ഇപ്പോഴും പലരും മഹാ കുംഭ മേളയിലേക്ക് പോകാൻ ആ​ഗ്രഹിക്കുന്നു; കുംഭമേള നീട്ടണമെന്ന് അഖിലേഷ് യാദവ്

ഡൽഹി: മഹാ കുംഭ മേളയുടെ ദൈർഘ്യം നീട്ടണമെന്ന് സമാജ് വാദി പാർട്ടി ( എസ് പി ) അധ്യക്ഷൻ അഖിലേഷ് യാദവ് ഉത്തർപ്രദേശ് സർക്കാരിനോട് ആവശ്യപ്പെട്ടു. കുംഭ മേളയിൽ പങ്കെടുക്കണമെന്ന് പ്രതീക്ഷിക്കുന്ന ധാരാളം ഭക്തജനങ്ങൾ ഇനിയും റോഡുകളിൽ ഉണ്ടെന്നും മുൻ വർഷങ്ങളിൽ മഹാ കുംഭ മേള 75 ദിവസം നീണ്ടുനിന്നിരുന്നുവെന്നും നിലവിലെ ഷെഡ്യൂൾ ചെറുതാണെന്നും അഖിലേഷ് യാദവ് പറഞ്ഞു.

" ഇപ്പോഴും പലരും മഹാ കുംഭ മേളയിലേക്ക് പോകാൻ ആ​ഗ്രഹിക്കുന്നു. പക്ഷേ കഴിയുന്നില്ല. അത്തരമൊരു സാഹചര്യത്തിൽ സർക്കാർ മഹാ കുംഭത്തിന്റെ സമയപരിധി നീട്ടണം," അദ്ദേഹം പറഞ്ഞു. സോഷ്യൽ‌ മീഡിയയിലെ ദൃശ്യങ്ങൾ നിറഞ്ഞ തീവണ്ടികളും തിരക്കേറിയ റോഡുകളും വൻ ജനക്കൂട്ടവും എല്ലാം മഹാ കുംഭത്തിലേക്ക് പോകുന്നതായി കാണിക്കുന്നു.

ഈ ആഴ്ച ആദ്യം മഹാ കുംഭ മേളയിലേക്ക് നയിക്കുന്ന റോഡുകളിൽ കിലോ മീറ്ററുകളോളം നീണ്ടുകിടക്കുന്ന ​ഗതാ​ഗതക്കുരുക്ക് രൂക്ഷമായിരുന്നു. ജനത്തിരക്ക് പ്രയാ​ഗ് രാജ് സം​ഗമം റെയിൽ വേ സ്റ്റേഷൻ താൽക്കാലികമായി അടച്ചിടാൻ നിർബന്ധിതരായെന്നും കഴിഞ്ഞ മാസം നടന്ന മഹാ കുംഭത്തിൽ തിക്കിലും തിരക്കിലും പെട്ട് മരിച്ചവരുടെ യഥാർത്ഥ കണക്ക് സംസ്ഥാന സർക്കാർ മറച്ചുവെക്കുകയാണെന്നും അഖിലേഷ് യാദവ് ആരോപിച്ചു.

ലോകത്തിലെ ഏറ്റവും വലിയ ആത്മീയ സം​ഗമമായ മഹാ കുംഭം ജനുവരി 13 ന് ആരംഭിച്ചു. മഹാ ശിവരാത്രിയോട് അനുബന്ധിച്ച് ഫെബ്രുവരി 26 ന് സമാപിക്കും. സംസ്ഥാന ​ഗവൺമെന്റ് കണക്കുകൾ പ്രകാരം, വെള്ളിയാഴ്ച വൈകുന്നേരം വരെ സം​ഗമത്തിൽ 50 കോടിയിലധികം ആളുകൾ വിശുദ്ധ് സ്നാനം നടത്തി. വെള്ളിയാഴ്ച വൈകുന്നേരം 6 മണി വരെ 92 ലക്ഷത്തിലധികം പേർ പുണ്യ സ്നാനം നടത്തി.

45 ദിവസത്തെ ആഘോഷമാണ്. വൻ ഒരുക്കങ്ങളാണ് യു പി സർക്കാർ കുംഭ മേളയ്ക്കായി നടത്തിയത്. മഹാ കുംഭ ന​ഗർ എന്ന താത്ക്കാലിക ന​ഗരം ഒരുക്കിയത് 10,000 ഏക്കറിൽ. ഉത്തർപ്രദേശിലെ പ്രയാ​ഗ് രാജിൽ ഇത്തവണ നടക്കുന്ന മഹാ കുംഭ മേളയ്ക്ക് അത് കൊണ്ട് തന്നെ വളരെ പ്രധാന്യമുണ്ട്. രാജ്യത്തിന് അകത്ത് നിന്ന് മാത്രമല്ല, ലോകത്തിന്റെ വിവിധ ഭാ​ഗങ്ങളിൽ നിന്നും കുംഭ മേളയിൽ പങ്കെടുക്കാൻ ഭക്തർ എത്താറുണ്ട്..