10 മാസം പ്രായമുള്ള കുഞ്ഞിന് പീഡനം, കാണാതായ കുഞ്ഞിനെ തിരയാന്‍ പ്രതിയും, പൊലീസ് കണ്ടെത്തല്‍ ഇങ്ങനെ..

ദില്ലി: പത്തുമാസം പ്രായമുള്ള കുഞ്ഞിനെ അയല്‍ക്കാരന്‍ പീഡിപ്പിച്ച് ഉപേക്ഷിച്ചു. പശ്ചിമ ദില്ലിയിലെ വികാസ്പുരിയിലായിരുന്നു സംഭവം. നിര്‍മ്മാണ തൊഴിലാളികളുടെ മകളായ പെണ്‍കുഞ്ഞിനെ മാതാപിതാക്കള്‍ ഉറങ്ങിക്കിടക്കുമ്പോള്‍ തട്ടിക്കൊണ്ടുപോയ നിര്‍മ്മാണ തൊഴിലാളിയാണ് കുട്ടിയെ പീഡിപ്പിച്ചത്. ഡിഡിഎ പാര്‍ക്കിന് സമീപത്തെ ചേരിയിലാണ് കുട്ടിയുടെ കുടുംബം താമസിക്കുന്നത്.

കുട്ടിയെ കാണാതായി മാതാപിതാക്കള്‍ ബഹളം വെച്ചതോടെ സംഭവം പൊലീസില്‍ അറിയിക്കുകയായിരുന്നു. രാത്രി 12.30തോടെ പൊലീസെത്തി നടത്തിയ തിരച്ചിലിനൊടുവില്‍ കുറ്റിക്കാട്ടില്‍ നിന്നാണ് കുട്ടിയെ കണ്ടെത്തിയത്. ആശുപത്രിയില്‍ ചികിത്സയില്‍ കഴിയുന്ന പെണ്‍കുട്ടിയുടെ നില മെച്ചപ്പെട്ടിട്ടുണ്ട്. പെണ്‍കുഞ്ഞിനെ തട്ടിക്കൊണ്ടുപോയി പീഡിപ്പിക്കുകയായിരുന്നുവെന്ന് പൊലീസ് സ്ഥിരീകരിച്ചിട്ടുണ്ട്.

കുട്ടികള്‍ക്കെതിരെയുള്ള ലൈംഗികാതിക്രമങ്ങള്‍ തടയുന്നതിനുള്ള പോക്‌സോ നിയമപ്രകാരം കേസെടുത്ത പൊലീസ് 38 കാരനാണ് കുട്ടിയെ ആക്രമിച്ചതെന്ന് കണ്ടെത്തിയ പൊലീസ് ഇയാളെ അറസ്റ്റ് ചെയ്തു. കുഞ്ഞിന്റെ കുടുംബത്തിന് സംശയം തോന്നാതിരിക്കാന്‍ കുട്ടിയെ തിരയുന്നതിനായി ഇയാളും ഒപ്പം ചേര്‍ന്നിരുന്നതായി പൊലീസ് വ്യക്തമാക്കുന്നു. കുട്ടിയെ ആക്രമിച്ച ശേഷം കുട്ടി മരിച്ചെന്ന് സംശയം തോന്നിയ പ്രതി കുട്ടിയെ ഉപേക്ഷിച്ച് കടന്നുകളയായിരുന്നു. സംഭവസ്ഥലത്തുനിന്ന് പ്രതിയുടെ മൊബൈല്‍ ഫോണും പൊലീസ് കണ്ടെടുത്തു.

English summary

Man arrested for raping a ten month old girl. 39 years old construction labour arrested by police on this incident from Delhi.