വുമണ്സ് ഹോസ്റ്റലില് അടിവസ്ത്ര മോഷണം; കള്ളന് ക്യാമറയില് കുടുങ്ങി, ഇയാളുടെ ഉദ്ദേശം?
അര്ധനഗ്നനായി എത്തുന്ന ഇയാള് ഹോസ്റ്റലിന്റെ ടെറസില് കയറി അലക്കിയിട്ടിരിക്കുന്ന അടിവസ്ത്രങ്ങള് എടുക്കുന്ന രംഗങ്ങള് സിസിടിവി ക്യാമറയില് പതിഞ്ഞു.
ബെംഗളൂരു: വുമണ്സ് ഹോസ്റ്റലില് കടന്ന് പെണ്കുട്ടികളുടെ അടിവസ്ത്രം മോഷ്ടിക്കുന്ന യുവാവിനെ കണ്ടെത്തി. അര്ധനഗ്നനായി എത്തുന്ന ഇയാള് ഹോസ്റ്റലിന്റെ ടെറസില് കയറി അലക്കിയിട്ടിരിക്കുന്ന അടിവസ്ത്രങ്ങള് എടുക്കുന്ന രംഗങ്ങള് സിസിടിവി ക്യാമറയില് പതിഞ്ഞു.
ബെംഗളൂരു മഹാറാണി വുമണ്സ് കോളജ് ഹോസ്റ്റലിലാണ് ആശ്ചര്യകരമായ സംഭവം. മേഖലയില് തുടര്ച്ചയായി അടിവസ്ത്രങ്ങള് മോഷണം പോവുന്നതിനെ തുടര്ന്ന് പോലീസില് പരാതി നല്കിയിരുന്നെങ്കിലും ഫലമുണ്ടായിരുന്നില്ല. തുടര്ന്നാണ് സിസിടിവി ക്യാമറകള് സ്ഥാപിച്ചത്.
അടിവസ്ത്രങ്ങള് മോഷ്ടിക്കുക മാത്രമല്ല കള്ളന് ചെയ്തത്. അത് ധരിച്ച് ടെറസിന് മുകളിലൂടെ നടന്നു. ഇതെല്ലാം ക്യാമറയില് പതിഞ്ഞിട്ടുണ്ട്. വസ്ത്രങ്ങള് കാണാതാവുന്നത് തുടര്ക്കഥയായതിനെ തുടര്ന്ന് വാര്ഡനാണ് ക്യാമറകള് ഘടിപ്പിക്കാന് തീരുമാനിച്ചത്.
ശബ്ദം കേട്ട പെണ്കുട്ടികള് സെക്യൂരിറ്റിക്കാരെ വിവരം അറിയിച്ചു. സെക്യൂരിറ്റിക്കാരെത്തുമ്പോള് കള്ളന് ജനലിലൂടെ അകത്തേക്ക് നോക്കാന് ശ്രമിക്കുകയായിരുന്നു. ഇയാള്ക്ക് പിന്നാലെ സെക്യൂരിറ്റിക്കാന് ഓടുന്നതും കള്ളന് മതില് ചാടി രക്ഷപ്പെടുന്നതും ക്യാമറയില് പതിഞ്ഞിട്ടുണ്ട്.
സമാനമായ സംഭവങ്ങള് ബെംഗളൂരുവിലെ വുമണ്സ് ഹോസ്റ്റലുകളില് പതിവാണ്. ചിലര് വുമണ്സ് ഹോസ്റ്റലുകളില് രാത്രി എത്തിനോക്കുന്ന സംഭവങ്ങളുമുണ്ടായിട്ടുണ്ട്. പോലീസില് പരാതി നല്കിയെങ്കിലും കാര്യമായ നടപടി എടുത്തിരുന്നില്ല.
തുടര്ന്നാണ് മഹാറാണി കോളജ് ഹോസ്റ്റലിലെ വാര്ഡന് സുമിത്ര ദേവി കാമറകള് ഘടിപ്പിക്കാന് തീരുമാനിച്ചത്. ഹോസ്റ്റലിന്റെ നാലു ഭാഗത്തും ടെറസിലും കാമറകള് ഘടിപ്പിച്ചു. സെക്യൂരിറ്റിക്കാരെയും അധികം നിയോഗിച്ചു. തുടര്ന്നാണ് കള്ളന്റെ ദൃശ്യങ്ങള് ലഭിച്ചത്.
ബെംഗളൂരുവില് സ്ത്രീകള്ക്കെതിരായ അതിക്രമം വര്ധിച്ചിട്ടുണ്ട്. പുതുവര്ഷ ദിനാഘോഷത്തിനിടെ സ്ത്രീകളെ കയറിപ്പിടിച്ച സംഭവം ദേശീയതലത്തില് വിവാദമായിരുന്നു. ഇതിനെതിരേ വ്യാപക പ്രതിഷേധമാണുയര്ന്നത്. ദേശീയ വനിതാ കമ്മീഷനും കേന്ദ്രസര്ക്കാരും സംഭവത്തില് ഇടപ്പെട്ടിരുന്നു.