്ടി നേതൃത്വമാണെന്നും അദ്ദേഹം പറഞ്ഞു. സംഘടനാ പ്രവർത്തനങ്ങളിൽ കൂടുതൽ ശ്രദ്ധ കേന്ദ്രീകരിച്ചാൽ താൻ "മറ്റൊരു ഡി.കെ. ശിവകുമാറായി മാറും" എന്ന് ഒരിക്കൽ രാഹുൽ ഗാന്ധി പറഞ്ഞ കാര്യവും അദ്ദേഹം ഓർമ്മിപ്പിച്ചു. ഈ പരാമർശം കോൺഗ്രസിനുള്ളിൽ അദ്ദേഹത്തിന്റെ ഭാവി പങ്കിനെക്കുറിച്ചുള്ള ചർച്ചകൾക്ക് കൂടുതൽ ആക്കം കൂട്ടിയിട്ടുണ്ട്.

യതീന്ദ്രയിൽ നിന്ന് വ്യത്യസ്തമായി, പ്രിയങ്ക് ഖാർഗെയ്ക്ക് നിലവിൽ തന്നെ കർണാടക രാഷ്ട്രീയത്തിൽ വലിയൊരു സ്ഥാനമുണ്ട്. മന്ത്രി പദവികൾ കൈകാര്യം ചെയ്തിട്ടുള്ള അദ്ദേഹം, പ്രത്യേകിച്ച് യുവ വോട്ടർമാർക്കും നഗരങ്ങളിലെ വോട്ടർമാർക്കുമിടയിൽ പാർട്ടിയുടെ ഏറ്റവും ശ്രദ്ധേയനായ മുഖമായി വളർന്നു കഴിഞ്ഞു. കഴിഞ്ഞ കുറച്ചുകാലമായി, കുടുംബപ്പേരിനപ്പുറം സ്വന്തമായൊരു രാഷ്ട്രീയ വ്യക്തിത്വം കെട്ടിപ്പടുക്കാൻ അദ്ദേഹത്തിന് സാധിച്ചിട്ടുണ്ട്.

അദ്ദേഹത്തെ പരിഗണിക്കുന്നത് മറ്റൊരു കാര്യത്തിലും കോൺഗ്രസിന് സഹായകരമാകും, പ്രിയങ്ക് പട്ടികജാതിവിഭാഗത്തിൽ നിന്നുള്ള നേതാവാണ്. ഒന്നിലധികം ഉപമുഖ്യമന്ത്രിമാരെ വെക്കുന്ന ഫോർമുലയാണ് നടപ്പിലാക്കുന്നതെങ്കിൽ അതിൽ ദളിത് പ്രാതിനിധ്യം ഉറപ്പാക്കണമെന്ന് പാർട്ടിയിലെ പലരും വാദിക്കുന്നുണ്ട്. ഒന്നിലധികം ഉപമുഖ്യമന്ത്രിമാരെ നിയമിക്കാൻ ഹൈക്കമാൻഡ് തീരുമാനിച്ചാൽ, അതിൽ ഏറ്റവും ശക്തനായ ഒരു സ്ഥാനാർത്ഥി പ്രിയങ്ക് ഖാർഗെ ആയിരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

അതേസമയം, പ്രിയങ്കിന് പദവി നൽകുന്നത് മല്ലികാർജുൻ ഖാർഗെയുടെ രാഷ്ട്രീയ സ്വാധീനത്തെയും കൂടുതൽ ശക്തിപ്പെടുത്തും. സിദ്ധരാമയ്യയും ശിവകുമാറും തമ്മിലുള്ള അധികാര മാറ്റത്തിന്റെ ചർച്ചകൾ സുഗമമായി മുന്നോട്ട് കൊണ്ടുപോകുന്നതിൽ ഖാർഗെയുടെ പങ്ക് വളരെ നിർണ്ണായകമായിരുന്നു.

യതീന്ദ്രയെയും പ്രിയങ്കിനെയും ഒരേസമയം പാർട്ടിയിൽ ഉൾക്കൊള്ളിക്കുക എന്നത് കോൺഗ്രസ് വൃത്തങ്ങളിൽ ഇപ്പോൾ ഏറ്റവും കൂടുതൽ ചർച്ച ചെയ്യപ്പെടുന്ന ഒരു സാധ്യതയായി മാറിക്കൊണ്ടിരിക്കുകയാണ്. പല സമുദായങ്ങളിൽ നിന്നും ഗ്രൂപ്പുകളിൽ നിന്നും പാർട്ടിക്ക് മേൽ വലിയ സമ്മർദ്ദമുണ്ട്. ഇങ്ങനെയൊരു സാഹചര്യത്തിൽ, ഒന്നിലധികം ഉപമുഖ്യമന്ത്രിമാരെ നിയമിക്കുന്നത് ഇതിനൊരു എളുപ്പവഴിയായിട്ടാണ് കോൺഗ്രസ് തന്ത്രജ്ഞർ കാണുന്നത്.

സിദ്ധരാമയ്യയുടെ പക്ഷവും ഖാർഗെയുടെ പക്ഷവും തമ്മിൽ ഏതെങ്കിലും ഒന്ന് തിരഞ്ഞെടുക്കുന്നതിന് പകരം, വ്യത്യസ്ത സമുദായങ്ങളെയും അധികാര കേന്ദ്രങ്ങളെയും പ്രതിനിധീകരിക്കുന്ന നേതാക്കളെ ഒരേസമയം ഭരണത്തിൽ പങ്കാളികളാക്കാൻ പാർട്ടിക്ക് സാധിക്കും. ജി. പരമേശ്വര, സതീഷ് ജാർക്കിഹോളി, എം.ബി. പാട്ടീൽ, ഈശ്വർ ഖണ്ഡ്രെ, യു.ടി. ഖാദർ, പ്രിയങ്ക് ഖാർഗെ എന്നിവരുടെ പേരുകളാണ് വിവിധ സമവാക്യങ്ങളിലായി ചർച്ച ചെയ്യപ്പെടുന്നത്. അതോടൊപ്പം തന്നെ യതീന്ദ്രയ്ക്കും ഉയർന്ന പദവി ലഭിച്ചേക്കുമെന്ന അഭ്യൂഹങ്ങളും തുടരുന്നുണ്ട്.