ഫ്ലൈ ബസുമായി കർണാടക ആർടിസി കോഴിക്കോട്ടേക്ക്! ബസിനുള്ളിൽ പാൻട്രിയും ടോയ്ലെറ്റും! അത്യാഢംബരം...
ബെംഗളൂരു/കോഴിക്കോട്: ആഢംബര യാത്രയുടെ പര്യായമായ കർണാടക ആർടിസിയുടെ ഫ്ലൈ ബസുകൾ കേരളത്തിലേക്കും സർവ്വീസ് തുടങ്ങുന്നു. ആദ്യഘട്ടത്തിൽ ബെംഗളൂരു കെംപഗൗഡ എയർപോർട്ടിൽ നിന്നും കോഴിക്കോട്ടേക്കാണ് സർവ്വീസ് ആരംഭിക്കുന്നത്. രണ്ടു മാസത്തിനുള്ളിൽ കോഴിക്കോട്-ബെംഗളൂരു റൂട്ടിൽ ഫ്ലൈ ബസുകൾ ഓടിതുടങ്ങുമെന്നാണ് വിവരം.
നിലവിൽ കർണാടകയിലെ വിവിധ നഗരങ്ങളെ ബന്ധിപ്പിച്ച് ഫ്ലൈ ബസുകൾ സർവ്വീസ് നടത്തുന്നുണ്ട്. അടുത്തഘട്ടത്തിൽ കോഴിക്കോട്, സേലം, കോയമ്പത്തൂർ, തിരുപ്പതി, മടിക്കേരി എന്നിവിടങ്ങളിലേക്ക് സർവ്വീസ് തുടങ്ങാനാണ് കർണാടക ആർടിസിയുടെ തീരുമാനം.
2013ലാണ് കർണാടക ആർടിസി ഫ്ലൈ ബസുകൾ നിരത്തിലിറക്കിയത്. ശൗചാലയവും, ഭക്ഷണം പാകം ചെയ്യാനുള്ള പാൻട്രിയും ഉൾപ്പെടുന്ന ഫ്ലൈ ബസ് സർവ്വീസ് ആദ്യഘട്ടത്തിൽ നഷ്ടമായിരുന്നെങ്കിലും പിന്നീട് ലാഭത്തിലായി. കർണാടകയിലെ ഫ്ലൈ ബസ് സർവ്വീസുകൾ ലാഭത്തിലായതോടെയാണ് അയൽ സംസ്ഥാനങ്ങളിലേക്കും സർവ്വീസ് വ്യാപിപ്പിക്കാൻ കർണാടക ആർടിസി തീരുമാനമെടുത്തത്.
കോഴിക്കോട്ട് നിന്നും ബെംഗളൂരു എയർപോർട്ടിലേക്കുള്ള ഫ്ലൈ ബസിന്റെ ടിക്കറ്റ് നിരക്കും സമയക്രമവും ഉടൻ പ്രഖ്യാപിക്കും. ബസിൽ ഏതെല്ലാം ഭക്ഷണമാണ് ഒരുക്കേണ്ടതെന്ന കാര്യം കർണാടക ആർടിസി ആലോചിച്ചു വരികയാണ്. കോഴിക്കോട് നിന്നും പുറപ്പെടുന്ന ബസ് ബെംഗളൂരു കെംപഗൗഡ എയർപോർട്ടിലെത്തിയ ശേഷമേ ശാന്തി നഗർ ബസ് സ്റ്റാൻഡിലേക്ക് പോകുകയുള്ളു.