സല്മാന് ഖാനെ കാണാന് നാലംഗ സംഘം വീടുവിട്ടിറങ്ങി, പ്രായം 10 നും 12നും ഇടയില്
കാണ്പൂര്: സല്മാന് ഖാന്റെ കടുത്ത ആരാധകരായ നാലംഗ സംഘം കാണ്പൂരില് നിന്നും മുംബൈയിലേക്ക് യാത്ര തിരിച്ചു. 10നും 12നും ഇടയിലാണ് ഇവരുടെ പ്രായം. ജൂണ് 22 ന് വീട്ടില് നിന്നും ഒളിച്ചോടിയ കുട്ടികളെ മുംബൈ റെയില്വേ പോലീസ് സംശയം തോന്നി ചോദ്യം ചെയ്തപ്പോഴാണ് സംഭവം പുറത്ത് വന്നത്.
മുംബൈ കുര്ള സ്റ്റേഷനില് ഇറങ്ങിയ കുട്ടികളെ പോലീസ് ഷെല്ട്ടര് ഹോമിലേക്ക് മാറ്റിയിരുന്നു. തുടര്ന്ന് നടത്തിയ ചോദ്യം ചെയ്യലിലാണ് സുല്ത്താന്റെ(സല്മാന് ഖാന്) വലിയ ആരാധകരാണിവര് എന്ന് പറഞ്ഞത്. അദ്ദേഹത്തെ കാണാന് വേണ്ടിയാണ് മുംബൈയില് വന്നത് എന്നും പറഞ്ഞു.
വീട്ടില് നിന്നും പോരുമ്പോള് സംഘത്തിലെ മൂത്ത കുട്ടി 9000 രൂപ അലമാരയില് നിന്നും മോഷ്ടിച്ചിരുന്നു. മെയ് മാസത്തില് കാണാതായ കുട്ടികള്ക്കു വേണ്ടിയുള്ളി തെരച്ചിലിനിടയിലാണ് ഈ കുട്ടികളെ കണ്ടെത്തിയത്. ജൂലൈ 9ന് കുട്ടികളെ അവരുടെ മാതാപിതാകള്ക്ക് കൈമാറി.