ഫെയ്സ്ബുക്ക് ലൈവിലൂടെ കാമുകന് മുന്നില് പെണ്കുട്ടി തൂങ്ങി മരിച്ചു
കൊല്ക്കത്ത: കാമുകനുമായി വാക്കുതര്ക്കത്തില് ഏര്പ്പെട്ട പെണ്കുട്ടി തൂങ്ങിമരിച്ചു. കാമുകന് കാണാനായി ഫെയ്സ്ബുക്ക് ലൈവ് ഇട്ടശേഷം ആയിരുന്നു 18കാരി ആത്മഹത്യ ചെയ്തത്. പശ്ചിമബംഗാളിലെ സൗത്ത് 24 പാരഗനാസ് ജില്ലയിലാണ് സംഭവം. ശനിയാഴ്ച്ച കാമുകനെ കണ്ട് വീട്ടില് തിരിച്ചെത്തിയ പെണ്കുട്ടിയുടെ സ്വഭാവത്തില് കാര്യമായ വ്യത്യാസം ഉണ്ടായിരുന്നു.
പിറ്റേന്ന് രാവിലെ ഏറെ നേരം കഴിഞ്ഞിട്ടും റൂം തുറക്കാത്തതിനേ തുടര്ന്ന് കുടുംബാംഗങ്ങള് റൂം തുറന്നപ്പോള് പെണ്കുട്ടിയെ ഫാനില് തൂങ്ങിമരിച്ച നിലയില് കണ്ടെത്തുകയായിരുന്നു.തുടര്ന്ന് നടത്തിയ പരിശോധനയിലാണ് ഫെയ്സ്ബുക്ക് ലൈവ് ഓണ് ചെയ്തതിന് ശേഷമാണ് പെണ്കുട്ടി ആത്മഹത്യ ചെയ്തിരിക്കുന്നുവെന്ന് കണ്ടെത്തിയതായി പൊലീസ് അറിയിച്ചു. സുഹൃത്തിനെ കണ്ടതിന് ശേഷം വീട്ടില് തിരിച്ചെത്തിയ പെണ്കുട്ടി അധികമാരോടും സംസാരിച്ചിരുന്നില്ല.
പെരുമാറ്റത്തില് അസ്വാഭാവികത തോന്നിയിരുന്നതായും കുട്ടിയുടെ അമ്മ പോലീസില് മൊഴി നല്കി.പുലര്ച്ചേ 1.30 വരെ കുട്ടിയുടെ മുറിയില് വെളിച്ചം ഉണ്ടായിരുന്നതായി ബന്ധുക്കള് അറിയിച്ചു. അര്ദ്ധരാത്രിവരെ കാമുകനുമായി നടത്തിയ ചാറ്റ് തര്ക്കത്തിലാണ് കലാശിച്ചതെന്ന് പെണ്കുട്ടിയുടെ ഫോണ് പരിശോധന നടത്തിയതില് നിന്ന് വ്യക്തമായതായി പോലീസ് അറിയിച്ചു. പെണ്കുട്ടിയുടെ ആണ്സുഹൃത്തിനായി പോലീസ് തിരച്ചില് ആരംഭിച്ചു.