Maharashtra Exit Poll 2024;'മഹാ'പോരിൽ മഹായുതി തന്നെ; കോൺഗ്രസ് മോഹം ഇത്തവണയും പൊലിയുമെന്ന് സർവ്വെ ഫലം

Updated: Wednesday, November 20, 2024, 19:45 [IST]

മഹാരാഷ്ട്ര നിയമസഭ തിരഞ്ഞെടുപ്പിൽ ഇത്തവണയും എൻ ഡി എ അധികാരത്തുടർച്ച നേടുമെന്ന് സർവ്വെ ഫലം. മെട്രിസ് സർവ്വെയിലാണ് മഹായുതിക്ക് ഭരണം പ്രവചിക്കുന്നത്. ബി ജെ പി നയിക്കുന്ന മഹായുതി സഖ്യത്തിന് 150 മുതൽ 170 സീറ്റുകൾ വരെയാണ് സർവ്വെ പ്രവചിക്കുന്നത്. 48 ശതമാനം വരെ വോട്ട് വിഹിതം നേടാനാകുമെന്നും സർവ്വെ പറയുന്നു.

അതേസമയം മഹാവികാസ് അഘാഡി സഖ്യത്തിന് 110 മുതൽ 130 സീറ്റുകൾ വരെയാണ് സർവ്വെ പ്രവചനം. മറ്റുള്ളവർക്ക് 10 വരെ സീറ്റുകൾ ലഭിക്കും. കോൺഗ്രസ് സഖ്യം 42 ശതമാനം വരെ വോട്ടുകൾ നേടുമെന്നും മറ്റുള്ളവർക്ക് 10 ശതമാനം വോട്ട് ലഭിക്കുമെന്നും സർവ്വെ പറയുന്നു.

കഴിഞ്ഞ നിയനസഭ തിരഞ്ഞെടുപ്പിൽ ബി ജെ പിക്ക് 105 സീറ്റുകളായിരുന്നു ലഭിച്ചത്. ഇത്തവണ നേരിയ നഷ്ടം ബി ജെ പിക്ക് പ്രവചിക്കുന്നുണ്ട്. 4 സീറ്റുകൾ നഷ്ടമാകുമെന്നും 101 സീറ്റുകൾ വരെ നേടുമെന്നും സർവ്വെ പറയുന്നു. ഏക്നാഥ് ഷിൻഡെയുടെ ശിവസേനയ്ക്ക് 37-45 സീറ്റുകളും അജിത് പവാറിന്റെ എൻ സി പിക്ക് 17-26 സീറ്റുകൾ വരേയും സർവ്വെ പറയുന്നു.

മറുവശത്ത് മഹാവികാസ് അഘാഡി സഖ്യത്തിൽ കോൺഗ്രസിന് 2019 നെ അപേക്ഷിച്ച് മൂന്ന് സീറ്റുകൾ വരെയാണ് അധികമായി പ്രവചിക്കുന്നത്. 39 മുതൽ 47 സീറ്റുകൾ വരെ നേടും. ഉദ്ധവ് താക്കറെ നയിക്കുന്ന ശിവസേനയ്ക്ക് 21 മുതൽ 29 സീറ്റുകൾ വരേയും ശരദ് പവാറിന്റെ ശിവസേനയ്ക്ക് 35-43 വരേയും സീറ്റുകൾ പ്രവചിക്കുന്നുണ്ട്.

രാജ്യം ഉറ്റുനോക്കുന്ന മഹാരാഷ്ട്ര തിരഞ്ഞെടുപ്പിൽ ഇത്തവണ ബി ജെ പിക്കും കോൺഗ്രസിനും അഭിമാനപ്പോരാട്ടമാണ്. കഴിഞ്ഞ നിയമസഭ തിരഞ്ഞെടുപ്പിൽ സംസ്ഥാനത്ത് ഏറ്റവും കൂടുതൽ സീറ്റുകൾ നേടിയ ഒറ്റകക്ഷി ബി ജെ പിയായിരുന്നു. സഖ്യകക്ഷിയായ ശിവസേനയ്ക്ക് 56 സീറ്റുകൾ ലഭിച്ചു. എൻ സി പി 54 സീറ്റുകളും കോൺഗ്രസ് 44 സീറ്റുകളും നേടി. എൻ ഡി എയിൽ മുഖ്യമന്ത്രി സ്ഥാനത്തിന് ശിവസേന അവകാശം ഉന്നയിച്ചതോടെ ബി ജെ പിയും ശിവസേനയും ഇടഞ്ഞു.ഒടുവിൽ ബദ്ധശത്രുക്കളായ കോൺഗ്രസും എൻ സി പിയുമായി കൈകോർത്ത് ശിവസേന അധകാരത്തിലേറി. എന്നാൽ കപ്പിനും ചുണ്ടിനുമിടയിൽ അധികാരം നഷ്ടപ്പെട്ട ബിജെപി വെറുതിയിരുന്നില്ല. ഒടുവിൽ 2022 ൽ ശിവസേനയെ പിളർത്തി ബിജെപി അധികാരം തിരിച്ചുപിടിച്ചു. വൈകാതെ എൻസിപിയെ പിളർത്തി ഭരണം കൂടുതൽ സുരക്ഷിതമാക്കുകയും ചെയ്തു.

ഇക്കുറി എന്ത് വിലകൊടുത്തും ഭരണം തിരിച്ചുപിടിക്കുമെന്നാണ് എംവിഎ സഖ്യത്തിന്റെ അവകാശവാദം. ലോക്സഭ തിരഞ്ഞെടുപ്പിലെ മികച്ച പ്രകടനമാണ് സഖ്യത്തിന് ആശ്വാസം പകരുന്നത്. അതേസമയം ഭരണത്തുടർച്ച ആവർത്തിക്കുമെന്ന പ്രതീക്ഷയിലാണ് എൻഡിഎ.