'കൊറോണയെ പേടിച്ച് മുട്ട വലിച്ചെറിഞ്ഞു, നിറയെ കോഴിക്കുഞ്ഞുങ്ങൾ'; കിരൺ ബേദിക്ക് ട്രോൾ മഴ

ദില്ലി; കൊവിഡ് കാലത്ത് നിരവധി വ്യാജ വാർത്തകളാണ് സമൂഹമാധ്യമങ്ങളിൽ പ്രചരിക്കുന്നത്. കൊറോണയെന്ന ഇരുട്ടിനെ തുരത്താൻ ഐക്യ ദീപം തെളിയിക്കണമെന്ന പ്രധാനമന്ത്രി നരേന്ദ്ര മോദിയുടെ ആഹ്വാനം പോലും വ്യാജ അവകാശവാദങ്ങളുടെ മേമ്പൊടി ചേർത്ത് കഴിഞ്ഞ ദിവസം വ്യാപകമായി പ്രചരിച്ചിരുന്നു. ഈ ശ്രേണിയിൽ ഏറ്റവും ഒടുവിലായി റിപ്പോർട്ട് ചെയ്തിരിക്കുന്നത് പുതുച്ചേരി ലഫ്റ്റനന്റ് ഗവർണർ കിരൺ ബേദിയുടെ ഒരു ട്വീറ്റാണ്.

കൊറോണ വൈറസ് വ്യാപനത്തെ തുടര്‍ന്ന് മുട്ടകള്‍ ഉപേക്ഷിക്കുകയും ആ മുട്ടകള്‍ വിരിഞ്ഞുണ്ടായ കുഞ്ഞുങ്ങള്‍ എന്ന വിവരണത്തോടെ ട്വിറ്ററില്‍ പോസ്റ്റ് ചെയ്ത വീഡിയോയ്ക്കാണ് ഇപ്പോൾ ട്രോൾ മഴ.

മുട്ട വിരുഞ്ഞു

കൊറോണയുടെ പശ്ചാത്തലത്തിൽ ഉപയോഗിക്കാൻ കഴിയാതെ വന്ന മുട്ടകൾ വലിച്ചെറിഞ്ഞു. ഒരാഴ്ചയ്ക്ക് ശേഷം നോക്കിയപ്പോൾ ദാ കോഴിക്കുഞ്ഞുങ്ങൾ ഉണ്ടായിരിക്കുന്നു എന്നാണ് കിരൺ ബേദിയുടെ ട്വീറ്റ്. വിജനമായ സ്ഥലത്ത് കുറേ പേർ നിൽക്കുന്നതായും കുറേ കോഴിക്കുഞ്ഞുങ്ങളും ഉള്ള വീഡിയോ ആണ് അവർ പങ്കുവെച്ചത്.

നിഗൂഢ വഴികൾ

പ്രകൃതിയുടെ സൃഷ്ടി. ജീവിതത്തിന്‌ അതിന്റേതായ നിഗൂഢമായ വഴികളുണ്ടെന്നും തന്റെ ട്വീറ്റിൽ കിരൺ ബേദി കുറിച്ചു. അതേസമയം ട്വീറ്റിൽ കിരൺ ബേദിയെ രൂക്ഷമായി പരിഹസിക്കുകയാണ് ട്വിറ്റേറിയൻസ്. ദയവ് ചെയ്ത് നിങ്ങളുടെ വാട്സ് ആപ്പ് അൺ ഇൻസ്റ്റാൾ ചെയ്യൂവെന്നായിരന്നു ചിലർ കുറിച്ചത്.

Eggs which were thrown as waste because of corona , after one week hatched . The creation of nature 🤔
(Fwded) Life has its own mysterious ways.. pic.twitter.com/H7wMQqc7jc

— Kiran Bedi (@thekiranbedi) April 5, 2020

കൊറോണ പോലും ചിന്തിക്കും

മുട്ട ഉപേക്ഷിച്ചെങ്കില്‍ അത് എറിഞ്ഞുകളഞ്ഞെങ്കില്‍ പൊട്ടിയിട്ടുണ്ടാവില്ലേ എന്നായിരുന്നു മറ്റൊരാളുടെ കമന്റ്. അൽപം മുൻപ് താൻ പാലും പാലകും പുറത്ത് കളഞ്ഞിരുന്നു. രണ്ട് മണിക്കൂർ കഴിഞ്ഞ് വന്ന് നോക്കിയപ്പോൾ അവിടെ പാലക്ക് പനീർ ഉണ്ടായി എന്നായിരുന്നു മറ്റൊരാളുടെ പരിഹാസം. താൻ ഇതുപോലൊരു നാട്ടിലാണല്ലോ വന്നതെന്ന് കൊറോണ പോലും ചിന്തിക്കുന്നുണ്ടാകുമെന്ന് ചിലർ കുറിച്ചു.

ഓം പറയുന്ന സൂര്യൻ

ഇത് ആദ്യമായല്ല കിരൺ ബേദി ഇത്തരത്തിൽ വാർത്തകളും വീഡിയോകളും പങ്കുവെയ്ക്കുന്നത്. സൂര്യൻ ഓം ശബ്ദം ജപിക്കുന്നത് നാസ റെക്കോർഡ് ചെയ്തെന്നുള്ള വിഡിയോ കിരൺബേദി ട്വീറ്റ് ചെയ്തിരുന്നു. നാസ റെക്കോർഡ് ചെയ്ത സൂര്യന്റെ ശബ്ദം, സൂര്യൻ ഓം ജപിക്കുന്നു എന്ന ക്യാപ്ഷനുള്ള വിഡിയോ ആണ് കിരൺ ബേദി പങ്കുവെച്ചത്. മനുഷ്യന് കേൾക്കാൻ സാധിക്കാത്ത ഈ ശബ്ദം നാസ റെക്കോർഡ് ചെയ്തതാണെന്നും ബേദി അവകാശപ്പെട്ടിരുന്നു. വലിയ ട്രോളാണ് ഇതിന് ലഭിച്ചത്.

English summary

Kiran Bedi posts fake forward on egg and chicken