കർണാടകയിൽ ഇനി മദ്യത്തിന് വില ഉയരും; പുതിയ എക്സൈസ് തീരുവ മെയ് 1 മുതൽ

കർണാടകയിൽ മദ്യവില വീണ്ടും ഉയരും. പുതിയ എക്സൈസ് തീരുവ ഘടന മെയ് 1 മുതൽ പ്രാബല്യത്തിൽ വരും. കോൺഗ്രസ് സർക്കാർ അധികാരത്തിൽ വന്നതിന് ശേഷം ഇത് അഞ്ചാമത്തെ തവണയാണ് വില വർധിക്കുന്നത്. മദ്യത്തിന്റെ അളവനുസരിച്ച് നികുതി ഏർപ്പെടുത്തുന്നതാണ് പുതിയ മദ്യനയം. കുറഞ്ഞ ആൽക്കഹോളടങ്ങിയ ചില പ്രീമിയം മദ്യങ്ങൾക്ക് വില കുറഞ്ഞേക്കാമെങ്കിലും, സാധാരണ മദ്യത്തിന് 20 ശതമാനം വരെ വിലവർദ്ധനവ് പ്രതീക്ഷിക്കപ്പെടുന്നുണ്ട്.

നിലവിൽ, കർണാടകയിലെ മദ്യവില സംസ്ഥാന സർക്കാരിന്റെ പൂർണ നിയന്ത്രണത്തിലാണ്. ഉൽപ്പാദകർ ഫാക്ടറി വില പ്രഖ്യാപിക്കുമ്പോൾ, സർക്കാർ പരമാവധി ചില്ലറ വിൽപ്പന വില നിശ്ചയിക്കും. 16 വില സ്ളാബുകളായി തിരിച്ചിട്ടുള്ള മദ്യത്തിന് ഓരോന്നിനും വ്യത്യസ്ത എക്സൈസ് തീരുവയുണ്ട്. സംസ്ഥാന എക്സൈസ് വരുമാനത്തിന്റെ 80 ശതമാനവും വരുന്ന ആദ്യ നാല് വില സ്ളാബുകളിലാണ് ഏറ്റവും വലിയ വിലവർദ്ധനവ് കാണാൻ കഴിയുക. വിസ്കി, റം, ബ്രാൻഡി, ജിൻ ഉൾപ്പെടെയുള്ള ഇന്ത്യൻ നിർമ്മിത വിദേശ മദ്യങ്ങൾക്ക് ഒരു ക്വാർട്ടർ കുപ്പിക്ക് 15 മുതൽ 25 വരെ വില കൂടും.

പുതുക്കിയ നിരക്കുകൾ പ്രകാരം, ഒന്നാം സ്ളാബ് 80-ൽ നിന്ന് 95 ആയും, രണ്ടാം സ്ളാബ് 95-ൽ നിന്ന് 110 ആയും, മൂന്നാം സ്ളാബ് 120-ൽ നിന്ന് 135 ആയും, നാലാം സ്ളാബ് 150-ൽ നിന്ന് 170 ആയും വർദ്ധിക്കും. ഒരു ഫുൾ ബോട്ടിലിന്റെ പരമാവധി ചില്ലറ വിൽപ്പന വില വിഭാഗമനുസരിച്ച് 50 മുതൽ 100 വരെ വർദ്ധിച്ചേക്കാം.

ബാറുകളിലും റെസ്റ്റോറന്റുകളിലും അധിക സർവീസ് ചാർജുകൾ കാരണം വില ഉയരും. ബ്ലാക്ക് ഡോഗ്, ബ്ലാക്ക് & വൈറ്റ് സ്കോച്ച് പോലുള്ള പ്രീമിയം ഇറക്കുമതി സ്പിരിറ്റുകൾക്ക് 5 മുതൽ 15 ശതമാനം വരെ വില കുറയും. എന്നാൽ ഡിഎസ്പി ബ്ലാക്ക് ഡീലക്സ് പോലുള്ള സാധാരണ ഇന്ത്യൻ നിർമ്മിത വിദേശ മദ്യങ്ങൾക്ക് 11 മുതൽ 16 ശതമാനം വരെ വില കൂടും.

ബിയർ വിലയിലും നേരിയ വർദ്ധനവ് പ്രതീക്ഷിക്കുന്നുണ്ട്. പ്രത്യേകിച്ചും ഉയർന്ന ആൽക്കഹോൾ ഉള്ള സ്ട്രോങ്ങ് ബിയർ വിഭാഗങ്ങളിൽ. സാധാരണ ബിയറിന്റെ വില താരതമ്യേന സ്ഥിരമായി തുടരുമെങ്കിലും, പുതിയ നികുതി ഘടനയുടെ സ്വാധീനത്തിൽ നിന്ന് പൂർണ്ണമായും ഒഴിഞ്ഞുനിൽക്കാൻ സാധ്യതയില്ല.

തുടർച്ചയായ ഈ വർദ്ധനവുകൾ ഉപഭോക്താക്കളിൽ നിന്നും മദ്യ വ്യാപാരികളിൽ നിന്നും ഒരുപോലെ വിമർശനങ്ങൾക്ക് വഴിവെച്ചിട്ടുണ്ട്. ഈ നടപടികൾ സാധാരണ ഉപഭോക്താക്കൾക്ക് വലിയ സാമ്പത്തിക ഭാരമാകുന്നുവെന്ന് പലരും ചൂണ്ടിക്കാട്ടുന്നു. വർദ്ധിച്ച എക്സൈസ് പിരിവ് സർക്കാർ ക്ഷേമ പദ്ധതികൾക്ക് ഉപയോഗിക്കുന്നു എന്ന അഭിപ്രായവും നിലവിലുണ്ട്.

English summary

Karnataka introduces an ABV based alcohol tax regime, applying duties by alcohol strength. The policy, the fifth increase since the new government took office, is set to raise prices across spirits and beer, affecting consumers and traders while directing revenue to state measures.