മംഗളൂരുവില് മലയാളി കന്യാസ്ത്രീയെ തട്ടിക്കൊണ്ടുപോകാന് ശ്രമം
മംഗളൂരു: പശ്ചിമ ബംഗാളില് കന്യാസ്ത്രീയെ കൂട്ട ബലാത്സംഗം ചെയ്ത വാര്ത്തയുടെ നടുക്കം മാറുന്നതിന് മുമ്പ് മറ്റൊരു കന്യാസ്ത്രീക്ക് നേര്ക്കും ആക്രമണം. മംഗളൂരുവില് ആണ് സംഭവം.
മലയാളിയായ കന്യാസ്ത്രീയെ ആണ് ഓട്ടോറിക്ഷയില് തട്ടിക്കൊണ്ടുപോകാന് ശ്രമിച്ചത്. ഇവര് രക്ഷപ്പെട്ട് പോലീസിനെ സമീപിച്ചപ്പോള് കേസെടുക്കാന് പോലും തയ്യാറായില്ല.
പത്തനംതിട്ട സ്വദേശിനിയായ ജെസ്സി അബ്രാഹാം ആണ് അക്രമത്തിന് ഇരയായത്. ബസ് കാത്ത് നില്ക്കുമ്പോഴാണ് നാല് പേര് ചേര്ന്ന് ഇവരെ ഓട്ടോറിക്ഷയില് തട്ടിക്കൊണ്ടുപോയത്.
ഓട്ടോറിക്ഷയുടെ വേഗം കുറഞ്ഞപ്പോള് ജെസ്സി ചാടി രക്ഷപ്പെടുകയായിരുന്നു. കയ്യിലുണ്ടായിരുന്ന ബാഗും പണവും എല്ലാം അക്രമികള് ഇതിനകം തട്ടിയെടുത്തിരുന്നു. വണ്ടിയില് നിന്ന് ചാടിയപ്പോള് പരിക്കേറ്റ സിസ്റ്റര് ഒരു വഴിയാത്രക്കാരന്റെ സഹായത്തോടെയാണ് ആശുപത്രിയില് എത്തിയത്.
പ്രാഥമിക ചികിത്സക്ക് ശേഷം കുദ്രി പോലീസ് സ്റ്റേഷനിലെത്തി പരാതി ബോധിപ്പിച്ചു. എന്നാല് സംഭവം നടന്നത് തങ്ങളുടെ സ്റ്റേഷന് പരിധിയിലല്ലെന്ന് പറഞ്ഞ് എഎസ്ഐ ഇവരെ അവിടെ നിന്ന് മടക്കിയയക്കുകയായിരുന്നു.
ഇതോടെ ജെസ്സി മംഗളൂരു റൂറല് പോലീസ് സ്റ്റേഷനിലെത്തി പരാതി നല്കുകയായിരുന്നു. പരാതി സ്വീകരിക്കാതിരുന്ന കുദ്രി സ്റ്റേഷനിലെ എഎസ്ഐയെ സിറ്റി പോലീസ് കമ്മീഷണര് സസ്പെന്ഡ് ചെയ്തു.