ദാവോസിൽ 30 ലക്ഷം കോടിയുടെ കരാറുകളുമായി മഹാരാഷ്ട്ര! അദാനി ഗ്രൂപ്പ് വക 6 ലക്ഷം കോടിയുടെ നിക്ഷേപം

സ്വിറ്റ്‌സർലൻഡിലെ ദാവോസിൽ നടന്ന ലോക സാമ്പത്തിക ഫോറം (WEF 2026) വാർഷിക ഉച്ചകോടിയിൽ ആഗോള നിക്ഷേപകരെ ഞെട്ടിച്ചുകൊണ്ട് വൻ നേട്ടം കൊയ്ത് മഹാരാഷ്ട്ര സർക്കാർ. സംസ്ഥാനത്തിന്റെ വ്യവസായ, തൊഴിൽ മേഖലകൾക്ക് അഭൂതപൂർവ്വമായ കുതിപ്പേകുന്ന രീതിയിൽ 360 ബില്യൺ ഡോളറിന്റെ (ഏകദേശം 30 ലക്ഷം കോടി രൂപ) നേരിട്ടുള്ള നിക്ഷേപ ധാരണാപത്രങ്ങളിലാണ് മഹാരാഷ്ട്ര ഒപ്പുവെച്ചത്. മുഖ്യമന്ത്രി ദേവേന്ദ്ര ഫഡ്‌നാവിസിന്റെ നേതൃത്വത്തിലുള്ള ഉന്നതതല പ്രതിനിധി സംഘമാണ് ദാവോസിൽ സംസ്ഥാനത്തിന്റെ നിക്ഷേപ സാധ്യതകൾ അവതരിപ്പിച്ചത്. ഇതിന് പുറമെ, സംസ്ഥാനത്തിന്റെ അടിസ്ഥാന സൗകര്യ വികസനത്തിന് പുതിയ മുഖം നൽകിക്കൊണ്ട് അദാനി ഗ്രൂപ്പും തങ്ങളുടെ വമ്പൻ നിക്ഷേപ പദ്ധതികൾ ഉച്ചകോടിയിൽ പ്രഖ്യാപിച്ചു.

ഗ്രീൻ എനർജി (ഹരിത ഊർജ്ജം), ഇൻഫർമേഷൻ ടെക്നോളജി, നിർമ്മിത ബുദ്ധി (AI) ഡാറ്റാ സെന്ററുകൾ, സെമികണ്ടക്ടർ നിർമ്മാണം, ഓട്ടോമൊബൈൽ തുടങ്ങിയ അത്യാധുനിക മുൻഗണനാ മേഖലകളിലേക്കാണ് ഈ ആഗോള നിക്ഷേപങ്ങൾ പ്രധാനമായും എത്തിച്ചേരുന്നത്. ഉച്ചകോടിയിൽ ഒപ്പുവെച്ച ഈ കരാറുകൾ വഴി സംസ്ഥാനത്ത് ലക്ഷക്കണക്കിന് പുതിയ തൊഴിലവസരങ്ങൾ സൃഷ്ടിക്കപ്പെടുമെന്നാണ് ഔദ്യോഗിക വിലയിരുത്തൽ.

മാറ്റത്തിന്റെ വേഗത കൂട്ടാൻ അദാനി ഗ്രൂപ്പിന്റെ വൻ നിക്ഷേപം

ഉച്ചകോടിയുടെ അനുബന്ധമായി അദാനി ഗ്രൂപ്പ് പ്രഖ്യാപിച്ച ദീർഘകാല നിക്ഷേപ പദ്ധതിയാണ് പ്രധാന ആകർഷണം. അടുത്ത 7 മുതൽ 10 വർഷത്തിനുള്ളിൽ മഹാരാഷ്ട്രയിൽ മാത്രം ഏകദേശം 66 ബില്യൺ ഡോളറിന്റെ (ഏകദേശം 6 ലക്ഷം കോടി രൂപ) നിക്ഷേപം നടത്താനാണ് അദാനി ഗ്രൂപ്പ് ലക്ഷ്യമിടുന്നത്. കേവലം ആസ്തികൾ സൃഷ്ടിക്കുന്നതിനപ്പുറം വലിയൊരു വ്യവസായ ആവാസവ്യവസ്ഥ കെട്ടിപ്പടുക്കുകയാണ് തങ്ങളുടെ ലക്ഷ്യമെന്ന് അദാനി എന്റർപ്രൈസസ് ഡയറക്ടർ പ്രണവ് അദാനി വ്യക്തമാക്കി.

അദാനി ഗ്രൂപ്പിന്റെ പ്രധാന പ്രോജക്റ്റുകൾ ഇവയാണ്

ധാരാവി പുനർവികസന പദ്ധതി: ഏഷ്യയിലെ തന്നെ ഏറ്റവും വലിയ ചേരി പ്രദേശമായ മുംബൈയിലെ ധാരാവിയെ ആധുനികവും സാമ്പത്തികമായി വളർച്ചയുള്ളതുമായ ഒരു മികച്ച ടൗൺഷിപ്പാക്കി മാറ്റാനുള്ള മെഗാ പ്രോജക്റ്റ് ഇതിൽ ഉൾപ്പെടുന്നു.

