ലാലുപ്രസാദ് യാദവ് വീണ്ടും 'വിവാഹിതനായി'

പട്‌ന: അറുപത്തിയാറാം വയസ്സില്‍ പാര്‍ട്ടിയൊരുക്കിയ യോഗത്തില്‍ ഇളയ പുത്രനെ സാക്ഷി നിര്‍ത്തി ആര്‍ ജെ ഡി ദേശീയ പ്രസഡന്റ് ലാലു പ്രസാദ് യാദവ് ഭാര്യ റാബ്രദി ദേവിയുടെ കഴുത്തില്‍ 'വരണമാല്യം' ചാര്‍ത്തി. മുന്‍ മുഖ്യമന്ത്രിയും ഒമ്പത് മക്കളുടെ അമ്മയുമായ റാബ്രി ദേവിയും വരനായ ലാലുവിനെയും വരണമാല്യം അണിയിച്ചു സ്വീകരിച്ചു.

തന്റെ മണ്ഡലമായ സരണ്‍ കൈമാറുന്നതിന് വേണ്ടിയായിരുന്നു ഈ ചടങ്ങുകള്‍. കാലിത്തീറ്റ കുംഭകോണം കേസില്‍ ശിക്ഷിക്കപ്പെട്ടതിനാല്‍ ലാലുവിന് തിരഞ്ഞെടുപ്പില്‍ മത്സരിക്കാന്‍ കഴിയില്ല. അതുകൊണ്ടാണ് തന്റെ പതിവ് മണ്ഡലമായ സരണ്‍ ഭാര്യയെ ഏല്‍പ്പിച്ചത്. കേസുമായി ബന്ധപ്പെട്ട് മുഖ്യമന്ത്രി സ്ഥാനം ഒഴിയേണ്ടിവന്നപ്പോഴു പകരക്കാരിയായി റാബ്രിയെ തന്നെയാണ് അദ്ദേഹം ചുമതലപ്പെടുത്തിയിരുന്നത്.

ഞായറാഴ്ച സരണിലെ ചപ്രയില്‍ നടന്ന പാര്‍ട്ടി യോഗത്തില്‍ വച്ചായിരുന്നു പുനര്‍വിവാഹച്ചടങ്ങുകള്‍. ഇരുവരും പരസ്പരം വരണമാല്യം ചാര്‍ത്തി. എഴുപതുകളുടെ തുടക്കത്തിലാണ് ഞാനും റാബ്രിയയും വിവാഹിതരായത്. വളരെ ചെറുപ്പം. അന്ന് വരണമാല്യം ചാര്‍ത്തുന്ന ചടങ്ങ് ബീഹാറിയെ യാദവര്‍ക്കിടയില്‍ ഉണ്ടായിരുന്നില്ല. ഇപ്പോള്‍ അത് മാറി. മാലയിട്ടാണ് എല്ലാവരും വിവാഹിതരാകുന്നത്. അതുകൊണ്ടാണ് നാലു പതിറ്റാണ്ടിനു ശേഷം ഇങ്ങനെയൊരു വരണമാല്യം ചാര്‍ത്തല്‍ ചടങ്ങെന്ന് ലാലു പ്രസാദ് യാദവ് പറഞ്ഞു.

എന്നെ വരണമാല്യം അണിയിച്ചതിലൂടെ എന്റെ സ്വന്തം ലോക്‌സഭാ മണ്ഡലമായ സരണ്‍ റാബ്രിയയ്ക്കും സ്വന്തമായെന്ന് ലാലു പറഞ്ഞു. ഇളയ മകന്‍ തേജാപ്രതാപും പാര്‍ട്ടി പ്രവര്‍ത്തകരും അടുത്ത ബന്ധുക്കളും ചടങ്ങില്‍ പങ്കെടുത്തു.