പെണ്‍കുട്ടികളുടെ മടിയില്‍ ഒരു ആണ്‍കുട്ടി കിടന്നാലെന്താ... മര്‍ദ്ദിക്കാന്‍ നിങ്ങളാര്?

മംഗളൂരു: ക്ലാസ്സ് മുറിയില്‍ അഞ്ച് പെണ്‍കുട്ടികളുടെ മടിയില്‍ ഒരു ആണ്‍കുട്ടി കിടന്ന് ഫോട്ടോക്ക് പോസ് ചെയ്യുന്ന ചിത്രം സൃഷ്ടിച്ച വിവാദങ്ങള്‍ക്ക് അവസാനമാകുന്നില്ല. ഇതിനിടെ ഫോട്ടോയില്‍ ഉള്ള ആണ്‍കുട്ടിയെ ഒരു സംഘം തട്ടിക്കൊണ്ടുപോയി മര്‍ദ്ദിച്ചു. ആണ്‍കുട്ടിയേയും പെണ്‍കുട്ടികളേയും കോളേജില്‍ നിന്ന് സസ്‌പെന്‍ഡ് ചെയ്യുകയും ചെയ്തു.

മംഗളൂരുവിലെ ഹോവിന്ദ ദാസ കോളേജിലെ അവസാന ബിസിഎ വിദ്യാര്‍ത്ഥികളാണ് ഇവര്‍. ഫോട്ടോയില്‍ ഇവര്‍ക്കടുത്തിരുന്ന മറ്റൊരു വിദ്യാര്‍ത്ഥിയെ ആണ് ഒരു കൂട്ടര്‍ തട്ടിക്കൊണ്ടുപോയി ക്രൂരമായി മര്‍ദ്ദിച്ചത്.

തന്റെ ഫേസ്ബുക്ക് അക്കൗണ്ട് ഹാക്ക് ചെയ്താണ് ഈ ചിത്രം പുറത്തെടുത്തതെന്നാണ് ഒരു പെണ്‍കുട്ടി പറയുന്നത്. ചിത്രത്തില്‍ കൃത്രിമം നടത്തിയിട്ടുണ്ടെന്നും ഇവര്‍ ആരോപിക്കുന്നു. ആദ്യം പെണ്‍കുട്ടികളുടെ മുഖം മറച്ചായിരുന്നു ചിത്രം പരസ്യപ്പെടുത്തിയത്. ഇത് ഓണ്‍ലൈനില്‍ വൈറല്‍ ആയി.

എന്നാല്‍ ഇപ്പോള്‍ അതൊന്നും അല്ല പ്രശനം എന്നാണ് റിപ്പോര്‍ട്ടുകള്‍. പെണ്‍കുട്ടികളുടെ മടിയില്‍ കിടന്ന ആണ്‍കുട്ടി മുസ്ലീമും പെണ്‍കുട്ടികള്‍ ഹിന്ദുക്കളും ആണ്. പ്രതിഷേധവും സമരവുമായി രംഗത്തുള്ളത് ആര്‍എസ്എസും എബിവിപിയും ആണ്. വിദ്യാര്‍ത്ഥിയെ മര്‍ദ്ദിച്ചതിന് പിന്നിലും ഇത്തരം ശക്തികളാണെന്നാണ് റിപ്പോര്‍ട്ടുകള്‍.

സംഭവം ഇപ്പോള്‍ മലയാളികളും ചര്‍ച്ച ചെയ്യുന്നുണ്ട്. പല ഓണ്‍ലൈന്‍ ഗ്രൂപ്പുകളിലും ഇത്തരം ചര്‍ച്ചകള്‍ നടക്കുന്നുണ്ട്. അത്തരം ഒരു ചിത്രത്തില്‍ ഒരു അസ്വാഭാവികതയും ഇല്ലെന്ന് വാദിക്കുമ്പോള്‍ എതിര്‍ക്കുന്നവരും ഒരുപാടുണ്ട്.

വിദ്യാര്‍ത്ഥികളുടെ കാര്യത്തില്‍ കോളേജ് അധികൃതര്‍ എന്തായാലും അന്തിമ തീരുമാനം എടുത്തിട്ടില്ല. അന്വേഷിക്കാന്‍ വേണ്ടി ഒരു കമ്മീഷനെ നിയോഗിച്ചിട്ടുണ്ട്.

സഹോദരനും സഹോദരിക്കും ഒരുമിച്ച് നടക്കാന്‍ പോലും പറ്റാത്ത സ്ഥിതിവിശേഷത്തിലേക്കാണ് ഇപ്പോള്‍ കേരളവും പോകുന്നത്. അപ്പോള്‍ പിന്നെ ഇത്തരം പ്രതിഷേധങ്ങളെ എങ്ങനെ കുറ്റപ്പെടുത്താനാകും എന്നാണ് മറ്റ് ചിലരുടെ ചോദ്യം

English summary

Mangaluru: New twist to Facebook photo case - Girl claims pic was 'doctored'