അങ്ങനെയെങ്കില്‍ ബംഗാളിലെ മുഴുവന്‍ സീറ്റിലും ടിഎംസി തനിച്ച് മത്സരിക്കും: മുന്നറിയിപ്പുമായി മമത ബാനർജി

കൊൽക്കത്ത: പശ്ചിമ ബംഗാളിലെ ഇന്ത്യൻ ബ്ലോക്കിനുള്ളിൽ സീറ്റ് വിഭജനത്തെച്ചൊല്ലിയുള്ള അഭ്യൂഹങ്ങൾക്കിടയില്‍ ശ്രദ്ധേയമായ പ്രഖ്യാപനവുമായി ടിഎംസി നേതാവ് മമത ബാനർജി. മികച്ച പ്രാധാന്യം നല്‍കിയില്ലെങ്കില്‍ സംസ്ഥാനത്തെ 42 ലോക്‌സഭാ സീറ്റുകളിലും സ്വതന്ത്രമായി മത്സരിക്കാൻ പാർട്ടി തയ്യാറാണെന്നാണ് പശ്ചിമ ബംഗാള്‍ മുഖ്യമന്ത്രിയുടെ പ്രഖ്യാപനം.

പാർട്ടിയുടെ മുർഷിദാബാദ് ജില്ലാ ഘടകത്തിന്റെ സംഘടനാ യോഗത്തിലാണ് പാർട്ടി അധ്യക്ഷ കൂടിയായ ബാനർജി തന്റെ നിലപാട് അറിയിച്ചത്. ഗണ്യമായ ന്യൂനപക്ഷ ജനസംഖ്യയുള്ളതും പരമ്പരാഗതമായി കോൺഗ്രസിന്റെ കോട്ടയായി കണക്കാക്കപ്പെടുന്നതുമായ പ്രദേശമാണിത്. ഈ സീറ്റുകള്‍പ്പടെ കോണ്‍ഗ്രസ് ചോദിച്ചിട്ടുമുണ്ട്. ജില്ലയിലെ മൂന്ന് ലോക്‌സഭാ സീറ്റുകളിലും ടിഎംസിയുടെ വിജയത്തിന്റെ ആവശ്യകത ഊന്നിപ്പറഞ്ഞ യോഗത്തിൽ അവർ പാർട്ടി നേതാക്കളോട് തിരഞ്ഞെടുപ്പ് പോരാട്ടത്തിന് തയ്യാറാകണമെന്നും അഭ്യർത്ഥിച്ചു.

2019 ലെ തിരഞ്ഞെടുപ്പിൽ, അഞ്ച് തവണ എംപിയും സംസ്ഥാന കോൺഗ്രസ് അധ്യക്ഷനുമായ അധീർ രഞ്ജൻ ചൗധരി നേടിയ ബഹരംപൂർ സീറ്റ് മാത്രമാണ് കോൺഗ്രസിന് നിലനിർത്താൻ കഴിഞ്ഞത്.

"ഇന്ത്യ ബ്ലോക്കിന്റെ ഏറ്റവും പ്രധാനപ്പെട്ട പങ്കാളികളിൽ ഒന്നാണ് തൃണമൂൽ പാർട്ടിയെന്ന് ഞങ്ങളുടെ പാർട്ടി മേധാവി മമത ബാനർജി വ്യക്തമായി പ്രസ്താവിച്ചു. എന്നാൽ ബംഗാളിൽ ഞങ്ങളെ ഒഴിവാക്കി ആർ എസ് പി, സി പി ഐ, സി പി ഐ എം എന്നിവയ്ക്ക് കൂടുതൽ പ്രാധാന്യം നൽകിയാൽ, ഞങ്ങൾ സ്വന്തം പാത വെട്ടിത്തുറക്കും. 42 സീറ്റുകളിലും പോരാടി വിജയിക്കാനുള്ള തയ്യാറെടുപ്പുകൾ നടത്തും," ഒരു മുതിർന്ന ടിഎംസി നേതാവിനെ ഉദ്ധരിച്ച് ദ ന്യൂ ഇന്ത്യന്‍ എക്സ്പ്രസ് റിപ്പോർട്ട് ചെയ്യുന്നു.

ദേശീയ തലത്തില്‍ സിപിഐ എം നേതൃത്വത്തിലുള്ള ഇടതുമുന്നണിയും കോൺഗ്രസും തൃണമൂൽ കോൺഗ്രസ്സും 28 പാർട്ടികളുള്ള ശക്തമായ ഇന്ത്യൻ പ്രതിപക്ഷ ബ്ലോക്കിന്റെ ഭാഗമാണ്. എന്നാൽ, പശ്ചിമ ബംഗാളിൽ തൃണമൂൽ കോൺഗ്രസിനും ബി ജെ പിക്കും എതിരായ നിലപാടാണ് സി പി ഐ എമ്മും കോൺഗ്രസും സ്വീകരിച്ചത്.

" ജില്ലയിലെ മൂന്ന് ലോക്‌സഭാ സീറ്റുകളിലും വിജയിക്കാനുള്ള തയ്യാറെടുപ്പുകൾ നടത്തണമെന്ന് പാർട്ടി അധ്യക്ഷ പറഞ്ഞു. ന്യൂനപക്ഷങ്ങൾക്ക് ആധിപത്യമുള്ള ജില്ലയിൽ അധീർ ചൗധരി ഒരു ഘടകമാണെന്ന് ഞങ്ങളുടെ എംഎൽഎമാരിലൊരാളായ ഹുമയൂൺ കബീർ ചൂണ്ടിക്കാണിച്ചപ്പോൾ, ഈ വാദത്തിന് വലിയ പ്രാധാന്യം നൽകാൻ ബാനർജി വിസമ്മതിച്ചു, ടിഎംസി ഒറ്റക്കെട്ടായി പോരാടിയാൽ വിജയം ഉറപ്പാണെന്ന് അവർ പറഞ്ഞു" മറ്റൊരു ടി എം സി നേതാവ് പറഞ്ഞു.

കോൺഗ്രസിന്റെ 2019 ലോക്‌സഭാ തിരഞ്ഞെടുപ്പ് ഫലത്തെ അടിസ്ഥാനമാക്കി രണ്ട് സീറ്റുകള്‍ മാത്രമാണ് ടി എം സി വാഗ്ദാനം ചെയ്തത്. എന്നാല്‍ ഇതിന് കോണ്‍ഗ്രസ് തയ്യാറുമല്ല. 2019-ലെ തിരഞ്ഞെടുപ്പിൽ സംസ്ഥാനത്ത് തൃണമൂൽ കോൺഗ്രസ് 22 സീറ്റും കോൺഗ്രസ് രണ്ട് സീറ്റും ബിജെപി 18 സീറ്റും നേടി. ലോക്‌സഭയിലെ കോൺഗ്രസ് നേതാവ് കൂടിയായ ചൗധരി ബഹരംപൂർ സീറ്റിൽ വിജയിച്ചപ്പോൾ മുൻ കേന്ദ്രമന്ത്രിയായിരുന്ന അബു ഹസീം ഖാൻ ചൗധരി മാൾഡ ദക്ഷിണിൽ നിന്ന് തുടർച്ചയായ മൂന്നാം വിജയവും നേടി.

English summary

lok sabha election 2024: TMC will contest all the seats in Bengal alone: Mamata Banerjee with a warning