പ്രചരണത്തിനിടെ കനയ്യ കുമാറിനെതിരെ ആക്രമണം; 'സൈന്യത്തെ അപമാനിച്ചതിനുള്ള മറുപടി'
ന്യൂഡല്ഹി: ഡല്ഹിയില് നിന്നുള്ള കോണ്ഗ്രസിന്റെ ലോക്സഭാ സ്ഥാനാര്ത്ഥി കനയ്യ കുമാറിനെതിരെ ആക്രമണം. വെള്ളിയാഴ്ച കിഴക്കന് ഡല്ഹിയിലെ ന്യൂ ഉസ്മാന്പൂര് പ്രദേശത്ത് പ്രചരണത്തിനിടെയാണ് സംഭവം. ഏഴോ എട്ടോ പേര് ചേര്ന്ന് ആക്രമിക്കുകയും കനയ്യ കുമാറിന് നേര്ക്ക് കറുത്ത മഷി എറിയുകയുമായിരുന്നു. ആക്രമണത്തിന്റെ വീഡിയോകള് സോഷ്യല് മീഡിയയില് പ്രചരിക്കുന്നുണ്ട്.
ആക്രമണം നടത്തിയവരില് രണ്ട് പേര് കനയ്യ കുമാറിനെ മര്ദ്ദിച്ചു. രാജ്യത്തെ തകര്ക്കുന്നതിനെക്കുറിച്ച് മുദ്രാവാക്യം വിളിച്ചതിനാലും ഇന്ത്യന് സൈന്യത്തിനെതിരെ സംസാരിച്ചതിനാലുമാണ് തങ്ങള് അങ്ങനെ ചെയ്തതെന്ന് വിളിച്ച് പറയുന്ന വീഡിയോകളും പുറത്തുവിട്ടിട്ടുണ്ട്. അക്രമികള് തന്നെയാണ് വീഡിയോ പുറത്ത് വിട്ടത്. ബ്രഹ്മപുരിയില് നിന്നുള്ള എഎപി കൗണ്സിലര് ഛായ ഗൗരവ് ശര്മ്മ സംഭവത്തില് പരാതി നല്കി.
ഇദ്ദേഹവും സംഭവസ്ഥലത്ത് വെച്ച് ആക്രമിക്കപ്പെട്ടിരുന്നു. താനും കനയ്യ കുമാറും കര്താര് നഗറിലെ പാര്ട്ടി ഓഫീസില് നിന്ന് ഇറങ്ങുമ്പോള് ചിലര് കനയ്യ കുമാറിനെ ഹാരമണിയിക്കാന് എന്ന വ്യാജേന എത്തി മഷി എറിയുകയും തുടര്ന്ന് മര്ദിക്കുകയും ചെയ്തു. മൂന്നോ നാലോ സ്ത്രീകള്ക്ക് പരിക്കേറ്റതായും ഒരു വനിതാ മാധ്യമപ്രവര്ത്തക അഴുക്കുചാലില് വീണതായും അവര് പറഞ്ഞു.
അക്രമികള് മോഷ്ടിച്ച പണം ഉപയോഗിച്ച് തന്നെ തന്നെയും ഭര്ത്താവിനെയും കൊല്ലുമെന്ന് ഭീഷണിപ്പെടുത്തിയതായും ശര്മ്മ ആരോപിച്ചു. ഛായ ഗൗരവ് ശര്മ്മയുടെ പരാതി ലഭിച്ചതായി ഡല്ഹി പൊലീസ് ഉദ്യോഗസ്ഥര് സ്ഥിരീകരിച്ചു. വീഡിയോകള് പരിശോധിച്ചുവരികയാണെന്നും അന്വേഷണം ആരംഭിച്ചതായും പൊലീസ് പറഞ്ഞു. വീഡിയോകളില് അക്രമികളെന്ന് ആരോപിക്കപ്പെടുന്ന രണ്ട് പേരില് ഒരാള് മാല പിടിച്ചിരിക്കുന്നത് കാണാം.
കനയ്യ കുമാര് തിരഞ്ഞെടുക്കപ്പെട്ടാല് രാജ്യം പല ഭാഗങ്ങളായി വിഭജിക്കപ്പെടും എന്ന് അക്രമികള് പറയുന്നു. കനയ്യ കുമാര് ജെഎന്യു സ്റ്റുഡന്റ്സ് യൂണിയന് പ്രസിഡന്റായിരിക്കെ 2016ല് ജവഹര്ലാല് നെഹ്റു സര്വകലാശാലയില് (ജെഎന്യു) ഉയര്ന്നുവന്ന മുദ്രാവാക്യങ്ങളെ ചൂണ്ടിക്കാട്ടിയാണ് അക്രമികളുടെ പ്രതികരണം. ഞങ്ങളുടെ ആക്രമണത്തിലൂടെ ഞങ്ങള് ഒരു ഉത്തരം നല്കി എന്നും രണ്ടുപേരും പറഞ്ഞു.
തങ്ങള് 'സനാതന സിംഹങ്ങള്' ആണെന്നും കനയ്യ കുമാര് ഇന്ത്യന് സൈന്യത്തെയും അപമാനിച്ചുവെന്നും അവര് പറഞ്ഞു. 37 കാരനായ കനയ്യ കുമാര് ബിജെപിയുടെ മനോജ് തിവാരിക്കെതിരെയാണ് മത്സരിക്കുന്നത്. മനോജ് തിവാരി മണ്ഡലത്തിലെ നിന്നുള്ള സിറ്റിംഗ് എംപിയാണ്. മെയ് 25 നാണ് ഡല്ഹിയില് ആറാം ഘട്ട വോട്ടെടുപ്പ് നടക്കുന്നത്.
Click it and Unblock the Notifications
Sign in with Google