ബ്ലേഡുകാരുടെ സിമ്പതി നേടാനായി സഹോദരന്റെ മകനെ കൊന്നു!! മരണ വീട്ടിൽ പണം ചോദിച്ച് വരില്ലല്ലോ...

ജിഗ്നേഷ് മഗ്വാന എന്ന യുവാവാണ് 6 വയസ്സുള്ള സഹോദര പുത്രനെ കഴുത്ത് ഞെരിച്ച് കൊന്നത്.

By മരിയ

Updated: Tuesday, April 4, 2017, 9:19 [IST]

രാജ്‌കോട്ട്: ബ്ലേഡുകാരില്‍ നിന്ന് രക്ഷപ്പെടാനായി മരുമകനെ കൊന്ന യുവാവ് അറസ്റ്റില്‍. ജിഗ്നേഷ് മഗ്വാന എന്ന യുവാവാണ് 6 വയസ്സുള്ള സഹോദര പുത്രനെ കഴുത്ത് ഞെരിച്ച് കൊന്നത്. വീട്ടില്‍ മരണം നടന്നാല്‍ കുറച്ച് കാലത്തേയ്ക്ക് കടക്കാര്‍ വീട്ടിലേക്ക് വരില്ലെന്നുള്ളത് കൊണ്ടാണ് കുട്ടിയെ കൊന്നതെന്ന് ഇയാള്‍ പോലീസിനോട് സമ്മതിച്ചു.

ജിഗ്നേഷും ഭാര്യയും മകളും താമസിച്ചിരുന്നത് സഹോദരന്റെ കുടുംബത്തിന് ഒപ്പമായിരുന്നു. സഹോദരന്‍ ഫാല്‍ഗുനിന്റെ മകനാണ് രോഹന്‍. ബിസിനസ്സ് തുടങ്ങാനായി ബ്ലേഡ്കാരില്‍ നിന്ന് 3.50 ലക്ഷം രൂപ ഇയാള്‍ കടം വാങ്ങിച്ചിരുന്നു. എന്നാല്‍ കച്ചവടം പൊളിഞ്ഞു. പണം തിരികെ നല്‍കണം എന്ന് ആവശ്യപ്പെട്ട് ബ്ലേഡുകാര്‍ വീട്ടില്‍ എത്താനും തുടങ്ങി.

ഫാല്‍ഗുന് ആയിരുന്ന കുടുംബത്തിലെ ചെലവ് എല്ലാം നോക്കിയിരുന്നത്. ഇയാളുടെ ബിസിനസ്സ് ലാഭത്തില്‍ ആയിരുന്നു. സഹോദരനോടുള്ള ദേഷ്യം മൂത്ത ജിഗ്നേഷ് വീടിന്റെ ടെറസ്സില്‍ വെച്ച് രോഹനെ കഴുത്ത് ഞെരിച്ച് കൊല്ലുകയായിരുന്നു. കുട്ടിയുടെ ശബ്ദം പുറത്ത് കേള്‍ക്കാതിരിയ്ക്കാനായി വായില്‍ തുണി തിരുകി വെച്ചിരുന്നു. രോഹന്റെ മൃതദേഹം ടെറസില്‍ കണ്ടെത്തിയപ്പോള്‍ ഏറ്റവും ബഹളം വെച്ചത് ജിഗ്നേഷ് ആയിരുന്നു. ഈ പെരുമാറ്റത്തില്‍ പോലീസിന് സംശയം തോന്നിയിരുന്നു.

മൃതദേഹം പരിശോധിച്ച പോലീസ് ഇതില്‍ നിന്ന് വിരലടയാളങ്ങള്‍ കണ്ടെത്തിയിരുന്നു. ഇത് ജിഗ്നേഷിന്റെതാണെന്ന് സ്ഥിരീകരിച്ചു. ചോദ്യം ചെയ്യലില്‍ ഇയാള്‍ കുറ്റം സമ്മതിച്ചു.