കർണാടകയിലെ എല്ലാ മെഡിക്കൽ കോളെജുകളും അടിയന്തരമായി തുറക്കാൻ സർക്കാർ തീരുമാനം

ഇതിനുപുറമെ സർക്കാർ നിർദേശിക്കുന്ന കോവിഡ് മാനദണ്ഡങ്ങളും കർശനമായി പാലിക്കണമെന്നും സ്ഥാപനങ്ങൾക്ക് നിർദേശം നൽകിയിട്ടുണ്ട്

സംസ്ഥാനത്തെ എല്ലാ മെഡിക്കൽ, ഡെന്റൽ കോളേജുകളും അടിയന്തരമായി തുറക്കാൻ കർണാടക സർക്കാർ വെള്ളിയാഴ്ച തീരുമാനിച്ചു. മെഡിക്കൽ, ഡെന്റൽ, ആയുഷ്, തുടങ്ങി മറ്റ് അനുബന്ധ ആരോഗ്യ വിദ്യാഭ്യാസ സ്ഥാപനങ്ങളും വീണ്ടും പ്രവർത്തനം ആരംഭിക്കാൻ അനുമതി നൽകിയതായി കർണാടക ആരോഗ്യമന്ത്രി ഡോ. കെ. സുധാകർ അറിയിച്ചു. ഇതിനായി അധ്യപക, അനധ്യാപ ജീവനക്കാരും വിദ്യാർഥികളും വാക്സിൻ സ്വീകരിച്ചിരിക്കുകയും വേണം.

ഇതിനുപുറമെ സർക്കാർ നിർദേശിക്കുന്ന കോവിഡ് മാനദണ്ഡങ്ങളും കർശനമായി പാലിക്കണമെന്നും സ്ഥാപനങ്ങൾക്ക് നിർദേശം നൽകിയിട്ടുണ്ട്. വാക്സിൻ എടുക്കാത്ത ആർക്കും കോളെജുകളിലേക്ക് പ്രവേശനം അനുവദിക്കരുത്. ആരോഗ്യ വകുപ്പ് നിർദേശിക്കുന്ന സാമൂഹിക അകലവും മറ്റ് പ്രതിരോധ നടപടികളും പാലിച്ചുവേണം ക്ലാസുകൾ എടുക്കാൻ.

നിയമം ലംഘിക്കുന്ന സ്ഥാപനങ്ങൾക്കെതിരെ ദുരന്ത നിവാരണ നിയമ പ്രകാരം നടപടിയുണ്ടാകും. സംസ്ഥാനത്തെ ഉന്നത വിദ്യാഭ്യാസ സ്ഥാപനങ്ങൾ എല്ലാം തുറക്കുന്നതിന് മുന്നോടിയായാണ് ആരോഗ്യമേഖലയിലെ വിദ്യാഭ്യാസ സ്ഥാപനങ്ങളിൽ നേരിട്ടുള്ള ക്ലാസുകൾ വീണ്ടും ആരംഭിക്കുന്നത്.മലയാളികളടക്കം സംസ്ഥാനത്തിന് പുറത്തുനിന്ന് വരുന്ന വിദ്യാർഥികളും ഇക്കാര്യങ്ങൾ ശ്രദ്ധിക്കണം. നിരവധി മലയാളി വിദ്യാർഥികളാണ് ബാംഗലൂരു, മംഗലൂരു തുടങ്ങിയ നഗരങ്ങളിലെ മെഡിക്കൽ കോളെജുകളിൽ പഠിക്കുന്നത്.

സംസ്ഥാനത്തെ എല്ലാ ബിരുദ കോളജുകളും മറ്റു ഉന്നത വിദ്യാഭ്യാസ സ്ഥാപനങ്ങളും തുറക്കുന്നതിനായി എല്ലാ വിദ്യാർഥികൾക്കും പ്രത്യേക ക്യാമ്പുകളിലൂടെ വാക്സിൻ നൽകുന്നുണ്ട്. എല്ലാ വിദ്യാർഥികൾക്കും അധ്യാപകർക്കും മറ്റു ജീവനക്കാർക്കും വാക്സിൻ ലഭിച്ചുവെന്ന് ഉറപ്പായശേഷമായിരിക്കും ബിരുദ കോളജുകളിലും നേരിട്ടുള്ള ക്ലാസുകൾക്ക് അനുമതി നൽകുക.

English summary

Karnataka government decided to reopen Medical, dental colleges with immediate effect