വിവാദത്തിന് വിട, മനു ഭാകറിനും ഗുകേഷിനും ഖേൽരത്ന, മലയാളി സജൻ പ്രകാശിന് അർജുന

ന്യൂ ഡല്‍ഹി: വിവാദങ്ങള്‍ക്ക് അവസാനമിട്ട് ഖേല്‍രത്‌ന പുരസ്‌ക്കാ പ്രഖ്യാപനം. ഒളിംപ്ക്‌സ് ഇരട്ട മെഡല്‍ ജേതാവ് മനു ഭാകറിനും ലോക ചെസ് ചാമ്പ്യന്‍ ഡി ഗുകേഷിനും ഖേല്‍രത്‌ന പുരസ്‌ക്കാരം. ഇരുവരെയും കൂടാതെ പുരുഷ ഹോക്കി ടീം ക്യാപ്റ്റന്‍ ഹര്‍മന്‍പ്രീത് സിംഗ്, പാരലിംപിക് സ്വര്‍ണ മെഡല്‍ ജേതാവ് പ്രവീണ്‍ കുമാര്‍ എന്നിവരേയും ധ്യാന്‍ചന്ദ് ഖേല്‍രത്‌ന പുരസ്‌ക്കാരത്തിന് കേന്ദ്ര കായിക മന്ത്രാലയം ശുപാര്‍ശ ചെയ്തു.

മലയാളി നീന്തല്‍ താരം സജന്‍ പ്രകാശ് അര്‍ജുന പുരസ്‌ക്കാര പട്ടികയില്‍ ഇടം പിടിച്ചു. 32 പേര്‍ക്കാണ് ഇക്കുറി അര്‍ജുന പുരസ്‌ക്കാരം. ഇവരില്‍ 17 പേര്‍ പാരലിംപിക്സ് താരങ്ങളാണ് എന്ന പ്രത്യേകതയുമുണ്ട്.

പാരിസ് ഒളിംപിക്‌സില്‍ 10 മീറ്റര്‍ എയര്‍ പിസ്റ്റള്‍ വിഭാഗത്തില്‍ ഇരട്ട വെങ്കല നേട്ടം സ്വന്തമാക്കി മനു ഭാകര്‍ ചരിത്രം സൃഷ്ടിച്ചിരുന്നു. എന്നാല്‍ ഖേല്‍രത്‌ന പുരസ്‌ക്കാരത്തിനുളള പ്രാഥമിക നാമനിര്‍ദേശ പട്ടികയില്‍ മനുവിന്റെ പേര് ഉള്‍പ്പെട്ടിരുന്നില്ല. ഇത് വലിയ വിവാദമായി മാറിയിരുന്നു. മനു ഭാകറിന്റെ കോച്ചും പിതാവ് രാം കിഷനും അടക്കമുളളവര്‍ വിമര്‍ശനവുമായി രംഗത്ത് വന്നു. എന്നാല്‍ പുരസ്‌ക്കാരത്തിനുളള അപേക്ഷ നല്‍കുന്നതില്‍ തന്റെ ഭാഗത്ത് നിന്ന് വീഴ്ച വന്നതായി മനു ഭാകര്‍ പിന്നീട് വ്യക്തമാക്കുകയുണ്ടായി.

രാജ്യത്തെ ഏറ്റവും ഉന്നത കായിക പുരസ്‌ക്കാരമായ ഖേല്‍രത്‌ന ജനുവരി 17ന് രാഷ്ട്രപതി ഭവനില്‍ വെച്ച് രാഷ്ട്രപതി ദ്രൗപതി മുര്‍മു സമ്മാനിക്കും. ഖേല്‍രത്‌ന, അര്‍ജുന പുരസ്‌ക്കാരങ്ങള്‍ക്ക് പുറമേ പരിശീലകര്‍ക്കുളള ദ്രോണാചാര്യ പുരസ്‌ക്കാരങ്ങളും രാഷ്ട്രപതി സമ്മാനിക്കും. ഷൂട്ടിംഗ് കോച്ച് ദീപാലി ദേശ്പാണ്ഡെ, പാരലിംപിക്‌സ് ഷൂട്ടിംഗ് കോച്ച് സുഭാഷ് റാണ, ഹോക്കി കോച്ച് സന്ദീപ് സാംഗ്വാന്‍ എന്നിവര്‍ക്കാണ് ഇത്തവണത്തെ ദ്രോണാചാര്യ പുരസ്‌കാരം.