കാര്‍ അപകടം;പെണ്‍കുട്ടിയെ യുവാവ് കൈയ്യേറ്റം ചെയ്തു

ചണ്ഡിഗഡ്: പെണ്‍കുട്ടികള്‍ക്ക് നേരെ അതിക്രമങ്ങള്‍ ഉണ്ടാകുമ്പോള്‍ തെരുവില്‍ പ്രതിഷേധിയ്ക്കാന്‍ എത്തുന്നവരുടെ എണ്ണം കൂടിക്കൂടി വരികയാണ്. സെലിബ്രിറ്റികള്‍ മുതല്‍ സാധാരണക്കാര്‍വരെ സര്‍ക്കാരിനെതിരെ മുദ്രാവാക്യം വിളിയ്ക്കാനും സ്ത്രീയുടെ മഹത്വത്തെപ്പറ്റിയും അവളെ സംരക്ഷിയ്‌ക്കേണ്ടതിന്റെ ആവശ്യകതയെപ്പറ്റിയും വാചാലരാകും. എന്നാല്‍ ഇവരില്‍ എത്രപേര്‍ ഒരു പെണ്‍കുട്ടി ആക്രമിയ്ക്കപ്പെടുന്നത് കണ്ടാല്‍ അതിനെതിരെ പ്രതികരിയ്ക്കും.

സെപ്റ്റംബര്‍ 26 വ്യാഴാഴ്ച ചണ്ഡിഗഡിലെ ഒരു വ്യാപാര കേന്ദ്രത്തില്‍ ചെറിയൊകു കാര്‍ അപകടം ഉണ്ടായി. അപകടമുണ്ടാക്കിയ കാര്‍ ഓടിച്ചിരുന്നത് ഒരു പെണ്‍കുട്ടിയാണ്. അപകടം ഉണ്ടാക്കിയതിന്റെ പേരില്‍ പെണ്‍കുട്ടിയെ മറ്റൊരു കാറിലുണ്ടായിരുന്ന യുവാവ് നടുറോഡിലിട്ട് പൊതിരെ തല്ലി. ബാറ്റ് കൊണ്ട് പെണ്‍കുട്ടിയെ തലങ്ങും വിലങ്ങും തല്ലുകയായിരുന്നു ഇയാള്‍.

കാറില്‍ നിന്ന് യുവതിയെ വലിച്ചിറക്കി മീറ്ററുകളോളം റോഡിലൂടെ വലിച്ചിഴച്ചു. കൈയ്ക്കും കാലിനും പരുക്കേറ്റ യുവതി സഹായത്തിനായി നിലവിളിച്ചെങ്കിലും ആളുകളെല്ലാം കാഴ്ചക്കായി നില്‍ക്കുകയാണ് ഉണ്ടായത്.

പെണ്‍കുട്ടിയെ കൈയ്യേറ്റം ചെയ്തയാളൊടൊപ്പം രണ്ട് സ്ത്രീകള്‍ ഉണ്ടായിരുന്നു. എന്നാല്‍ ഇവര്‍ പോലും പെണ്‍കുട്ടിയെ മര്‍ദ്ദിയ്ക്കുന്നത് തടയാന്‍ ശ്രമിച്ചില്ല. തന്റെ കലിയടങ്ങും വരെ പെണ്‍കുട്ടിയെ തല്ലിയ ശേഷം യുവാവും സുഹൃത്തുക്കളും കാറില്‍ കയറി പാഞ്ഞു.

പൊലീസെത്തി വിവരങ്ങള്‍ അന്വേഷിയ്ക്കുമ്പോള്‍ അവിടെ ഉണ്ടായിരുന്നവരില്‍ പെണ്‍കുട്ടിയടക്കം ഒരാള്‍ക്ക് പോലും അക്രമിയുടെ കാറിന്റെ നമ്പര്‍ അറിയില്ലായിരുന്നു. പെണ്‍കുട്ടിയെ പൊലീസ് ആശുപത്രിയിലാക്കി. എത്രയും വേഗം കേസില്‍ കുറ്റക്കാരായവരെ കണ്ടെത്തുമെന്ന് പൊലീസ് അറിയിച്ചു.

English summary

She has just been through a hell. A man, accompanied with two girls, started beating her with a baseball bat, after a minor car accident. He even dragged her on the road, injuring her knees severely in his fit of madness