ഒട്ടകം രണ്ട് പേരെ കടിച്ചു... ഒരാള്‍ മരിച്ചു

അഹമ്മദാബാദ്: സിംഹവും പുലിയും ഒക്കെ ആളുകളെ കടിച്ച കൊന്ന് വാര്‍ത്തകള്‍ ഏറെ കേട്ടിട്ടുണ്ട്. പാമ്പ് കടിയേറ്റ് ആളുകള്‍ മരിച്ച വാര്‍ത്തകളും കേള്‍ക്കാറുണ്ട്. എന്നാല്‍ ഒട്ടകം കടിച്ച് ഒരാള്‍ മരിക്കുന്ന വാര്‍ത്ത അപൂര്‍വ്വമാണ്.

എന്നാല്‍ അങ്ങനെ ഒരു വാര്‍ത്തയാണ് ഗുജറാത്തില്‍ നിന്ന് വരുന്നത്. ഒട്ടകത്തിന്റെ കടിയേറ്റ് ഒരാള്‍ മരിച്ചു. മറ്റൊരാള്‍ക്ക് ഗുരുതരമായി പരിക്കേറ്റു.

രാജു എന്ന ഒട്ടകമാണ് പണിയൊപ്പിച്ചത്. ഗോവിന്ദ് ത്രിവേദിയെന്ന ആളാണ് കൊല്ലപ്പെട്ടത്. ത്രിവേദിയുടെ തലയിലാണ് രാജു കടിച്ചത്. ഉടന്‍ തന്നെ ത്രിവേദി മരിക്കുകയും ചെയ്തു.

ഒട്ടകത്തിന്റെ മേല്‍ നോട്ടക്കാരനായ ഫൂല മെന എന്ന ആള്‍ക്കും കടിയേറ്റു. ഇയാള്‍ ഭാഗ്യം കൊണ്ട് ജീവനോടെ രക്ഷപ്പെട്ടു. ത്രിവേദിയെ രക്ഷിക്കാന്‍ ശ്രമിക്കുമ്പോഴാണ് ഫൂലക്ക് കടിയേറ്റത്.

താക്കര്‍നഗറില്‍ ആണ് സംഭവം. ഒട്ടകത്തിന്റെ ഉടമ രജ്പുത് ഒട്ടകത്തെ അടുത്തുള്ള ഒരു കോഴിഫാമിനടുത്താണ് കെട്ടിയിടാറ്. മേല്‍നോട്ടക്കാരനായ ഫൂല മെന എപ്പോഴും രാജുവിന്റെ കൂടെ ഉണ്ടാകാറുണ്ട്.

ഒട്ടകത്തിനെ അങ്ങനെ കുറ്റം പറയാന്‍ പറ്റില്ലെന്നാണ് ദൃക്‌സാക്ഷികള്‍ പറയുന്നത്. ത്രിവേദി സ്ഥിരമായി മദ്യപിച്ചെത്തി ബഹളം ഉണ്ടാക്കുന്ന ആളാണത്രെ. കഴിഞ്ഞ ദിവസം രാത്രിയില്‍ ഇയാള്‍ മദ്യപിച്ച് ഒട്ടകത്തിനടുത്തെത്തി ശല്യംപ്പെടുത്തിയത്രെ. ദേഷ്യം വന്ന ഒട്ടകം ത്രിവേദിയുടെ തലക്ക് കടിക്കുകയായിരുന്നു.

English summary

Killer camel bites two, one dead