ലാലുവാണ് ഹീറോ: റാബ്റി ദേവി
പട്ന: ലാലുവാണ് ഹീറോ. എല്ലാക്കാലത്തും ലാലു തന്നെയായിരിക്കും ഹീറോ - പറയുന്നത് മറ്റാരുമല്ല, ലാലുവിന്റെ പത്നി റാബ്റി ദേവിയാണ്. കാലിത്തീറ്റ കുംഭകോണക്കേസില്പ്പെട്ട് അഞ്ചുകൊല്ലത്തേക്ക് ജയിലില് ആയെങ്കിലും റാബ്റിയുടെ മനസില് ലാലു പ്രസാദ് യാദവ് തന്നെയാണ് ഇപ്പോഴും ഹീറോ. രാഷ്ട്രീയ ഗൂഡാലോചനയുടെ ഇരയായി മാറുകയായിരുന്നു തന്റെ ഭര്ത്താവ് എന്ന ആക്ഷേപവും റാബ്റി ഉന്നയിക്കുന്നുണ്ട്.
ആര് ജെ ഡിയെ തുടര്ന്നും ലാലു പ്രസാദ് യാവ് തന്നെ നയിക്കും എന്നാണ് റാബ്റി പറയുന്നത്. സോണിയാ ഗാന്ധിയും രാഹുല് ഗാന്ധിയും കോണ്ഗ്രസിനെ നയിക്കുന്നത് പോലെ താനും മകനും ചേര്ന്ന് ആര് ജെ ഡിയെ നയിക്കുമെന്നാണ് മുന് മുഖ്യമന്ത്രി കൂടിയായ റാബ്റി പറയുന്നത്.
ലാലുവിന്റെ ജയില്വാസത്തിന് കാരണം നിതീഷ് കുമാറിന്റെ തന്ത്രങ്ങളാണ്. സംസ്ഥാനത്തെ പാവപ്പെട്ടവരെയും ദളിതരെയും ന്യൂനപക്ഷങ്ങളെയും നിശബ്ദരാക്കാനുള്ള ശ്രമങ്ങളുടെ ഭാഗമാണ് ലാലുവിന്റെ തടവെന്ന് ആര് ജെ ഡി എം പിയായ കൃപാല് യാദവ് ആരോപിക്കുന്നു.
ആര് ജെ ഡി പ്രവര്ത്തകര് ഈ വിധി പ്രതീക്ഷിച്ചിരുന്നതാണ് എന്നും വെല്ലുവിളി നേരിടാന് അണികള് തയ്യാറാണ് എന്നുമാണ് പാര്ട്ടി നേതാക്കള് പറയുന്നത്. ലാലുവിന്റെ അസാന്നിധ്യത്തില് മകനായ തേജസ്വി യാദവായിരിക്കും ലോക്സഭാ തിരഞ്ഞെടുപ്പില് ആര് ജെ ഡിയെ നയിക്കുക എന്നാണ് റിപ്പോര്ട്ടുകള്.
കാലിത്തീറ്റ കുംഭകോണക്കേസില് കുറ്റക്കാരനെന്ന് കണ്ടെത്തിയ മുന് കേന്ദ്രമന്ത്രിയും ബിഹാര് മുഖ്യമന്ത്രിയുമായ ലാലു പ്രസാദ് യാദവിനെ അഞ്ചുവര്ഷത്തേക്കാണ് കോടതി ശിക്ഷിച്ചിരിക്കുന്നത്. 25 ലക്ഷം രൂപ പിഴയും അടക്കണം. എം പി സ്ഥാനവും ലാലുവിന് ന്ഷ്ടമായി.