നവി മുംബൈ എയർപോർട്ട് ഹബ്: അടുത്തിടെ പ്രവർത്തനം ആരംഭിച്ച നവി മുംബൈ അന്താരാഷ്ട്ര വിമാനത്താവളത്തെ കേന്ദ്രീകരിച്ച് വൻകിട ലോജിസ്റ്റിക്സ്, ഹോസ്പിറ്റാലിറ്റി, കൊമേഴ്സ്യൽ റിയൽ എസ്റ്റേറ്റ് ഹബ്ബുകൾ വികസിപ്പിക്കും.

ഡിജിറ്റൽ & എനർജി ഇൻഫ്രാസ്ട്രക്ചർ: 3,000 മെഗാവാട്ട് ശേഷിയുള്ള ഗ്രീൻ ഡാറ്റാ സെന്റർ പാർക്കുകൾ, 8,700 മെഗാവാട്ടിയുടെ പമ്പ്ഡ് സ്റ്റോറേജ് ഹൈഡ്രോ പവർ പ്രോജക്റ്റുകൾ, കൽക്കരി വാതകീകരണ പ്ലാന്റുകൾ എന്നിവ സ്ഥാപിക്കും.

അഡ്വാൻസ്ഡ് മാനുഫാക്ചറിംഗ്: സാങ്കേതിക വിദ്യയിൽ സ്വയംപര്യാപ്തത ലക്ഷ്യമിട്ട് അത്യാധുനിക സെമികണ്ടക്ടർ, ഡിസ്‌പ്ലേ ഫാബ്രിക്കേഷൻ യൂണിറ്റുകളും അദാനി ഗ്രൂപ്പ് മഹാരാഷ്ട്രയിൽ സ്ഥാപിക്കും.

മറ്റ് പ്രമുഖ നിക്ഷേപങ്ങളും പങ്കാളിത്തങ്ങളും

ആദ്യ ദിനം മുതൽ തന്നെ മികച്ച മുന്നേറ്റമാണ് മഹാരാഷ്ട്ര ദാവോസിൽ നടത്തിയത്. പ്രമുഖ ആഗോള ഗ്രൂപ്പായ എസ്‌ബിജി മുംബൈ മെട്രോപൊളിറ്റൻ മേഖലയിലെ ലോജിസ്റ്റിക്സ് വികസനത്തിനായി മാത്രം 20 ബില്യൺ ഡോളറിന്റെ നിക്ഷേപ കരാറിൽ ഒപ്പുവെച്ചു. ഇത് വഴി 4.5 ലക്ഷം തൊഴിലവസരങ്ങൾ ഉണ്ടാകും. കൂടാതെ അൽത്ത കാപ്പിറ്റൽ, പാഞ്ച്ഷീൽ റിയൽറ്റി എന്നിവർ ചേർന്ന് 25 ബില്യൺ ഡോളറിന്റെയും, കെ രഹേജ കോർപ്പറേഷൻ 10 ബില്യൺ ഡോളറിന്റെയും നിക്ഷേപങ്ങൾ ഉറപ്പുനൽകിയിട്ടുണ്ട്. അന്താരാഷ്ട്ര തലത്തിൽ പ്രശസ്തമായ ജപ്പാൻ ഇന്റർനാഷണൽ കോപ്പറേഷൻ ഏജൻസി (JICA), സിംഗപ്പൂരിൽ നിന്നുള്ള സെകോർപ് ഡെവലപ്‌മെന്റ് എന്നിവരുമായും തന്ത്രപരമായ പങ്കാളിത്തത്തിൽ മഹാരാഷ്ട്ര ഒപ്പുവെച്ചു.

രാജ്യത്തിന്റെ സാമ്പത്തിക തലസ്ഥാനമായ മഹാരാഷ്ട്രയെ കൂടുതൽ ശക്തമായ സമ്പദ്‌വ്യവസ്ഥയിലേക്ക് നയിക്കാനുള്ള സംസ്ഥാന സർക്കാരിന്റെ നീക്കങ്ങൾക്ക് ദാവോസ് ഉച്ചകോടിയിലെ ഈ വൻ വിജയവും അദാനി ഗ്രൂപ്പ് അടക്കമുള്ള വൻകിട കോർപ്പറേറ്റുകളുടെ പിന്തുണയും വലിയ ഊർജ്ജമാണ് പകരുന്നത്. വരും വർഷങ്ങളിൽ ഈ പ്രോജക്റ്റുകൾ കൃത്യസമയത്ത് നടപ്പിലാക്കുന്നതിനാണ് സർക്കാർ ഇനി പ്രാധാന്യം നൽകുന്നത്.