പാചകവാതക വിലയിൽ വൻ വർധനവ്; സാധാരണക്കാർക്ക് ഇരുട്ടടി! പുതുക്കിയ നിരക്കുകൾ ഇങ്ങനെ

പുതിയ സാമ്പത്തിക വർഷത്തിന്റെ തുടക്കത്തിൽ സാധാരണക്കാർക്കും വ്യാപാരികൾക്കും തിരിച്ചടിയായി വാണിജ്യ പാചകവാതക സിലിണ്ടറുകളുടെ വിലയിൽ വൻ വർധനവ് രേഖപ്പെടുത്തി. ഏപ്രിൽ ഒന്ന് മുതൽ പുതുക്കിയ നിരക്കുകൾ പ്രാബല്യത്തിൽ വന്നു. ഡൽഹിയിൽ 19 കിലോയുടെ വാണിജ്യ സിലിണ്ടറിന് 195.50 രൂപയാണ് വർധിപ്പിച്ചത്. ഇതോടെ ഹോട്ടൽ ഭക്ഷണത്തിനും അനുബന്ധ സേവനങ്ങൾക്കും വില വർധിക്കാനുള്ള സാധ്യതയേറി.

വിവിധ നഗരങ്ങളിലെ നിരക്ക് വർധന

രാജ്യത്തെ പ്രധാന നഗരങ്ങളിലെല്ലാം സമാനമായ രീതിയിൽ വില വർധിപ്പിച്ചിട്ടുണ്ട്. ഡൽഹിയിൽ 195.50 രൂപ വർധിച്ചു. അതോടെ ഡൽഹിയിൽ 19 കിലോ വാണിജ്യ സിലിണ്ടറിന്റെ വില 2078 രൂപയായി. അതെ സമയം കൊൽക്കത്തയിൽ 218 രൂപയുടെ വർധനവാണ് രേഖപ്പെടുത്തിയത്. സിലിണ്ടർ വില 2208 രൂപയിലേക്കാണ് കുതിച്ചത്. കേരളത്തിൽ തിരുവനന്തപുരം, കൊച്ചി ഉൾപ്പെടെയുള്ള മറ്റ് നഗരങ്ങളിലും സിലിണ്ടറിന് 2100 രൂപക്ക് മുകളിലേക്ക് വില ഉയർന്നു. അതേസമയം, വീടുകളിൽ ഉപയോഗിക്കുന്ന ഗാർഹിക സിലിണ്ടറുകളുടെ വിലയിൽ നിലവിൽ മാറ്റമില്ല എന്നത് ആശ്വാസകരമാണ്.

വിതരണം വർദ്ധിപ്പിച്ചിട്ടും വിലയേറുന്നു

സപ്ലൈ വർദ്ധിപ്പിക്കാൻ സർക്കാർ നടപടി സ്വീകരിച്ചിട്ടും വില വർധനവ് ഉണ്ടായത് ചർച്ചാവിഷയമായിട്ടുണ്ട്. ഡൽഹിയിൽ വാണിജ്യ സിലിണ്ടറുകളുടെ പ്രതിദിന വിതരണം 1,800-ൽ നിന്ന് 4,500 ആയി ഉയർത്തിയിരുന്നു. അവശ്യ സേവനങ്ങൾക്കും ഹോട്ടലുകൾക്കും തടസ്സമില്ലാതെ സിലിണ്ടറുകൾ ലഭ്യമാക്കാനാണ് കേന്ദ്ര നിർദ്ദേശപ്രകാരം ഈ നടപടി സ്വീകരിച്ചത്. എന്നാൽ അന്താരാഷ്ട്ര വിപണിയിലെ മാറ്റങ്ങളും യുദ്ധസമാനമായ സാഹചര്യങ്ങളും വിലയെ സ്വാധീനിച്ചതായാണ് സൂചന.

ഹോട്ടൽ മേഖലയിൽ പ്രതിസന്ധി

പുതുക്കിയ പോളിസി പ്രകാരം ഹോട്ടലുകൾ, റെസ്റ്റോറന്റുകൾ, ധാബകൾ എന്നിവയ്ക്കാണ് മൊത്തം സപ്ലൈയുടെ 75 ശതമാനവും (പ്രതിദിനം 3,375 സിലിണ്ടറുകൾ) നീക്കിവെച്ചിരിക്കുന്നത്. വില വർധനവ് ഏറ്റവും കൂടുതൽ ബാധിക്കുന്നതും ഈ മേഖലയെയാണ്. പാചക വാതക വില ഉയർന്നതോടെ ഭക്ഷണ സാധനങ്ങളുടെ വില വർധിപ്പിക്കാൻ ഹോട്ടൽ ഉടമകൾ നിർബന്ധിതരായേക്കും. ഹോട്ടൽ ഭക്ഷണത്തെ ആശ്രയിക്കുന്ന സാധാരണക്കാർക്കും വിദ്യാർത്ഥികൾക്കും ഇത് വലിയ ഭാരമായി മാറും.

മറ്റ് വിഭാഗങ്ങളിലെ വിഹിതം

വിദ്യാഭ്യാസ സ്ഥാപനങ്ങൾ, ആശുപത്രികൾ, വിമാനത്താവളങ്ങൾ തുടങ്ങിയ അവശ്യ സേവന വിഭാഗങ്ങൾക്ക് 5 ശതമാനം വിഹിതമാണ് അനുവദിച്ചിരിക്കുന്നത്. വ്യാവസായിക യൂണിറ്റുകൾക്ക് ഒരു ശതമാനവും അന്തർസംസ്ഥാന തൊഴിലാളികൾക്കായി 5 കിലോ സിലിണ്ടറുകളുടെ പ്രത്യേക വിഹിതവും സർക്കാർ നീക്കിവെച്ചിട്ടുണ്ട്. വില വർധനയുമായി ബന്ധപ്പെട്ട കിംവദന്തികൾ വിശ്വസിക്കരുതെന്നും വിതരണം പൂർണ്ണമായും നിയന്ത്രണവിധേയമാണെന്നും ഭക്ഷ്യ വിതരണ വകുപ്പ് അറിയിച്ചു.