ബിഹാറീസിനെതിരെ വീണ്ടും പരാമര്ശം; കട്ജുവിനെതിരെ നടപടിയെടുക്കാന് ബിജെപി
കട്ജുവിന്റെ പോസ്റ്റ് 11.5 കോടി വരുന്ന ബിഹാറികളെ പരിഹസിക്കുന്നതാണെന്ന് ബിജെപി എംഎല്എ പ്രേം കുമാര് നിയമസഭയില് പറഞ്ഞു
പറ്റ്ന: ബിഹാറികള്ക്കെതിരെ പരാമര്ശം നടത്തിയ മുന് സുപ്രീംകോടതി ജഡ്ജി മാര്ഖണ്ഡേയ കട്ജുവിനെതിരെ നടപടിയെടുക്കണമെന്ന് ബിജെപി. ബിഹാറികള് വിഡ്ഡികളാണെന്നമട്ടിലായിരുന്നു കട്ജുവിന്റെ നിരന്തരമായ പരാമര്ശം. ഏറ്റവുമൊടുവില് ശനിയാഴ്ച വൈകിട്ട് ഫേസ്ബുക്ക് പോസ്റ്റിലൂടെ കട്ജു നടത്തിയ പരാമര്ശമാണ് നടപടിയാവശ്യപ്പെടാന് ബിജെപിയെ പ്രേരിപ്പിച്ചത്.
ഞാന് ഒരു വിഡ്ഡിയല്ലെന്ന് ലാലു പ്രസാദ് യാദവ് ഒരിക്കല് ലോക്സഭയില് പറഞ്ഞിരുന്നു. ഇക്കാര്യം ചൂണ്ടിക്കാട്ടിയായിരുന്നു കട്ജുവിന്റെ പരിഹാസം. ബിഹാറികള് എന്തിനാണ് ഇത് കൂടെക്കൂടെ പറയുന്നത് എന്ന് കട്ജു ചോദിക്കുന്നു. മറ്റൊരു സംസ്ഥാനക്കാരനും ഇങ്ങനെ പറയുന്നത് താന് കേട്ടിട്ടില്ലെന്നും കട്ജു പറഞ്ഞു.
ബിഹാറികള് തനിക്കെതിരെ പരാതി നല്കരുതെന്നും ഇതൊരു തമാശ മാത്രമാണെന്നും കട്ജു പോസ്റ്റിന്റെ കീഴെ കൊടുത്തിട്ടുണ്ട്. ബിഹാറീസ് എന്ന് വിളിക്കുന്നത് അവേളനപരമായാണ് പല ബിഹാറികളും കരുന്നത്. എന്നാല്, മറ്റൊരു സംസ്ഥാനക്കാരും ഇങ്ങനെ കരുതാറില്ല. തമിഴന് എന്നു വളിക്കുമ്പോഴോ ബംഗാളി എന്നു വിളിക്കുമ്പോഴോ അവിടുത്തെ ജനങ്ങള്ക്ക് പരിഹാസമാണെന്ന് തോന്നാറില്ലെന്നും കട്ജു ചൂണ്ടിക്കാട്ടി.
അതേസമയം കട്ജുവിന്റെ പോസ്റ്റ് 11.5 കോടി വരുന്ന ബിഹാറികളെ പരിഹസിക്കുന്നതാണെന്ന് ബിജെപി എംഎല്എ പ്രേം കുമാര് നിയമസഭയില് പറഞ്ഞു. കട്ജുവിനെതിരെ നിയമ നടപടിവേണമെന്നും ബിജെപി ആവശ്യപ്പെട്ടു. എന്നാല്, കട്ജുവിനെതിരെ വിമര്ശനം ഉന്നയിക്കാന് ബിഹാര് മുഖ്യമന്ത്രി നിതീഷ് കുമാര് തയ്യാറായിട്ടില്ല.